蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年05月21日

【堆砌當原創】買色底製HK20創意圖像 設計師蔡楚堅:似街坊會做法

15,770
建立時間 (HKT): 0521 11:57

大家最近出街,不論時運高低都會看到慶回歸20周年宣傳品,電燈柱上、摩天輪下、碼頭蓋頂、巴士車身,撞口撞面,避都避唔到。美術設計繁雜老土,屢受批評。連設計大師Henry Steiner都狠批:「根本達不到國際標準。」早前立法會議員鄭松泰facebook專頁質疑,其中一款慶回歸「創意圖像」一撻撻底色來自素材網站,新聞處直認不諱。

鄭松泰議員斥政府「堆砌當原創」,絕非誇張。「慶祝活動」如斯大型,宣傳品卻用現成設計素材,毫不專業,真係好想瘋狂播100次Henry Steiner批評官方設計「垃圾」嗰句畀決策嗰位聽。政府新聞處書面回覆我們查詢,指該HK20潑彩創意圖像由他們設計組同事「設計」,承認色底從圖像網站購得,不過就補充一句是「經過處理」才應用。問到整個慶祝活動於設計方面花費多少公帑,就沒回答。

「㷫回歸」多過「慶回歸」
就此事我們訪問曾獲國際多個設計獎項的本地著名設計師蔡楚堅(Sandy),他說:「比較懶的設計師可能會這樣做,我冇興趣深究。嗰堆圖像設計點差,已經好多人評論過。我會形容做法好街坊會,好喜慶好熱鬧。呢啲設計唔使諗都做到,但如果政府認為香港回歸20周年呢件事好重要,係咪應該諗多啲?」香港沒設計人才?當然不。可是觀乎政府態度,似係靚唔靚唔重要,最緊要做咗!「如果當政府係client,佢哋知唔知自己想點?似乎一開始,佢哋已經畀錯direction設計師。你想講古仔,都要有古仔講先得;你冇古仔,有好靚插圖都冇用。我覺得浪費了向全世界展示香港設計可以做到啲乜嘅機會。」雖然可能好多市民「㷫回歸」多過「慶回歸」,但如果做得好好睇睇至少冇咁嬲。政府就係唔肯畀人唞下。

Sandy提到外國很多周年紀念活動設計皆出色,包括2015年新加坡獨立50周年國慶logo。「它當然不是非常非常好,但如果跟回歸20周年那個比較,你都會選它吧?」他又大讚今年第41屆香港國際電影節的logo設計。「用咗以前啲人寫嘅數目字花碼,有香港傳統元素,望落有現代感又簡單。」香港設計水平當然不只停留在街坊會,只要政府肯放手,香港設計絕對能登大雅之堂。

我們就HK20圖像用現成素材一事,也訪問了設計博客中央聖學子。他認為設計師總算有將素材拼合構圖,未至於非原創。「呢類小童都能製作嘅畫面,竟要上網download,除咗懶,我諗唔到其他原因。」他形容設計毫不專業,品味庸俗,影響市容(下刪千字),一出街就眼冤!

主權移交後,政府所用嘅政治視覺語言,佢以「虛偽」總結,「試圖以低水平設計粉飾太平,例如起錨、築福香港等。嗰啲創意圖像強調全城喜慶,你講就係呀?」
講起官方設計,佢諗起2002年政府發行紫色膠質新10蚊紙。佢覺得設計奇醜,又異於當時的鈔票設計系統,令設計業界嘩然。當年時任金管局總裁任志剛辯稱:「設計嘅嘢,見仁見智。」佢話:「行之有效嘅鈔票色系,一夜間徹底破壞。你估英國人會唔會有咁獨特嘅品味?」

記者:葉青霞
攝影:劉永發

2017果籽繼續認真知味。識買惜用。行以求知。好事多為。重修舊好。
緊貼果籽報道,即like:http://fb.me/AS.AppleDaily

果然好玩,籽在四方,即like「果籽」FB專頁!
返回最頂
香港 台灣 私隱聲明 服務條款 刊登廣告 聯絡我們 招聘 訂閱版: 飲食男女|    Ketchup|    壹週刊
© 2017 AD Internet Limited. All rights reserved. 版權所有 不得轉載