› 選擇地區
三藩市
紐約
洛杉磯
其他美國地區
香港 台灣 北美
 
2006年11月26日

餚抵王:爭食鬥一番

西洋菜南街(太子段)向來多食肆,次次行過梗有一間新食店開張,但對於已經成為歌星的鄭希怡(Yumiko)和張致恒(Steven)來說,大搖大擺入街搵食都幾難喇!因俾人眼望望都食得唔自在。雖然今日攞正牌嚟掃食,但一個話要食壽司,一個要食咖喱,仲上演多場爭食戰!
記者︰方綺君
攝影︰伍慶泉
Yumiko化妝︰AndyLeung
髮型︰Moe@Chin.G
服裝提供︰bluedeep@zap

Steven首選甜味咖喱

Steven話:「我撐咖喱!因為有甜有辣,我鍾意食甜味嘅,因為可以留喺口腔長啲時間,慢慢感受吓嗰種香甜先吞落肚,又唔會辣親自己,食到滿頭大汗先至正。」講得有道理,有時食得太辣,條脷都辣到麻木,顧住飲水咖喱味都沖淡晒。「我次次見到『宝太郎』都想試,今日終於有機會喇。」宝太郎在日本好流行,有超過200多間專門店,當初的始創人吉野幸就以夫妻檔身份每日中午在貨車上賣咖喱飯盒。食得咁滋味,Steven仲八吓香港有無其他分店,負責人透露今年12月至明年1月就會喺機場有得食。

咖喱牛肉飯$43

宝太郎的招牌,Steven一路食一路讚全程無停口︰「牛腩夠腍又唔會煮到散晒,咖喱唔辣入口好香呀!」成個食家咁款。午市套餐仲抵食,$35有埋前菜、沙律、甜品和飲品。

鐵板燒廣島蠔蕎麥湯麵$48

全港獨有用麵豉和清湯煮蠔,師傅話麵豉和蠔的味道更配合,比用豉油佳,一啖麵豉湯一啖蠔肉,豐富的蠔味充滿整個口腔,麵豉味又唔會太重蓋過。

牛柳陶板燒$38

美國來的安格斯牛柳醃好後再上烤盤將外皮燒脆,再放上已燒紅的陶板燒,牛柳一咬多肉汁到漏出來咁滯,好Juicy。

咖喱包$43

咖喱包由日本空運到港,每日的供應有限,好似冬甩,有辣有唔辣選擇。Steven話︰「我鍾意佢唔辣的咖喱甜甜哋。」

食客有Say

陳小姐︰「我路過覺得幾特別所以入嚟食,咖喱淨係聞都已經好香濃,入口好滑。」

睇路搵食

宝太郎(23983848)
地址︰太子西洋菜南街234號地下
營業時間︰
星期日至四11:30am-12:00mn;
星期五及六11:30am-1:00am
座位︰約40個

Yumiko鰻魚要肉厚蟹子要腥甜

兩個人口味唔同,結果Steven先讓Yumiko食壽司,走入在西洋菜南街新開業不到一星期的「味壽司」,Yumiko話:「我最鍾意食鰻魚壽司,仲要係燒鰻魚,亦要大塊多燒汁,最好係河鰻㖭!」另外蟹膏壽司係Yumiko第二最愛,「可能好多人覺得腥,不過我就好欣賞甜甜哋嘅味道。其實我都鍾意蟹親子壽司,有肉、有子、有蟹膏,當然正啦!」Yumiko食壽司仲有一個習慣︰「好多人平日都會將Wasabi撈入豉油,但我會將Wasabi直接放喺壽司上面,再點豉油食,但一定係手磨Wasabi先好食。」

蟹親子壽司$28

一條條的賣相是撈了蟹膏的蟹肉,蟹膏預先放入適量的調味增加味道,再加上蟹子,Yumiko話︰「入口之後蟹味唔算濃郁,但創意度攞滿分,因為我喺出面未食過。」

味之戀壽司$24

師傅話:「呢款壽司係『花之戀』的變奏版,外層係採用牛油果和三文魚,份量夠多的蟹子,感覺上非常抵食,賣相攞滿分之餘,入口的新鮮程度亦不俗。」

(前)吞拿魚腩壽司$35
(後)燒鵝肝壽司$35

以火灼至7成熟的鵝肝加上少許的日葱同食,漏油的鵝肝加上攻鼻的葱味,感覺特別。吞拿魚腩入口即溶的口感,魚味停留在口腔久久不散。

火燄海饅壽司$20

海饅雖然無河饅肉質咁厚,不過入口感覺上比較少脂肪,用火灼一灼,再掃上鰻魚汁後就更加惹味。

食客有Say

劉小姐︰「我喺附近返工,新開張就入來試一試,款式都幾多。」

李小姐︰「環境OK,壽司選擇好多,好多喺出面都未試過。」

睇路搵食

味壽司(29803991)
地址︰太子西洋菜南街222號地下
營業時間︰11:30am-12:30mn
座位︰40個

南瓜薯餅夠香口

雖然西洋菜南街經常有新開的日本餐廳,但「極上」依然在此街屹立多年,全因食物的款式非常多,你睇菜牌貼到成個門口都係就知,3點又有超值$15的下午茶餐,夜晚7點至8點高峯時間仲要等位㖭!

(前)鐵板蒜香燒帶子$30
(後)豬頸肉西京燒$30

燒帶子有4隻,粒粒都肉厚又大粒,剛剛上鐵板時最好食,一隻放入口,外皮香又多汁。豬頸肉西京燒啲肉邊燒到燶燶哋又幾好食。

南瓜薯餅$28

南瓜加薯茸,入口仲有少許咖喱味,食得到濃濃的薯仔味,證明唔會粉多過薯仔,外亦炸得香脆。

睇路搵食

極上日本料理(27877748)
地址︰太子西洋菜南街200號地下
營業時間︰11:45am-1:30am
座位︰約50個

1.煮家廚房
2.極上
3.鉄板超
4.味壽司
5.宝太郎
6.別府
7.義順牛奶公司
8.北海道活壽司

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載