› 選擇地區
三藩市
紐約
洛杉磯
其他美國地區
香港 台灣 北美
 
2017年04月12日

【飲食籽】$45龍躉碟頭飯 邪惡炸雞髀人面咁大

【飲食籽:隱世小店】
位於油麻地內街,有一間隱世小店,名字叫「和順記」,開業約半年。舖位一直是死舖,人迹罕至,十年內便轉手五次以上,偏偏老闆黎俊豪自信十足,他說:「如果食物好,用心去做,就算在屏山或者偏僻地方,都會有人山長水遠搵到去食,若食物不好食,就算開在地鐵站門口,搵鬼去食!」他又說:「見到每間茶餐廳,一律賣星洲炒米、乾炒牛河,如果跟住做,我都會悶,跟人跟到足,不如唔好開,唔係就聽執!」他深信有麝自然香。

剛認識豪哥,或者會覺得他好寸。只有幾張枱,舖頭開朝七午四,菜式經常沽清,主打8至10款碟頭飯,其中招牌寫着「精選高級食府套餐」,價錢約$40。「龍躉賣$45想點啊!不如你去酒樓食,如果嫌三嫌四,你不要來吃啦!」、「我賣的特大雞髀,比你塊臉還要大!油麻地街坊,像果欄工人一吃雞髀便會想起我,我相信未必是全港最好,但會是油麻地最好吃的雞髀。」
今年38歲的豪哥,做過設計師又做過解款車主任,半年前用40萬元開店。店內主打肉類以韓式醃法。「雞髀用美國貨,用果酸將菠蘿水果做成一個汁去醃,肉質會較嫩滑,每次醃雞髀都要三小時,所以是限量供應。由於人手不夠,加上即叫即炸,想食便要等十多分鐘,但食落就知保留到豐滿肉汁,因為功夫多,所以提早關門做預備。」他說:「好食的東西是要等,你可以吃速度,但只是微波爐加工食物,你要選擇快或者好食,你自己揀啦!」他還自創避風塘炒豬扒飯、瑞士雞翼飯,絕不是一般碟頭飯可比。

和順記
油麻地碧街24號地舖

記者:何嘉茵
攝影:潘志恆
編輯:蕭家慧
美術:利英豪

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載