› 選擇地區
三藩市
紐約
洛杉磯
其他美國地區
香港 台灣 北美
 
2007年08月17日

法國高手跳到港
港仔拜服:跟都跟唔到

每到暑假,商場活動總是浪接浪,今年來港表演的Parkour勁旅就一隊接一隊,這個星期六、日演的有來自法國的Flyers。
香港亦有個愛玩Parkour的飛躍協會,今次見有世界級高手來港,本來諗住安排雙方Jam一Jam,點知一到場,未玩齋睇高手出招已經「縮」:「我哋同佢哋爭幾皮喎,根本無得玩!」

記者:葉雪芯 
攝影:林栢鈞

世界第一流Parkour團體

嚟香港表演嘅ParkourTeam一隊勁過一隊,上月有澳洲TraceElements,今個星期就有法國Flyers。排資論輩,Flyers係世界第一流水準,同電影《因乜差事跳跳跳》內的演員同期出道,更加與Parkour創辦人DavidBelle亦師亦友,隊員DanielGirondeaud和Yannick的「跳齡」達9年之久,功力深厚。

「見到佢哋已經好開心」

難得有猛人過江,即時吸引到本地Parkour友注意。香港飛躍道協會係香港少有的正式Parkour組織,由幾個志同道合嘅後生仔組成,雖然年輕,卻玩得有板有眼,仲曾經被Nike、HugoBoss等大牌子邀請出Show,甚至到外地表演。剛知道Flyers來,本來打算同高手同場一齊玩FreeJam,但一開波見到高人表演兩個動作,已經嚇到儍,TeamLeader阿鋒坦言:「佢哋嘅動作實在做得太靚!我哋根本無得同佢哋一齊玩㗎喎,以我哋嘅水準,我哋做唔到佢哋嘅動作!應該話唔識做!跟都跟唔到,不如當練習算啦!俾我哋見到佢已經好開心喇。」其中4招仲係佢哋心水動作,講到明未來日子要睇住佢哋嚟學!

佩服1 Jump流暢感極高

阿鋒:「好Smooth,佢哋配合得好好,一跳起時幾乎知道自己邊一寸肌肉係運動緊,所以每一跳都好似好輕鬆咁,睇得人好舒服。」

佩服2 落地無聲

阿鋒:「即使彈到咁高,落地嗰下都好靚,完全無聲,好似紙咁飄落地!係體能操得好,加上用柔力先得,佢哋對自己嘅肌肉感覺一流。」

佩服3 踩牆打觔斗Flips!

阿鋒:「我哋成Team人無人做到呢個動作(踩牆再向後打後空翻落地),都唔知要練幾多年先做到。世界上玩緊Parkour嘅人都只係得好少數人玩到Filps,呢個係每個Traceur夢寐以求想做到嘅動作!但佢哋竟然咁隨意就Flips,就好似叮噹有神奇法寶咁,恨死隔籬!

佩服4 捐窿捐罅攞位盡

阿鋒:「又係勁流暢,睇到我哋啞晒。佢可以好輕易一下跳入咁細小嘅車廂入面,可想而知佢跳嘅時候攞位有幾盡,如果空間咁細,肌肉又係要配合得好好,否則好易受傷。」

Flyers:港仔態度好有潛質

黃毛小子雖然水準真係差幾皮,但一場嚟到,好好醜醜都要露兩手,係咁依同Flyer跳咗一次咁多。問番Flyers覺得佢哋跳成點?TeamLeaderYannick:「佢哋的確係要練習多啲囉……玩Parkour最重要係要好清楚個環境跳唔跳到,衡量自己的能力,呢兩方面佢哋都疏忽咗。剛才話跳就跳,無Check過場地,咁樣好易會受傷。我哋頭先幾乎用了4個鐘時間去Check個地點,邊度適合做咩動作。不過睇得出佢哋好有心機,態度好好,睇過佢哋短片,覺得佢哋有潛質,技術可以慢慢練。」
至於阿鋒,最大感覺唔係Flyers嘅高超技術,而係友善態度:「玩Parkour最重要的宗旨係Sharing,頭先我哋的確有啲動作係做得唔啱,仲跳爛咗個場的木板。佢哋都無笑或者責罵,反而仲教我哋動作要點做,提醒我哋要小心。」

「努力練,去里斯朝聖!」

睇電視睇戲,經常見到外國嘅Parkour高手飛簷走壁,香港飛躍道協會TeamLeader阿鋒同高手過完招之後,就坦言同國際水準無得比:「講體能,我哋操得唔夠勁,佢哋啲手臂已經係我小腿。講技術,我哋都無,人哋跳屋頂,我哋最多都係跳欄杆、電燈柱、石壆,我哋亦未有膽量同埋信心可以做到好高難度的動作。基本功我哋一定有,唯一唔輸蝕嘅就係勤力啲囉。人哋搵我哋出去表演出Show,我哋都需要用好多時間去練習,多數都係玩木箱同埋架,惟有畀心機啲,希望今次之後,以後有機會去到Parkour發源地里斯,去朝聖!」

法國

香港

法國Parkour高手Flyers表演
地點:旺角新世紀廣場
日期:8月17-19日
時間:3:30pm及6:30pm
查詢:23970790

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載