› 選擇地區
三藩市
紐約
洛杉磯
其他美國地區
香港 台灣 北美
 
2012年10月29日

食字部:染橙哈囉喂 型南把鬼火

仲有兩日,就係大家最愛整古作怪嘅萬聖節!看着一街南瓜鬼怪面譜,究竟係點解?相傳萬聖夜起源於愛爾蘭的塞爾特人傳統,因十月最後一天是夏終、冬來的重要標誌,此日又稱「死人之日」,會有各種惡鬼出沒遊走人世間,所以這一晚會格外危險;為嚇走惡鬼,塞爾特人會戴上恐怖面具,後來演變成時令最豐收的南瓜作面譜,放於門前嚇退惡鬼;我知大家間屋豆腐膶咁細,一定無碇擺南瓜,不如一口吃下去,應節得嚟又實際! 記者:朱崇德 攝影:潘志恆、蔡家輝、譚盈傑、朱崇德模特兒:Ruby

We 火燄南瓜

萬聖節!我知大家都想蒲老蘭,排四五粒鐘,仲要同一大班老外同國內遊客逼住飲酒!係有氣氛,不過真係攞苦嚟辛!尖東嘉芙,係呢兩年彈起嘅飲酒新潮聖地,最重要係一帶都係Young場,當晚扮鬼扮馬一定玩到癲!
話佢走得前唔係無原因,坐低,$880大酒、$220一Set啤酒,正路價、唔使驚第二朝起身頭痛!想點酒時,靚仔酒保Lego哥已經拎咗一盤Shooter過嚟:「試過一張刀(一副啤牌)玩四人鬥地主嘛?拎紅鬼、鑽石三係地主一方,餘下兩家是佃農;三條一炸、四條二炸、孖鬼三炸、飛機(兩個連着三條)四炸、連着兩個四條五炸……開局前打骰決定互換一至五張牌。」我都係常蒲吧之人,不過真係未知呢種玩法,當12炸!我同攝記每人六杯Shooter落肚之際,Lego哥再拎出將於萬聖節當天提供的特飲!
劈場好少玩Cocktail,不過We有點不同,靚仔到有點似當年後生版反町隆史嘅Lego,入行亦是一個傳奇:「第一份見水吧冲奶茶,點知竟然要我返夜晚,冲嘅第一杯變成係Long Island同Dry Martini!」不過佢師傅都話佢有調酒天份,出道幾年,就攞咗酒行私人舉辦嘅調酒師比賽冠軍:「每人只可飲一口已調好的Cocktail,你要喺幾十支酒度,搵出佢用咗邊幾支同正確份量,當日我係似100%完全同味取得冠軍!」唔講唔知,佢仲有一個睇人估酒嘅絕技:「一個好嘅調酒師,要平時留心客人點酒,例如愛飲百威會喜愛淡口味、嘉士伯喜愛重口味……知道佢啲口味,就可以調出啱佢嘅酒;雖知Classic如Dry Martini,只係由兩種主酒調成,不過份量比對,要看人的喜好同接受能力,而相對作出加減,所以每杯都有唔同!」

Dada Bar 嚇鬼Look

蒂樂文娜至Yeah嘅Dada Bar,萬聖節當日一樣有鬼聲鬼氣Cocktail特飲,雖然未有加入南瓜內,不過造型真係好鬼嚇人,以荔枝、藍莓做成眼球的Bloodshot Eyeball,再以草莓伏特加酒做成結冰的血漿;Chilling Night in Cemetery絕對是挑戰膽量之作,以紅莓絲放杯面做成一條條的血蟲子,再在Vodka酒底下加入大量碎冰,令你極度心寒;及以蘋果做鬼爪作點綴的Devil's Stick;不過講到恐怖指數最高的,係以香桃烈酒作底,再以針筒唧成大腦狀的Floating Brain,喝下來雖知只是咖啡甜酒,不過相當形神俱似,唔止考你膽量,亦是酒保考牌之作。

The Backyard 急救甜血漿

講香港夜蒲點!又點少得旺角先?不過旺角一帶酒吧多為劈場,好多人會留意喺朗豪酒店L樓層——The Backyard,鬧市半空的空中花園、近百座位的藤織梳化,在半露天的巨傘下,吹着夜風的清凉,這種清靜閒適感,還是身處旺角嗎?在這裏坐鎮的,是旺角朗豪酒店首席調酒師Jackie,佢剛以香港代表身份,出席北京世界性調酒師比賽!論創意同玩味性,係絕對的震撼!
「10月31日當夜,我哋做咗兩杯Halloween特色雞尾酒!味道會帶少少甜,想大家甜蜜蜜感受節日氣氛!」至於這裏嘅特飲,只會招待提早訂位的人士(需要在訂座時講清楚想要邊杯),一句!早訂早享受!

FINDS 嚐北歐濃湯

在蒂樂文娜另一間餐廳FINDS,可找到了一個北歐森林的萬聖節,天花的一坑坑木排,營造出北歐樹林的幻象,變色的LED吧台,更添奇幻的色彩,主理該店的行政總廚Jaakko,是100%的芬蘭人,放在桌面的,是一碟特製巫婆湯:「其實北歐人,對萬聖節感覺比較淡,不如歐洲其他國家般狂熱!」不過問起雕南瓜,Jaakko都笑笑口,話年年都有整,而且仲將之名為Pumpkin Party:「去年我就同30多個朋友一齊玩雕南瓜,一杯酒、一張刀!說說笑笑玩玩,原本一個多小時可完成的南瓜雕刻作品,最後五、六個鐘先完成!」其實Jaakko是雕南瓜高手,雖然今次訪問未見其大作,但如果31號晚大家出席佢個「FINDS萬聖節套餐」,大家或者可一見其手筆。
萬聖節當日提供的套餐分為三道菜($398)及四道菜($468)兩種選擇,而且好多都十分應節地以南瓜入饌,而且飯後還有餘興節目,就係大家可到樓上的Dada Bar享用免費的Vampire's Blood Shooter、Spirit的Live Band及萬聖節化妝服務!絕對係有得食、有得玩之好地方!

巫婆湯

入口比吃上原件南瓜更鮮美,原來南瓜先焦烤才打成湯,所以焦香味特別濃烈!不過此湯聰明之處,係將之打成泡沫狀,入口輕盈而舒服。

FINDS萬聖節套餐

三道菜$398/c
四道菜$468/c

熊場 日食忽然染橙

呢排喺尖東放題界彈起嘅熊場,雖然日日排晒隊,估唔到萬聖節都會玩吓嘢!老老實實,玩日式放題嘅,好多都用平嘢作招徠,要做特別萬聖節特色大餐,會加大好多Workload,所以好多人都唔肯,大廚龍哥話:「正如我哋之前玩踢爆其他平價場,好多場以鱸代鱲、以鱆紅代油甘一樣,我哋係真係好有Heart為大家服務!」餐廳一直以魚生作主打,壽司、刺身種類超過五十多種,出名以鮮魚同真魚作放題,不過講到最舒服,都係佢坐到廿多人的大陽台,以環境嚟計,真係唔太多香港放題場有咁好環境!
不過佢哋個萬聖節大餐都好特別,要喺萬聖節當日晚上十點過後先有得食!「其實好簡單,就係將原本嘅放題食品,變成為南瓜變種食物!」據知佢哋現時只公開五種,如果你去到,可能隨時加碼!「例如我哋做的海鮮粥,就改為魔爪南瓜粥,到上枱時,大家忽然見到碗粥變成好橙色,應該會幾驚訝!」天婦羅、沙律、壽司卷都會玩晒南瓜特色,不過最特別都係佢個南瓜冷麪,由平時的稻庭烏冬突然變橙:「其實是特別訂製的南瓜手拉麪,平時香港比較少見,要從日本特別訂製!」不過我覺得最重要係,十點過後消夜時段,係全晚收費最平$168:「食飽飽!樓下就係赫德道酒吧街,繼續狂歡Fever過萬聖節就啱晒!」

萬聖節放題

成人$168/f、小童及長者$128/f

日本南瓜最清甜

現時香港市面,主要可以買到三款南瓜!大家最易認應該係《哈利波特》中經常登場的橙色南瓜(有人叫番瓜)!不過佢嘅味道比較淡而寡口,外國人喜愛將之作雕刻或作南瓜批!如果你諗住今年都雕番個,記住雕完後的三兩日後最好食咗佢,咁樣就唔浪費啦!
至於扁身、翠綠的,是日本南瓜,味道清甜,而且皮薄又滑嫩,係作天婦羅的首選!不過現時國內及台灣都開始種植,如果想分真假,是否來自日本,只要你破開個瓜,見到綠色的皮只有幾毫米超薄的話,先係真貨;如果買咗返去先知俾人呃咗,我都幫你唔到,只好叫你下次唔好幫襯!
至於欖形的,則是台灣南瓜,不過是當地的本土貨,據知先前兩種都是地上種植,所以較肥大;至於這種台灣南瓜,由於是樹上熟的,所以地少亦可以種很多,價格會比較平,而味道只屬一般般,界乎日本南瓜與番瓜之間,而且皮特厚,肉身較淺薄。

青瓜練雕功

南瓜動輒上百元一個,如果第一次雕就用佢,雕錯了成本風險太高,其實如果想練習嘅話,可以先從青瓜或意大利瓜着手,因為它們較軟身,比較容易落刀及易於控制!另外Jaakko亦提提大家,雕瓜果是由內而外的,外皮線條固然重要,如果想放蠟燭的話,中間果肉部份都要偷空多啲位,那樣會加大透光能力,南瓜燈籠會更靚。

彩繪南瓜唔使煩

如果自問並非手作之達人,咁大家唔好浪費時間,走一轉city'super啦!佢除咗有一般大南瓜賣,佢仲有一啲細細個的南瓜仔,在上面已經畫有公仔面譜,想應節?真係唔難囉!不過咁,手工嘅就一定貴,$96個彩繪南瓜,同普通一個$98大南瓜,價錢相若,但尺寸係加大碼及加細碼之比,繁忙嘅香港人,有時為方便係要使啲錢喇!

Trick-or-treat 今年興買餅

萬聖夜另一主要活動就係Trick-or-treat!雖然香港小朋友比較少玩,但外國嘅小孩會裝扮成各種恐怖鬼樣,逐家逐戶按鄰居門鈴,大叫「Trick-or-treat!」當然醒目嘅,呢一日大家都會入定啲糖果孝敬呢啲大老爺,否則臭雞蛋侍候!今年南瓜造型糖果有好多,但如果你想搵真南瓜味嘅糖你就可以死咗條心。大膽講句,普遍主流超市,我連南瓜汁都買唔到,不過今年好似出多了南瓜形曲奇餅,食落無糖果般膩味,係糖果嘅另一選擇。

鬼怪萬聖節食品精選

Finger Food in Blood $88/c

a. We(2311 9611)
尖沙嘴漆咸道南53-55號嘉芙中心六樓

b. The Backyard(3552 3250)
旺角上海街555號旺角朗豪酒店L樓層

c. 蒂樂文娜(3763 8888)
尖沙嘴金巴利道39號

d. 一田(2694 1111)
沙田新城市廣場三期二樓及三樓

e. city'super(2375 8222)
尖沙嘴海港城三樓

f. 熊場(3100 0004)
尖沙嘴赫德道四號THE HART二樓

g. 海洋公園(3923 2323)
香港仔黃竹坑道180號

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載