› 選擇地區
三藩市
紐約
洛杉磯
其他美國地區
香港 台灣 北美
 
2016年04月04日

【短片】【易零壹綠】自己喪禮自己搞兼顧環保話咁易

建立時間 (HKT): 0404 06:00

亞視死前借羅琳把口話「一定要獨立」,至理名言也。無錯,死都可以自主,死都可以特別。如果婚禮可以千變萬化,點解喪禮偏偏千篇一律?沒有宗教信仰,都會「被選擇」用道教儀式,喃嘸超渡破地獄乜乜乜。公益資訊平台「加減乘」(PMMMedia)將於今周六舉辦「喪玩喪禮」party,話你聽喪禮可以由你話事,還可兼顧環保。

「加減乘」創辦人文浩謙說:「喪禮氣氛唔一定要嚴肅,你有權令喪禮好好玩。」係囉,whynot?生前明明愛熱鬧勁浮誇,靈堂點解唔可以七彩繽紛花喱碌?咪就係因為你生前無講明。「加減乘」編輯冼少萍說:「商討喪禮要點搞時,家人往往好多爭拗、揣測。你寫好想點搞,佢哋跟住做就搞掂。」活動讓人反思喪禮自主,當然要大家體驗,一切百無禁忌。影chok樣靚靚車頭相、錄遺言、選靈堂音樂,仲有瞓棺材。她說:「從死去看生,當你瞓响棺材,會回望生命有冇遺憾,有冇想做而未做的事。」

活動會借一個1.5小時的爆笑話劇帶出殯葬業的荒誕,反映家屬籌備白事時遇到的問題等。每件喪事的棺木、鮮花、吉儀、白衣等都造成很多浪費。今次活動跟環保殯儀社企毋忘愛合作,也希望推動減廢。主席范寧醫生說:「2014年香港大學做了一項研究,差不多67%的香港市民都願意用環保棺材。」機構從澳洲引入再造紙棺材,比用實木的環保。「試想一下每年大約有超過四'萬人離世,每年就可以減少斬四萬棵樹。」不論生前死後,其實總有不帶給環境負擔的選擇,一於踢走既定公式!

喪玩喪禮
日期:9/4(7pm-10pm)
費用:$250
報名及查詢:PMM Mediafacebook

記者:葉青霞
攝影:徐振國

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載