› 選擇地區
三藩市
紐約
洛杉磯
其他美國地區
香港 台灣 北美
 
2017年10月27日

【飲食籽】深水埗15蚊燒味飯盒 好老闆:份量一定要食得飽

【飲食籽:識飲惜食】
「單拼、雙拼一律十五蚊一盒。」在深水埗基隆街傳來一陣陣叫賣聲,記者驀然回首,赫然發現長長的人龍。「我嚟買飯,有叉燒、有雞、有鴨,買兩盒飯,(點解會排隊買?)啱食同價錢非常大眾化,(點抵法?)十五蚊一盒。」正準備拿飯的街坊陳先生向記者表示其排隊原因。

深水埗,是一個香港最多基層市民的社區,在八月尾,基隆街一家新開張的燒味店「朗益燒味工房」,為深水埗基層市民傳來福音,推出抗通脹價:不論單拼或雙拼,劃一價十五蚊一盒燒味飯。
十五蚊一盒飯,對於基層市民來說,絕對是一大喜訊,但對於一般市民,一定會聯想到將貨就價等問題,經記者多番試食,發現其「抗通脹飯盒」相當足料及有質素,絕不是「唔夠餸飯」,燒味店負責人方師傅及馮小姐表示只是跟足老闆的宗旨:「令客人食得開心,一定要夠餸食飯」來做事。

「有冇錢賺㗎?」 店長反對變支持

方師傅是該燒味店的廚房部負責人,負責監督廚房部的所有出品及店舖日常運作,他表示,推出十五蚊一盒飯是老闆的意思,自己曾經反對,認為賺不了錢,會損害店舖利益,不過老闆堅持,並以道理說服他:「『希望幫到街坊,錢唔係話要賺到盡嘅,呢邊基層又比較多,同埋希望客人可以對我哋有歸屬感。』(點解起初反對十五蚊飯盒?)在員工角度嚟講,梗係會諗有冇錢賺啦,如果老闆冇錢賺,咁我哋可能連打賞都冇呀。」
朗益燒味工房是元朗利興燒味集團第一間九龍區的分店。利興燒味在元朗各分店均有推出十五蚊飯盒,並曾在金融海嘯期間推出八蚊一盒飯,但朗益燒味工房跟在元朗區分店的管理方式有別,老闆不會親自主理朗益,而將管理職責全權交給兩位店長:方師傅及馮小姐,兩位店長變相也被視作半個老闆。
曾於大集團工作的方師傅形容,跟現在的老闆工作比以往好得多,「待遇方面,呢個老闆比我在大集團工作時更好,又沒有集團的政策綑綁,直接跟老闆工作我更喜歡,佢會知道我點樣辛苦、點樣賣力,唔使我用把口講,直接跟老細做嘢,優點係你功夫夠嘅,老闆梗係會對你升職加薪啦,但缺點就係,冇得蛇王囉,哈哈。」
雖然自己一日工作最少十二個鐘,並由開業至今也未曾放過假,但方師傅表示自己不是最辛苦,最辛苦的是早早在排隊、準備買飯盒的市民,「啲公公婆婆、幫襯我哋嘅客人好辛苦啊,因為條行人路又比較逼、又窄,有時又落雨,排隊時又唔可以阻到隔籬啲舖頭,如果唔係又會過嚟鬧我哋。」

長者基層客人多 唔夠錢可賒數

另一樓面部店長馮小姐同樣是從大集團轉到朗益燒味工房工作,她說起初確是不太習慣,後來發現無論老闆、同事或食客,都比以往有更濃厚的人情味,「那時候心理上非常掙扎,因為我之前在中環比較高檔次的餐廳工作,「那時候心理上非常掙扎,因為我之前在中環比較高檔次的餐廳工作,呢家就在深水埗這個比較多基層市民的地方工作,感覺比較低檔次,但做落,同事們好醒目,又好快上手,真係卧虎藏龍,一點就明,唔使我點樣操心;方師傅又好隨和,老闆對夥計又好,我估唔到深水埗嘅客人個個都會唔該前唔該後,好有禮貌,做落好開心,所以我想長做。」
她憶述,在深水埗工作讓她遇到從未遇過的事:「每日都有一個執紙皮的伯伯,佢自己會帶住個不銹鋼兜嚟買飯,份量比飯盒更大,我哋見到呢個情況,都會吩咐師傅斬啲雞胸位或者髀位佢食,見到佢我都會想幫吓佢,畀啲好嘢佢食;另外,有時斬料都遇過有客人唔夠錢要賒數,我哋都俾佢先,等佢轉頭先返嚟畀錢,咁有啲人會返嚟畀錢,有啲就唔返嚟走數。」
不只是方師傅,馮小姐起初也對老闆推出十五蚊飯盒提出反對,「我同方師傅起初都反對老闆呢個做法,因為十五蚊盒飯根本冇錢賺,計算所有成本後,根本冇得賺,所以我哋曾向老闆提出要賣十九蚊一盒先有得賺,但老闆堅持賣十五蚊,仲吩咐我哋,飯一定要足,份量一定要夠,要確保長者同市民一定夠食,並且食得飽,老闆仲同我哋講,畀人食之前,一定要過到自己,先可以出街畀人食。」她更形容,從未見過一位老闆會主動幫員工斬料畀客人,非常親力親為,值得繼續為他工作。
無論遇上怎樣的情況,方師傅和馮小姐都會緊守老闆的宗旨,「幫助市民,畀飯畀人時,要問自己食唔食得夠飽,先賣出去。」

朗益燒味工房
深水埗基隆街363-365號B舖

採訪:嘿文
攝影:伍慶泉
編輯:陳慧玲

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載