蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年08月05日

【動畫●「關公誕」點解冇補假】關公生日 佢嘅故事你又知幾多?

4,641
建立時間 (HKT): 0805 12:00

公關災難源源不絕,個個都搵關公,唔通關公個個都想關照咩?適逢今日係農曆六月二十四日,相傳係關公生日,不如畀佢抖抖,聽聽佢嘅一生慶祝下啦!

關公,實名關羽,又叫關雲長,係東漢末年劉備嘅大將。史書《關羽傳》無乜形容關公,淨係話佢係河東解州人兼有把長鬚,都無話佢紅面,紅面係小說《三國演義》嘅描述。

相傳關公細個嗰陣,跟阿爸務農,當時有個惡霸叫呂熊,經常欺負百姓。關公廿歲嗰年一時意氣,拎住把刀衝入呂熊屋企,就殺死咗佢,搞到自己被通輯,父母跳井自盡。不過,其他人就好感謝關家,仲喺關公父母跳井嘅井口上起咗五層高塔紀念。

自此關公要走佬,由山西走到河北省。直到關公24歲嗰年,爆黃巾之亂,有漢室皇族血統嘅劉備組成義勇軍抗亂,關羽同張飛先後加入,自此情如兄弟。《三國演義》有「桃園三結義」嘅情節,非同年同月同日生,但願同年同月同日死,就突顯佢哋兄弟情深。

後來,曹操想將關公收為己用,但係對關公點好,送金送美女,關公都不為所動,誓要做義氣仔女,返劉備身邊,後嚟仲將曹操打到節節敗退。可惜曹操同孫權聯手,關公大意失荊州,最後畀孫權斬首,終年59歲。

關公死後一個月,曹操、呂蒙相繼離世,民間流傳係關公顯靈報仇,所以最初起關公廟拜祭,民眾唔係為咗祈福,而係避凶,希望關公唔好太大怨氣,搞到啲老百姓。

到今日,因為關公夠忠心又有義氣,黑白兩道、唔同界別行業等都拜關公,要留意嘅係,原來關公嘅鞋有唔同顏色。關公像着黑鞋,代表警察、做官;着紅鞋,代表江湖;着綠鞋,代表草根。

記住做人要有忠義兩個字,咪唔使下下爆公關災難搵關公囉!

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載