› 選擇地區
三藩市
紐約
洛杉磯
其他美國地區
香港 台灣 北美
 
2017年09月22日

【飲食籽】深水埗長龍車仔麵 日賣千碗靠乜?

【飲食籽:識飲惜食】
「這期它是整個深水埗的大紅人,一條街有3間舖,3間舖都要排隊,好厲害!好厲害!」「長發麵家」負責人馬少康說的是「文記車仔麵」,老闆原在白田邨賣車仔麵,又開過茶記。結業後,轉戰深水埗最旺的街道——福榮街,這是一條有名食街,毗鄰兩大電腦商場黃金高登,蝦子麵「劉森記」、豬膶麵「維記」均是競爭對手。文記車仔麵在這條街有3間舖,其中一間更是相連舖,各有40個座位,每日各賣千碗麵。門口經常排着長長人龍,究竟有甚麼策略呢?

相關新聞:【飲食籽】車仔麵店70款餸任揀 必食瑞士雞翼豬大腸

文記車仔麵黃老闆向來低調,從不接受訪問,今次得長發麵家馬老闆介紹,才成功訪問。「我賺幾多?不要說了,唔想其他人覺得我招積,你寫賣約千碗啦!差不多是這個數。」聽到馬老闆形容他很「紅」,便哈哈大笑,「我不是很紅,十億米線才是成功,我們這些不算成功。」

他原在白田邨賣車仔麵,6年前在深水埗開店,輾轉在這條百呎街開了3間舖,最近更花百萬裝修總店。「我本身有兩間舖,人龍排到好長,見到啲客都覺得好慘,要排半小時以上。唔想他們排到身水身汗,本身食嘢應該是開心事。眼見人龍排到隔籬舖,我又不想影響別人做生意。碰巧隔籬有空位,便租了舖位以紓緩人龍。」3間舖現在各自日賣約千碗,月賺6位數字,「今時今日一碗車仔麵賣10元,賺到5至6元左右,如果計埋其他開支,應該都有一半。」在深水埗開車仔麵舖的,至少有廿間,要突圍而出,有何策略?策略有三——包攬老中青食客、款式多又冷門、即叫即製。

「舊舖(總店)的賣點是客人自選食物。客人叫大腸時,有些喜歡肥腸,有些喜歡瘦腸,各有不同。喜歡那條指那條,選自己喜歡的食物,這樣會開心好多。」總店最近花了百萬裝修,換了冷氣和水渠,卻刻意維持舊有格局,如圓桌子。客人在門口麵檔柯打完食物後,便自動埋位。較多老街坊幫襯,「好多舊客人都喜歡這種柯打形式,如果轉了形式,裝修得太靚反而不喜歡。」另外兩間則用了日式裝修,雖打着文記招牌,卻是截然不同的路線,「時代變了,好多年輕人喜歡新的模式,如可以點餐牌去食、不需等太耐、講求私隱度。長直桌私隱度高,不會有人搭桌。」兩間分店各有40個座位,但相對坐得較擠迫。

「這裏生意好好,做到無停手。(每日賣幾碗?)無數過,真的無數過,不停做,不停做。」員工阿金說。黃老闆表示,「有單我們即刻做,基本上3至5分鐘已經完成。食物要即來即做,魚肉刮定一大堆是不好食的,所以一定是即叫即製。」舖頭收凌晨四時,連備料製作,舖頭近乎24小時營運,「這條街只有我是開到最夜,分兩更半運作,嚴格來說是三更制,有長有短。」不過,生意做得大,亦引得其他人模仿,「會被人老翻,裝修形式、餐牌相似,有些朋友問你在哪邊開分店嗎?我說不是開分店,餐牌和我們賣的食物,價錢有99%相似。」文記車仔麵黃老闆說只要用心做保持水準,相信街坊會繼續支持。

文記車仔麵總店
深水埗福榮街121號地下

記者:何嘉茵
攝影:伍慶泉、梁志永、劉永發
編輯:翟純恩

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載