蘋果日報 | APPLE DAILY
› 選擇地區
三藩市
紐約
洛杉磯
其他美國地區
2006年09月06日

大學生打躉之三:我寧願過南山邨搵食!

城大咁近又一城,大把好嘢食啦!的確係,不過好食就難免比較貴,平嘅就來來去去都係嗰幾間快餐店,所以城大會計系2年級生Bobo寧願行多兩步過南山邨搵食:「讀大學唔似讀中學,無可能餐餐返屋企食Lunch或者帶飯,不過餐餐出街食飯真係好貴㗎,所以我會幫襯價錢平質素又唔差嘅餐廳,日日捱快餐店好慘啫!」南山邨「品香樓」係佢心水推介,BoBo咁評:「新式茶餐廳,裝修比旺角嗰啲茶餐廳好得多,亁淨有冷氣坐得又舒服,邊度搵?」真係咁平靚正?「唔係賣廣告,呢度嘅午餐、下午茶、晚飯同消夜都好平,我多數食下午茶,因為好多時上完堂都過咗午飯時間,咪下午茶餐當午飯食囉,擺低$22有小食、大大碟炒粉麵飯,質素方面我覺得好穩定喎,味道同份量都畀滿分,從未試過唔滿意。」果然,下午茶時段餐廳照樣坐滿客,問番至知原來呢間已經係第二間分店,同總店只係相隔幾個舖位,老闆話因為實在太旺,所以要開多間喎。

記者:黃若茵 攝影:周旭文

XO醬金盞骨香雞$48

傳統做法起肉絲炒香,起肉後嘅雞骨就炸香,店方將炸雞骨改為炸雞翼,飽過齋𦧲雞骨。

生汁龍鳳球$48

師傅:「雞肉包住手打蝦膠,蝦膠加咗魚肉就更彈牙。」試過,有啲似食緊蝦餃,抵撐。

南乳炸豬手$38

Bobo:「咬落好腍一啲都唔韌。另附一碟南乳醬上碟,我鍾意濃味,蘸埋個醬南乳香味就更加重。」

品香樓(27788791) 
地址:石硤尾南山邨南豐樓210-213號平台

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載