› 選擇地區
三藩市
紐約
洛杉磯
其他美國地區
香港 台灣 北美
 
2018年04月21日

【深水埗掃街】大大兜刺身丼$43+香脆牛肉意粉$28

話說某日下午,我們一家三口走到深水埗南昌街一間門口掛滿餐紙的小店「農家意粉農家妹」,老婆阿太停下腳步說:「嘩!$28可以食到牛脷,6安士碎牛肉漢堡意粉,外賣又係$28咋喎。」兒子SY指:「跟意粉先係$28,改飯要加$2」我:「呢個價錢已經超無敵啦。」

入內,坐下,店員:「熱咖啡、熱茶免費嘅,你自己出去斟就得。」我:「嘩!咁嘅價錢仲送嘢飲,真係無得輸。」牛脷意粉上枱,煮得軟又入味,阿太:「估唔到$28都切得好厚,好食喎。」6安士牛肉碎意粉出場了,同樣很不錯,外層煎得十分香脆,SY已急不及待不停吃,又說:「喺呢度食要$38,下次外賣返屋企食平$10。」原來小朋友也遺傳了我的慳家基因。

吃過意粉,我們散步至白楊街「荳蔻年華」吃糖水,阿太:「吓?呢間我十年前已經食喎,當年只有豆腐花賣,原來今日多咗咁多糖水食。」店員:「係呀!因為想畀多啲選擇大家囉。」這裏的豆腐花凍$9,熱$7,我最愛的番薯糖水也只售$13,一碗有六大片番薯,而且很濃薑味,非常合我口胃。阿太點了海帶出殼綠豆糖水,我偷食了兩口:「啲綠豆直情煲到變蓉呀。」最後我還表演了還原芝麻卷($5)給SY看,SY非常緊張的看着我說:「點解你唔畀我還原呀……我都想試、我都想食菲林呀……」

吃罷糖水,我們又轉場,走到基隆街「海怪活鮮刺身專門店」吃刺身。SY問:「爸爸,點解我哋要坐正喺海鮮舖門口食壽司?」我笑笑口答:「因為坐門口免加一,坐樓上要加一呀。」今日我自選了5款壽司,分別為油甘魚($9)、劍魚腩($8)、日本帶子($18)、鯛魚($5)同三文魚($5)。我說:「帶子很肥美,不過都不及劍魚腩好食,可惜唔知點解油甘魚帶少少筋。」蟹籽沙律被端上枱的一刻,我有點喜出望外說:「超大碗!我無諗過咁大碗喎。」阿太今日吃魚生角切飯($43),這個真的無敵,因為碗內有超過5款魚的壽司,而且份量多得很,阿太:「我呢碗角切飯抵過你碟壽司,超足料,又甜又鮮,真係抵。」

a.農家意粉農家妹
深水埗南昌街81號地下

b.荳蔻年華
太子白楊街1A3號地下

c.海怪活鮮刺身專門店
太子基隆街62號地舖

採訪、攝影、剪接:大仁@大仁生活

全新旅遊專頁,即like籽想旅行: https://fb.com/travel.appleseed

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載