蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年01月14日

【天使病家庭】發起關愛桌遭網民白眼 「只想開開心心食餐飯」

93,370
建立時間 (HKT): 0114 18:24

這個年頭,「關愛」讓人聞風喪膽,地鐵巴士小巴都有關愛座,鼓勵大家讓座予殘疾人士、孕婦等有需要人士,假若位置上的人看似年輕力壯、健步如飛,隨時會被放上網公審。不過餐廳內的「關愛桌」,卻是另一回事。

對不少人而言,外出吃飯的最大難題,離不開忽然患上選擇困難症,因為中西日法意任君選擇,選擇多得花多眼亂,但傷健家庭的選擇可能往往只有兩三個。有一個八歲患有罕見遺傳病「天使綜合症」(Angelman Syndrome)的女兒,Joson要出街食飯也不容易,「帶住詠寧出街食飯真係有一定難度,我哋出街食飯,一係食下午茶,一係就要晏啲食、早啲走。」遇着生日、團年等大時大節,往往都會因為要早走而不能盡興,其他食客惡言相向更屢見不鮮,「個小朋友有問題就唔好帶出街啦,帶佢出嚟獻世咩!」街外人不知道女兒詠寧的情況,父親Joson卻從不怪責他們,也不是要人包容,「大家以為我哋要人處處遷就,其實我哋都係想正正常常開開心心食餐飯啫。雖然我哋屋企有個咁嘅小朋友,但係我又覺得唔應該因為咁,而抹煞晒呢啲機會。」

去年中,Joson萌生辦關愛桌的念頭,「基金會唔只係想幫天使綜合症家庭,更想進一步幫晒全個傷健圈子。」同樣是天使綜合症患者父親的基金會外務長Andy是Joson的戰友,他坦言:「其實我哋都可以正常咁去消費,只不過因為帶住個有特殊需要嘅小朋友,怕麻煩同影響到人,出去消費嘅意欲先會減低咗。」他花半年做資料搜集、向不同傷健家庭了解需要,又跟餐飲業協會商討,最後得出關愛桌所涵蓋的幾項服務,包括提供更大餐桌,傷健人士可遠離熱食滾水,免生意外;延長用餐時間,讓照顧傷健人士的家人有足夠時間用膳;預留角落位置,以免傷健人士某些不經意舉動影響其他食客。其實都不涉及任何讓座成份,大家毋須擔心食飯期間要起身讓座或無故被公審。餐廳其實只要提供其中一項服務,即可成為關愛桌餐廳,Joson笑言:「我哋都唔係好多要求,但已經係好大好大嘅幫助,希望大家唔好覺得我哋係trouble maker。」

現時參與計劃的餐廳約有30間,大部份是本身會聘用殘疾人士的社企,但也有例外。「正宗水上人氣鍋專門店」提供加大餐桌服務,營運總監譚偉雄說:「出街食飯絕對係基本權利啦!人哋都係想開開心心食飯,唔應該忽視呢枱客。」但始終是做生意,不怕關愛桌客人會嚇走其他食客,惹來投訴?「我哋會解釋番畀客人聽,呢班關愛桌客人長期被社會忽略,我哋必須支持佢哋。不過基本上唔會點影響到其他客人,因為始終係放喺一邊。」他希望同業能一同支持,達致雙贏,「大家有生意做,佢哋又唔使匿喺屋企。」Joson透露,他們將擴大關愛桌網絡,之後還會有一系列類似的關愛計劃出爐,為傷健共融出力。

關愛一站通
http://www.oneclickcarehk.com

記者:李煒汯
攝影:許先煜 

全新旅遊專頁,即like籽想旅行: https://fb.com/travel.appleseed

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載