› 選擇地區
三藩市
紐約
洛杉磯
其他美國地區
香港 台灣 北美
 
2018年05月06日

【好味飯堂】平食西九龍中心 $30海南雞+$39煲仔飯+$50羊架

當兒子SY說:「我想食卡邦尼意粉。」而老婆阿太又話:「媖?我想食海南雞飯喎。」偏偏我又想吃煲仔飯時,Food Court真的如同救世主,今晚就走到屋企附近的深水埗西九龍中心美食廣場,一次過滿足一家三口的三個願望。

時間為晚上7時40分,我們從遠處已經看到「水門泰式海南雞飯專門店」有條長長人龍,SY見狀即時跑到龍尾。很幸運,我們買到最後一份海南雞飯餐,本來我們想轉雞髀、加雞飯卷及梳打特飲,可惜全部售罄,老闆說:「可能你哋聽晚早啲嚟好啲。」雖然雞飯不是黃色油飯,但暖笠笠的油飯一樣有雞香,阿太:「雞好滑好好食呀,自家炮製嗰隻酸辣汁仲正,一啖雞一啖飯,真係超滿足。」

我幫襯「煲煲好」,靚雞臘腸煲仔飯餐只需$39,有湯有菜,絕對平通油尖旺深長荔,因為即叫即煲,所以最少要等10分鐘,唯一有少少不習慣就是食煲仔飯不是由我自己開蓋吧。SY:「爸爸!我幫你砌番一條臘腸出嚟啦。」煲仔飯有大半條臘腸,算很不錯吧,雞件數量也不少,建議可以不用放太多豉油,因為雞本身夠味,足夠餸飯了。愛吃飯焦的朋友一定很高興,因為煲底有一整塊飯焦可以撕出來吃,從未品嚐過飯焦的SY咬了一口便說:「好硬。」我只能說一句:「少年……飯焦就是要吃箇中的硬及脆卜卜吧。」

卡邦尼控SY幫襯「K&J」,對於$30有一大碟卡邦尼闊條麵,他難以置信:「最衰係意粉賣晒,不過如果佢再畀多啲卡邦尼汁我就更加好,唔係好夠喉。」而我另外又多點了一份香煎羊架餐,三大件羊架配意粉,附送忌廉湯$50,如果羊架再煎耐一點,表皮再香脆一點更佳,不過羊架醃得很入味又唔羶,不錯!

a.水門泰式海南雞飯專門店
深水埗西九龍中心8樓美食廣場55號舖

b.煲煲好
深水埗西九龍中心8樓美食廣場803-806舖

c.K&J
深水埗西九龍中心8樓美食廣場839舖

採訪、攝影、剪接:大仁@大仁生活

全新旅遊專頁,即like籽想旅行: https://fb.com/travel.appleseed

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載