蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年05月16日
馬上成為壹會員

【飲食籽】佐敦食光速餐 俄仔帶妹做個香港人

【飲食籽:瘋狂食事】
俄國靚仔Artem Ansheles在香港住了四年,操得一口流利廣東話,在Viu TV任主持外,上月和媽媽試涼茶的短片進一步爆紅。最近,15歲的妹妹Ayla來港探望哥哥,Ansheles 帶妹妹體驗香港兩大奇景——光速餐和逼地鐵。

相關新聞:【飲食籽】俄仔六點半金鐘逼地鐵 人逼人阿妹拖到實

「香港人真的很愛排隊!」Ansheles說。曾有網上潮文說,香港有四大奇景美食,如果你未食過不算是香港人。當中提及光速餐代表,一定是佐敦澳洲牛奶公司。中午一時,門口已站滿廿多人。「你幾多位?3位?2位?」夥計像發號司令的將軍般有威嚴。等了6分鐘左右,下一轉就輪到我們,夥計安排了卡座給我們一行四人,Ansheles個子高,一坐下去便和妹妹膊頭貼膊頭,「呢度真係好逼,唔知點樣食嘢!」他不小心將茶倒瀉,夥計迅速清理現場,卻不忘幽他一默,「咁大個仲玩水!」不懂看中文的他,便嘗試用英文問夥計拿英文餐牌,豈料,「我認得你!你識中文啦,唔好扮嘢啊!」夥計笑說。(澳牛夥計竟然會笑!)

靚仔大晒? 澳牛夥計親切招待

兩兄妹叫了兩個茶餐,有多士炒蛋火腿及火腿意粉,他們最喜歡炒蛋,將蛋夾在多士食。「這個好好味,明白點解有這麼多人排隊,不過我自己來食就唔會排,太多人了。」席間,Ansheles有朋友來找他,希望夥計可以幫他留位,夥計聽後便半開笑說︰「係好好朋友定唔好朋友?你朋友,即是我哋嘅朋友,佢幾時到?如果佢唔嚟,我就坐低啦!」夥計對兄妹倆說的精警金句還有︰「你去男廁定女廁?男廁喺嗰邊,女廁我可以帶你去。」、「我想同你影張相,但我未梳頭,你有冇gel?我想整整個頭。」澳牛夥計的親切友善,令我蔚為奇觀!吃了20分鐘便急急腳埋單。Ansheles說︰「我都希望佢對我惡啲,點知佢哋太好人。出街食飯最緊要係食物質素,所以坐得逼啲,就算態度差都唔緊要,呢個地方一定唔係俾你hea嘅!」Ayla則說:「食物好好,原本以為佢哋好惡,點知原來服務都唔錯。」

記者:何嘉茵、張佩君
攝影:鄧鴻欣、徐振國
編輯︰譚寶君
美術︰黃創泰

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載