› 選擇地區
三藩市
紐約
洛杉磯
其他美國地區
香港 台灣 北美
 
2006年10月30日

夫妻同心同煲之二:我老婆成日鼓勵我

■繁忙時,Allen做到身水身汗,真木子就會好溫柔咁幫佢抹汗。

「卡菲東西」喺西貢市中心一條巷仔入面嘅巷仔,要搵唔難,假日甚至要排隊,一來拉麵料靚,二來價錢唔貴,三來舖頭只得兩張枱。老闆Allen係香港人,太太大澤真木子係日本人,5年前開始做私房菜,Allen話:「以前香港甚少懷石料理,我哋係第一代,一年前左右我哋搬入舖,就開始做較大路嘅拉麵,𠵱家偶爾都會做私房菜,不過只做熟客。」有個日籍老婆撐腰,加上自己本身喜好研究日本飲食文化,做大眾化拉麵都好有料到,「用料好講究,譬如拉麵,我唔用九州嘅,因為唔夠煙韌,用北海道嘅就會彈牙啲。豬骨濃味湯底我會熬夠十個鐘,而且唔會用糖做甜味,而用水果,入口唔會有鬆散口感。」
做一碗拉麵都如此認真,可以話受老婆影響,「日本人做嘢好認真,因此我哋好少轉Menu,做一款新嘅菜式,我老婆要慢慢鑽研,做到最好先肯賣。」見餐廳舖頭地方細,兩公婆企喺入面做嘢都幾逼,會唔會成日爭位先?「都會㗎!但我哋結婚10年,好識得遷就對方!」二人唔只識得遷就,太太仲好識得鼓勵佢,「初初開舖,佢經常叫我唔好放棄,話我知剛開舖,未咁快有feedback,叫我對自己要有信心。𠵱家我哋愈做愈好,算係互相支持嘅成果。」
記者:黃若茵 攝影:黃子偉

九州豚肉濃湯拉麵$45

豬骨、黑豬肉都由日本入貨,熬過10個鐘嘅湯底果然好味,飲完都唔覺口渴,真係無味精。黑豬肉都要燜10個鐘,甜甜哋,好入味。

清酒煮蜆$25

Allen話酒一定唔可以跟蜆一齊煮,因為會令酒精揮發晒,浪費!「我會先將蜆煮熟,然後加入清酒,喺煲入面焗20秒,清酒就會好香。」

牛肉火鍋每位$68

牛肉選用上半部腩位,脂肪分布平均,湯底有淡淡幽香。最後送上一碗白飯,食晒火鍋料之後,將飯倒進鍋中,連湯一齊食,夠香濃。

卡菲東西(27920200)
地址:西貢敬民街9號高勝樓16舖地下

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載