› 選擇地區
三藩市
紐約
洛杉磯
其他美國地區
香港 台灣 北美
 
2019年01月23日

【即時文摘】香港年輕指揮家(左丁山)

YouTube截圖(互聯網)
建立時間 (HKT): 0123 00:02

公子L退休後,周圍飛,飛得仲多過以前做打工仔之時,佢話計劃每年有起碼一百日在紐約倫敦東京台北台中維也納聽音樂會。左丁山話:「香港真係冇嘢值得你聽?」佢諗咗一陣,為之失笑,答曰:「或者今年多啲參加藝術節音樂節目。」公子L又醒起,左丁山上星期指出不少香港中學生樂於生活在香港舒適區,不願往外國留學,於是叫左丁山讀一讀南華早報嘅星期日雜誌Post Magazine(1月13日),有封面文章介紹三位香港年青指揮家衝出亞洲,到世界揚名。呢本星期日雜誌平時好少睇,經公子L一提,於是在家中報紙堆中搵番出嚟,讀一讀呢篇封面故事。

讀完,又覺得好勵志喎,三位主角值得成為香港澳門年青人模範。報導介紹三位80後音樂指揮,在香港澳門長大受教育,在歐洲成才揚名。三位係Elim Chan(32歲)、Lio Kuokman(36歲)及Wilson Ng Wai Sai(29歲)。介紹Elim陳小姐篇幅較多,佢在沙田長大,父親在沙田IVE做設計科講師,母親任職ICAC。自細參加葉惠康博士嘅葉氏兒童合唱團,10歲第一次見到葉詠詩指揮樂隊,從此對指揮棒着迷,讀大學入咗美國麻省嘅Smith College,本來主修法醫學及心理分析,但畢業後毅然轉往密歇根大學攻讀音樂指揮,走上音樂專業之路,2014年贏得Donatella Flick指揮大賽冠軍,成為歷史上第一位女性冠軍,於是打出名堂,成為年青指揮家,現與荷蘭未婚夫居於阿姆斯特丹,今年成為比利時Antwerp Symphony Orchestra指揮。

Lio生於澳門,自小喜愛音樂,澳門每有音樂會,必然係座上客,後來考入香港演藝學院,發現自己係樣樣最差嘅學生,於是拼命學習練習,畢業時得到一級榮譽(2004年),得到紐約Juilliard School錄取深造,再往費城之Curtis Institute of Music學習指揮,讀完書回到香港,受葉惠康博士賞識,請佢加入泛亞交樂響團,從此聲名漸響,現在一年有300日住在酒店,全球周圍飛,做樂團客席指揮。第三位Wilson Ng今個月在首爾擔任首爾交響樂團副指揮,自小參加香港兒童交響樂團,往巴黎、瑞士洛桑學習長笛,後來入柏林藝術大學研究指揮,不時潛入柏林交響樂團練習場地偷師,直至被趕走為止。今天呢三位年青人已在國際音樂界有名聲,有潛質可成為世界級指揮家,前途光明。三人都得益於香港音樂教育及有心人提攜(如葉博士),有志衝出香港嘅學生可以此三人為學習對象。

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載