› 選擇地區
三藩市
紐約
洛杉磯
其他美國地區
香港 台灣 北美
 
2016年07月28日

【飲食籽】上環打工仔糧尾平嘆 $15一籠蝦餃

【飲食籽:搵食地圖】
作為一個有要求的打工仔,糧尾想食好些都好合理,但若果在中上環等平均消費偏高的地區上班,莫講話找間平平地的餐廳有困難,行慢一步的話,分分鐘「一位難求」。這次找來在上環上班的打工仔帶路搵食,原來他閒時會搭電車於上環西環兩邊走,只為食到一餐飽肚又好食的午餐。

相關新聞:【糧尾平嘆】正宗喇沙$70有找 加$3嘆解暑三酸特飲

手做點心 茶位三蚊

上環商廈林立,林澤熹(Jacky)就在其中一棟鄰近西港城的商廈裏任職客戶服務員,有時他會坐兩個站電車到西環搵食。「平時糧尾手緊,都係求其一餐就算,不過有時又想食得特色一啲,就會過西環。」Jacky邊說着,邊領我到一間有幾十年歷史的老茶居。
甫坐下開了壺濃普洱,Jacky就走到蒸籠那邊,親自選擇點心,「有冇馬拉糕呀?要多一籠雞球大包!」只見Jacky兩三下手勢已捧着一籠兩籠回來開餐。平時他跟同事來飲茶,都習慣每人選兩款點心一齊分享,這裏一籠點心大多數只是$15,「你平時去酒樓,叫籠蝦餃都收你廿幾蚊,呢度15蚊四粒,質素又唔係差,外面真係搵唔到。」這裏的點心是全人手製作,師傅每日凌晨開工,早上五時就開門做生意,熟客多數都是晨運的公公婆婆,所以茶錢也只收三元,絕對是街坊價,不過每日只開到下午兩時半,遲來的話,隨時沒點心食。

相關新聞:【飲食籽】中上環不同budget推介 食盡中西日

叁去壹點心粉麵飯
西環薄扶林道11號

羊肉搶湯 特色粉麵

另一家位於畢街的山東菜館,也是Jacky的糧尾救星。多數人糧尾都會選擇食粉麵,因為價錢實惠又飽肚,但食得多總會厭。「如果四十幾蚊預算,其實可以嚟呢度,因為佢嘅麵比較有特色。」Jacky推介的這間餐廳店面不大、裝潢簡潔,卻是附近打工仔的心水食堂,皆因這裏無論小炒、粉麵都很有地道山西風味。
例如羊肉搶湯麵就是誠意之作,先將羊肉和香芹等配料快炒爆香,再開湯煮麵,羊肉油份逼入湯頭,麵條掛湯又彈牙,非常好吃;嫰雞煨麵以牛奶高湯煮製,麵條充份吸收湯汁,喜歡軟腍口感的人可以一試。羊肉餃亦是外間少見,一口咬下,混合了京葱的肉汁隨即濺出,「四十幾蚊雖然唔算超級抵,但糧尾三、四十蚊一餐,對我嚟講都可以接受,偶然都要轉下口味啦!」的確,糧尾也不能太虧待自己,只是多給幾元,就可以食到比較有特色的粉麵,當然要試一試。

好客山東
上環畢街17號地下

記者:黃子卓
攝影:潘志恆、徐振國、陳永威、許先煜
編輯:周頌文
美術:孔文彬

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載