› 選擇地區
三藩市
紐約
洛杉磯
其他美國地區
香港 台灣 北美
 
2016年08月19日

【即時文摘】收風攞料(左丁山)

建立時間 (HKT): 0819 23:59

朋友K睇完左丁山講今年投票難,來電話:「我有同感,港大民意調查計劃(鍾庭耀)做嘅滾動民意調查對泛民響起警號,民主黨尤其會大敗。我留意到港大新聞及傳媒研究中心嘅陳電鋸、傅景華嘅研究,35席直選議席之中,民主黨只會贏到兩至三席。」問清楚之後,找到明報星期日版(8月14日)嘅文章讀一讀,係噃,根據陳傅兩位之電腦分析,建制派會贏得直選議席之多數,民主黨及廣義泛民用錯策略行錯棋,派新人排名單頭位,直情係搵自己笨,人地建制派以舊帶新,或所謂新人之中,已做過一屆議員,具備若干知名度,邊度有民主黨咁烏垂垂派下駟對中駟,自己的上駟就全部退休㗎!民主黨既無錢、又無人,受建制派與激進派上下夾攻,看來難以翻身。
朋友K之朋友M君有朋自遠方來,來自上海,並非來港血拼,而係觀察香港新情況。據朋友K轉述,M君招呼上海D到益新食廣東菜,上海D猛話廣東菜淡得滯,要多啲醬油辣油做調味品,究其實,在中台港以至東南亞地區,香港人最有養生意識,傾向健康清淡口味,一於少油少糖少鹽,於是上海客、台灣客、馬來客、新加坡客來到香港,一食就話淡出鳥來。上海D慣咗肥、濃、辣口感,自然唔慣香港味道,相反,朋友K,朋友M等人去到上海北京,又係一樣唔慣。
閒話少說,上海D話來到香港,見到一片安定繁榮景象,與佢在內地聽到之香港社會混亂、搞港獨、政治形勢嚴峻之消息,完全不一樣。上海D又對朋友M講笑話:「我與福建商家參加一個福建社團聯歡宴會,吃飯前有起立唱國歌儀式,令我大吃一驚,乜福建人在香港左得咁交關,上海北京都冇宴會開始前唱奏國歌嘅噃!」點同呢,香港有好多人以前愛英國荷蘭水蓋,依家聽見中國國歌就會淚滿盈眶,愛國不分先後,達者為先吖嘛。上海D問朋友香港如何如何,朋友M又問上海D內地如何如何?上海D乃富二代,父親自不然有官場關係,話明中央有北戴河會議,好多議題有待解決,對香港特首人選未有風聲傳出,暫時按兵不動,不明確表態。反之林鄭月娥最近頻頻表態大罵港獨,提及廿三條立法,直情係向中央爭寵,萬一中央示意入閘,林鄭會阻住財爺曾上馬喎。財爺曾尚未獲得中央關顧的眼神,皆因財爺與非梁粉財團行得埋,福建商人如是云。

相關新聞:選舉處審批被指黑箱作業

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載