› 選擇地區
三藩市
紐約
洛杉磯
其他美國地區
香港 台灣 北美
 
2011年07月26日

夏日消暑1:美臀溜冰 10分鐘速成飛機

大暑都過埋,想唔認夏天到咗都唔得!日日太陽好似火爐係咁燒,想做戶外活動嘅心情都熔化埋,都係搵個地方避吓暑最實際!凉浸浸嘅冰場就係唔錯選擇,不過衰在自細無好好學習,今次臨熱先嚟抱教練腳,好彩有速成心訣,玩花式都無難度。

記者:王震遠 
攝影:譚盈傑
Model:Kity@InterplayWorkshop

踩冰速成!
識滾軸 更易溜冰

好多人感覺溜冰場似把妹場多過練習場,人人行行企企,係咪真係學到嘢o架?不過溜冰場專業教練黃佩詠就話一樣學到腳下功夫:「就算平時在場內行走,一樣可提升平衡力,當平衡掌握得好,自然有根基學習更多花式動作。」
冰!唔係人人識溜,但如果你識踩Roller,咁就事半功倍:「學過滾軸溜冰,對溜冰有幫助!兩者平衡感都是一樣;玩慣滾軸溜冰,就會知道跣冰時的重心在哪點。」
「溜冰屬全身運動,起初學習會好累人;對於女性,溜冰更可做到瘦身效果,因為好多動作都要用到大腿和臀部肌肉,所以對收緊臀部會有幫助!」

超10級 奧運花式

學習一種新運動,走唔甩由基本功學起:「初學者需要跟隨一級級的動作去學習,當教練覺得及格就可以升級,再去學下一級別動作。最基本的動作先要學跣!想學轉圈?這已屬花式級別動作!」
「基本功共5級,包括PRE-ALPHA、ALPHA、BETA、GAMMA同DELTA,前後溜只屬PRE-ALPHA動作,即係基本第1級,花式級(Freestyle)共有10級,因為比賽主要是分級數同年齡,每一級都會有比賽的,而像奧運那些比賽的級別,通常已經超過第10級的級數。」
想速成?唔係無辦法嘅,黃教練就透露咗套速成心法,就算只係識跣唔識花式嘅Model,一樣做到Freestyle1級動作──飛機(Arabesque):「先用單腳向前推,推冰嘅時候,一隻腳企定,一隻腳拎起、再提高,呢個動作需要大髀用力,同埋腳尖用力,蹬直整隻腳,最重要喺腳部伸直,就可以做到單腳向前推跣。」

初哥必學跣
ForwardSwizzle(PRE-ALPHA級)

是給初學者學習的動作,滑行之後,雙腳像是葫蘆形的向前,向外用力再合起,就可以保持一直向前滑行,就不會那麼快停下。

BackwardWiggle(PRE-ALPHA級)

這是最基本的褪後動作,初學者一定要學習,做動作時需要扭腰,再帶動雙腳左右擺,前腳掌用力踩住地下。

ForwardStroking(ALPHA級)

用了最基本的溜冰姿勢是向前推冰,推冰的時候一隻腳踩實,一隻用力撐地後向後提起,提起後腳趾用力蹬直,之後一下左、一下右向前推進,動作的困難在於單腳平衡。

裝備篇
腳下刀功夫

老套講句,工欲善其事,必先利其器!初學者都學溜冰裝備:「想玩跳嘅動作,溜冰刀嘅齒會大粒啲,咬地能力高啲、可以彈得高啲!至於弧度大嘅溜冰刀,通常屬高級玩家使用,初學者用嘅刀會平少少,溜冰嘅時候會穩定啲。」

溜冰者的刀

初學上身裝備

加鞋墊 更易跳

溜冰鞋款式都一樣,主要是由皮做成,分別在於鞋筒有唔同硬度;高級的會有鞋墊在鞋筒外邊,將鞋身加硬,令佢跳嘅時候可以做到帶起整個人嘅力量,而初學者就唔會用呢款!「跌嘅時候比較危險,因為冰面可弄傷手,其他人都有可能撞到或者踩到你,所以初學者盡量帶手襪先去溜冰。」衣着方面,初學者會穿運動長褲,如果怕跌可以戴護膝、護踭等:「普通溜冰裙會在比賽時穿着,比賽嘅服裝係可以自選;男子就會穿緊身溜冰褲,上身會穿短袖嘅溜冰衫。」

救命招!
未學行先學跌

初學者最緊要留意,將膝頭微微曲,等重心可以低啲,令整個人向前傾;就算跌,都可以向前㩒住膝頭,咁就唔會弄傷尾骶骨。
真係要跌嘅時候,要盡量向側跌,唔好向後跌,因為向後跌好容易傷到腰骨;側跌時要用臀部坐下,千萬留意手部不能放喺地上,因為好易被人踩親手指,保護動作係盡速「跪低」,並用一隻腳企喺地上,再用雙手按住地面借力起身。

高難動作 真人Show!

profile

溜冰學員Jolie(15歲)
等級:Freestyle4
溜冰年資:5年
成績:香港溜冰錦標賽
08年FreeStyle2(冠軍)
08年SoloComp(冠軍)
09年FreeStyle3(冠軍)
09年SoloComp(第四名)

踩正刀頭 必仆!
飛機(Arabesque)Freestyle1級

做動作時,隻腳提得越高先叫越靚,同埋越高分!呢個動作嘅難度係好易向前仆,因為如果踩到腳尖嗰個方向,齒位會令你好易向前仆;整個動作需要滑行4至5個溜冰者的身高才算完成。

跳芭蕾 講美感
跳起(BalletJump)Freestyle2級

要做BalletJump,先要做右腳推冰轉身,之後篤冰,最後跳起做一個像是芭蕾舞的姿態:「難度係手同腳,都要做到好美嘅姿態,還要跳得高才算完美。」

大髀要夠Power!
轉圈(SitSpin)Freestyle4級

轉圈係4級動作,首先雙腳要做成一個交叉,再將身體慢慢向下,做成一個坐下動作;喺坐下嘅同時需要轉動,以考試嘅及格標準來計,需要坐低嘅時候轉到6個圈,才可以慢慢上升自轉,好考大髀嘅力量。

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載