› 選擇地區
三藩市
紐約
洛杉磯
其他美國地區
香港 台灣 北美
 
2014年07月19日

【即時文摘】母乳與奶粉(左丁山)

建立時間 (HKT): 0719 06:00

富三代霍啟剛嘅名氣太太郭晶晶出席活動,以聯合國兒童基金委員會(UNICEFHK)大使身份,批評本港電視奶粉廣告太多,香港社區哺乳設施不足,感嘆本港母乳媽媽處於劣勢咁話,佢原來身先士卒,收集3000個聯署,主張規管奶粉銷售,要求政府協助母乳媽媽。
名門闊太如郭晶晶者,生咗BB之後,多數有陪月,有菲傭一至兩個幫手照料阿B,自己唔駛返工,自不然可以盡情用母乳餵B,還可抽時間出席各式各樣宣傳母乳推廣活動㖭。近年香港婦女(多數係中產或以上,教育程度較高者)追上西方風尚,以母乳餵哺為榮,80後母親更加上心,不過職業婦女好快就發覺放完產假,返工之後,講母乳餵哺,實在係唱高調,唔通可以帶埋阿B返公司咩?即使係,99%工作場地唔慌有餵奶地方,叫東方女子在眾目睽睽之下餵奶,要求未免過高,故此母乳餵哺呢樣嘢,只能輔助奶粉,好難完全代替奶粉,況且母乳雖好,但從未見過有數據說明吃奶粉長大之人,頭腦、才智、健康有問題喎,否則今天香港之年青父母咪全部後天失調?小YY、肥仔K等同輩朋友有邊個唔係食奶粉大㗎?今年嗰啲DSE狀元尖子又係唔係全部食母乳大㗎?
郭晶晶有大把理由推廣、宣傳母乳餵哺之好處,但佢無理由要求政府管制奶粉銷售及廣告。左丁山係自由派,一向主張freetochoose,對市場及消費者盡量少設限制,母親鍾意點就點。但香港有啲官僚太過熱心,太着重意識形態,陷於形式主義、教條主義,衛生署竟然為咗推廣母乳餵哺,建議禁止奶粉生產商、分銷商為三歲以下用嘅奶粉推廣、賣廣告,簡直豈有此理。廣告雖或有誇大成份,但香港素來主張自由競爭、自由資訊流通,讓用家取捨,任何禁止賣廣告法例都係侵犯香港人人權及知情權。衛生署鍾意嘅話,可以在全港鋪天蓋地咁宣傳母乳有益,何必重手禁制奶粉廣告呀!禁制嘅直接後果就係保護兩三隻大牌子壟斷市場,損害父母利益,立法會議員必須反對呀!
郭晶晶在7月15日向高永文局長遞交擁護母乳聲明,有可能係為衛生署做宣傳,明日(7/21)立法會衛生事務委員會討論禁止奶粉廣告嘅事情,直情係蔑視競爭法,鼓勵奶粉商壟斷,胡紅玉豈能詐作睇唔到?

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載