› 選擇地區
三藩市
紐約
洛杉磯
其他美國地區
香港 台灣 北美
 
2006年07月10日

四餸一湯:香草香薰菜 定驚寧神

天水圍居民最啱食!

上星期自英格蘭、巴西出局,世界盃感覺已經打完,冇晒Mood!前幾日天水圍三屍燒炭案轟動全港、遲啲坐巴士睇醫生都要交稅!被篇篇令人情緒低落的新聞包圍,就更加要多啲𠱁自己開心;草本健康及美容顧問Ophelia表示,其實以香草、香薰入饌,可有提升情緒功效,加上香草煮食香氣四溢,Relax享受煮食之樂;人生煩事多、樂趣更多,開心啲喇香港人!

記者︰劉昱蘭
攝影︰周旭文
Model︰Daisy(Salvador)
示範︰Ophelia@康姿堂(26762885)

香氣迷人迷迭香蔬菜串燒

價錢︰$17/2人
需時︰10分鐘

鄰居出事想幫吓手但家人就想搬走?屋企有壓力;每年交一次稅都未夠遲啲日日交稅,銀包有壓力;上司諸多要求工作加完又加,打工有壓力;所以Ophelia話,呢個時候最好用迷迭香(Rosemary)作食材,因為迷迭香可助人於長久壓力下得到舒緩,又可增加思考力。

材料︰

薯仔1個、鮮冬菇4個、茄子1條、車厘茄1盒、迷迭香4束、有機豉油1.5湯匙、橄欖油1湯匙、香橙精華油2滴

茄子$4/斤(a)
車厘茄$13.9/250克(b)
甜橙精華油$86/10毫升(d)

簡易法

1.薯仔煮熟切粗粒,茄子切粒,車厘茄切半,鮮冬菇洗淨;
2.將4種材料穿在迷迭香葉枝上;
3.將橄欖油、精華油和迷迭香葉碎混和作汁,灑在串燒上;
4.橄欖油起鑊煎至微黃、淋上豉油即可。

貼士︰

先用竹籤在食材上拮開小孔,再穿迷迭香就會易啲。

鬆弛催眠香茅九層塔素肉湯麵

價錢︰$16/2人
需時︰10分鐘

英格蘭、巴西輪住出局嗰一晚,真係點都瞓唔到,輸波都算小事,我諗天水圍居民痛失至親的親友,可能晚晚徹夜難眠重難捱。想瞓得好,食少啲安眠藥,九層塔都可有鬆弛神經,使人容易入睡!

材料︰

麵條2束、素肉腸2安士、九層塔2束、日本米釀1湯匙、豉油2茶匙、香茅1支、麻油2茶匙、水2杯、鹽少許

九層塔$5/包(a)
接骨木花$44/1安士(d)

簡易法

1.煮麵條後過冷河備用;
2.熱水放酒、豉油、海鹽、麻油、香茅及素肉腸後即熄火,淋在麵上,加九層塔即成。

貼士︰

九層塔不應落鑊長煮,否則會走晒啲香味。

安神定驚有機士多啤梨雜菜沙律

價錢︰$30/2人
需時︰5分鐘

天水圍呢個高壓地帶,好多小朋友年紀輕輕就感受到永別的陰霾,九層塔除咗可以令人入眠,仲可以安神定驚,安撫脆弱心靈。莫講話細路,我前晚見到一班香港先生,見識過佢哋嘅鬼聲清唱,我都嚇咗一驚,即刻整番個九層塔沙律先得。

材料︰

有機沙律雜菜1包、士多啤梨10粒、九層塔1束、羅勒少許、有機蜜柑/檸檬/甜橙精華油2滴、橄欖油1湯匙、黑醋2湯匙

士多啤梨$22.9/250克(b)
羅勒$50/100克(c)
橄欖油$22.9/250毫升(b)

簡易法

1.雜菜、士多啤梨及羅勒洗淨瀝亁,羅勒摘葉與士多啤梨拌勻;
2.將精華油、橄欖油及黑醋混和,倒進士多啤梨雜菜中加九層塔中,翻勻即可。

貼士︰

凍食的橄欖油,最好用冷壓及不經高溫榨取的,冇高溫處理先保存到營養。

抗菌退燒芬芳純露薄荷梳打

價錢︰$20/2人
需時︰3分鐘

睇報紙先知,原來精神病患者,可能會因發高燒而得病,所以真係唔可以睇小發燒。Ophelia介紹接骨木花及部份純露可抗菌退燒功效。

材料︰

有機菩提花/橙花/香蜂草純露2茶匙、有氣礦泉水約2杯、薄荷葉2束、接骨木花1/2茶匙

有氣礦泉水$8.8/330毫升(b)
薄荷葉$25/100克(c)

簡易法

將薄荷葉洗淨瀝亁後,將純露、有氣礦泉水、接骨木花及薄荷葉等順序倒入杯中混合。

貼士︰

純露一定要係認證有機才可安心食用。

食得開心 紅藍莓乳酪

價錢︰$30/2人
需時︰5分鐘

天水圍嘅華女死亡日記,話自己冇屋,冇孩子;事事人比人,稍失信心好易諗埋一邊;玫瑰天竺葵精華油使人有安全感,加強與外界溝通信心,有溝通就有出路啦!

材料︰

青蘋果1個、紅莓或藍莓1盒、有機玫瑰天竺葵精華油2滴、純乳酪1杯、薄荷葉1束

紅莓$39.9/170克(b)
藍莓$20/250克(a)
天竺葵精華油$220/10毫升(d)

簡易法

1.青蘋果洗淨切粒,薄荷切碎;
2.將精華油和乳酪拌勻,混合青蘋果粒及莓,再放入薄荷碎即成。

貼士︰

想凍食都唔好雪太耐,最多15分鐘,過冷會好傷脾胃。

香薰油入口前要睇真

Ophelia有逾10年草本健康及美容顧問的經驗,有中醫營養學證書,𠵱家仲修讀草本學。佢最Enjoy用迷迭香煮餸,一邊煮一邊聞,香味直達腦神經情感區,香氣可以忘憂。

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載