› 選擇地區
三藩市
紐約
洛杉磯
其他美國地區
香港 台灣 北美
 
2017年03月10日

【慈雲山小店】長期請唔到人 老闆娘自責忙到脾氣差

喺香港地食嘢,又要便宜又要好味,還要求服務良好?此類小店當然有!不過是否員工好聲好氣,稱呼你靚仔靚女才算得上是好服務呢?有時候地區小店的粗聲粗氣可能有另一番風味。記者特意到訪有「慈雲山惡人谷」之稱的阿肥越式美食,看看為甚麼網民指「唔准催」、「黑面」的小店,是否「越俾人鬧越要嚟食,莫非又是一間隱世美食?

記者在12點正到埗,已經看見人龍不絕,大部份也是學生,似乎是學生飯堂。立即找位剛剛吃飽的學生問問有冇俾人鬧先,吳同學:「啱啱俾人鬧完,因為我嗌檬粉,佢畀咗河粉我,我話要換反而呼喝我!」但吳同學指其實小時候曾光顧被鬧,已經知道服務如何所以亦無懼下次再光顧。董同學和林同學:「啱啱俾人鬧飲熱飲,我哋食完飯飲品未到,追反而鬧番我哋。」不過兩位同學均表示不介意。

輪到記者實試了,在十分繁忙的時刻,記者詢問兩位的等候時間,店方霸氣回覆:「我都唔知道等幾耐!有人企起身,你咪有位囉。」記者乖乖在一旁等候,未幾店主指若不怕凍,主動提議幫我加枱在店外,令人感到十分窩心。

記者看了大約5分鐘餐牌,店員亦沒有催促落單,與澳牛的即坐即叫服務方式截然不同。

網上評論大多指,因為顧客點菜速度慢,又提出額外要求,就會被罵,記者與攝影記者故意拖慢速度,點了一個沙嗲香茅牛肉飯連飲品,盛惠40元,價錢相宜,記者要求多葱、汁另上、飲品少甜和少冰等要求。店員就一言不發默默寫單,沒回應便霸氣離開。餐點甫上枱,記者鬆一口氣,所有要求均做到亦沒有被罵,而且份量十分足夠,牛肉塊鋪滿飯而且沙嗲汁香濃帶微辣,味道不俗,即點即炸的豬扒飯也是招牌之一,附上的青葱經滾油浸泡,撈飯一流。

記者更觀察到,老闆娘對學生哥的窩心服務,剛才面無表情的員工竟然熟知馮同學胃口大,主動幫他加飯。馮同學:「有時佢哋對長輩好照顧,佢哋嘅惡可能係比較大聲,係佢哋嘅溝通方式,亦係呢度嘅嗌嘢食方式。」

最後記者鼓起勇氣,在實試後表明身份,找老闆娘回應惡店傳聞,老闆娘何金鳳(大鳳姐)直言:「我哋有時真係好惡,我自己都知,但有咁多嘢做,又長期請唔到人……」當記者追問是否因為客人做了甚麼過份行為令她發火?大鳳姐:「其實唔關客人事,人哋開開心心嚟食飯冇乜嘢嘅,都係怪自己控制唔到脾氣!」意想不到老闆娘完全沒投訴客人,反而把責任攬上身。她指店舖做到不停手,現時請人很困難,搞到自己很多病痛,做到身體也勞損,所以脾氣會差一點,但亦感激一班街坊仍繼續受她氣支持她的出品。

記者:吳業紅
攝影:梁志永

2017果籽繼續認真知味。識買惜用。行以求知。好事多為。重修舊好。
緊貼果籽報道,即like: http://fb.me/AS.AppleDaily

相關新聞:【中環人龍店】唔准加單番茄麵店 「我哋好寸?唔使平反!」

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載