蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年11月09日
馬上成為壹會員

【即時文摘】倫敦捧餐(左丁山)

路透社(路透社)
建立時間 (HKT): 1109 00:02

學生豪去年中大工學院畢業後,去咗倫敦帝國學院讀碩士,上學之前,左丁山勸佢讀好AI、讀機械人等,必有工作前途。果然呢,習近平上星期帶領中央政治局委員上堂,由北京大學一位教授講述AI,習主席要求大家認真學習。嘩,咁就不得了,習主席都話要認真學習、發展AI噃,以中國人一窩蜂性格,未來幾年,必有大量資金投放入AI研究領域,香港特區政府老早聽到風聲,特首施政報告大講科研,撥款畀本地大學,學者仲唔會搶住申請研究資助咩。

點知學生豪唔肯聽,話年青人有自己想法,到帝國學院就主修可持續能源工程(Sustainable Energy Engineering),都幾合乎年輕人喜愛環保嘅性格,左丁山係老嘢,見學生豪學成回來,對佢呻兩句:「返來點搵食呢,香港邊度有地方發展風電、太陽能電呀,有地都用來起公屋啦!」學生豪話:「唔駛驚,我會到英國搵嘢做,英國歐盟好重視新一代綠色能源發展,應該有機會!」或者係啱嘅,但最弊英國要脫歐,走曲折道路,前景未卜啫。到倫敦搵工期間,如何生活?

學生豪話:「唔駛驚噃,可以做住兼職餐飲工人先,我一年來因有大陸同學介紹,加入一個專門提供兼職餐飲人員嘅公司,受短期訓練,就去大宴會做散工托餐盤,最低時薪8鎊,扣稅後淨袋有時薪6鎊幾。」一日做幾多個鐘頭?學生豪話:「五六個鐘至十幾個鐘都有,不過好辛苦,試過一次去Bath搞婚宴,朝頭早8點就有巴士接我地去,時薪由早上8時起計,到咗巴芙,做到失魂,晚上十點幾返到倫敦,我腰痠骨痛,好難頂,賺錢唔容易。但有一次到Dorchester大酒店捧餐,達官貴人齊集,文翠珊就坐在我附近,好開心。」想不到由菲傭湊大、服侍大嘅學生豪一旦離開香港,就做得捱得,讀書成績都唔錯,想是家庭教育之功也,中大畢業生真係比較捱得苦嘅,何況係來自手空空無一物嘅新亞。咁多外國學生做散工,英國人點睇?阿豪話:「英國人根本唔肯做下欄工作,餐廳工、清潔工、裝修工、水喉工,差不多全是南亞裔或東歐移民,一啲人得把口反移民,真係唔准移民入口,遣返移民嘅話,倫敦怕會半癱瘓,全倫敦嘅Uber司機,有九成係移民嚟㗎!」真實世界就是如此,左丁山近日在中環行經不少建築地盤,睇到工人、雜工交談多帶鄉音或係南亞裔,極少見到本地年輕工人,酒樓食肆酒店亦見此現象,反移民之人,唔知平時有冇打工嘅呢?

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載