› 選擇地區
三藩市
紐約
洛杉磯
其他美國地區
香港 台灣 北美
 
2008年12月24日

狂歡平安夜 好玩倒數2:
老尖:Kubi仔陪過夜

講人氣鼎盛,尖沙嘴一定贏硬,上年平安夜足足有40萬人戙喺海旁等倒數,幾驚九龍半島會沉呀!今年雖然話經濟唔好,但話晒大時大節,點都要出街Hea吓先安樂嘅。EO2帶埋班靚女殺落尖東,喺燦爛燈飾下大玩無聊遊戲,一於Hea到夠鐘倒數為止,其間引嚟大小朋友趁熱鬧,遊戲無聊?好玩咪得囉。

記者:梁俊鵬
攝影:王文忠

買禮物等倒數

又係嗰句,倒數嗰十秒係好過癮好興奮,但等真正倒數前嗰千千萬萬秒,真係好難啃。一行六人殺落尖東前,點都要買番啲玩具仔消磨時間。大鑼大鼓掃聖誕禮物,途人見到群星巡舖,地氈式搜索禮物,只敢指指點點眼睥睥,唔敢熱情上前要求合照,都啱嘅,始終係人哋舖頭,買嘢唔應該咁高調。初頭,Eddie儼然以財政部主管自居,揸住$100懶係計Budget,其他人七嘴八舌,呢樣嗰樣樣樣都話買,最後決定各自為政,結果買咗堆唔知點玩嘅玩具,埋單又咁蹺剛剛好$100,意想不到咁默契十足。

玩轉尖東

歌星視聖誕檔期為年尾最後抓錢機會,邊有時間陪朋友倒數,不過眾人異口同聲話:「有機會嘅話,一定去尖東海旁玩,迫埋一班人倒數先好Feel。」OK,知佢哋忙,一於出發尖東嚟個倒數Rehersal,仲專登去帝國中心,喺古巨基設計嘅Kubi燈飾下面影幅開心大合照。初頭大家懶斯文,影影吓相EO2率先嚟料,一時逼三位嬌滴滴靚女Winnie、Winky同Angel玩紅綠燈,一時又拎出玩具喪玩,再唔係就無厘頭跳舞,最後仲拉埋聖誕老人影相,呢啲咪未到聖誕先興奮囉。雖然尖沙嘴中心要等到除夕先有倒數活動,不過尖沙嘴中心、帝國中心最就近麼地道公園,估計都會有大批市民於公園逗留睇燈飾,現場實有人自發性搞倒數,大家不如諗吓點樣早點迫入公園好過啦!

《聖誕音樂雜耍巡遊》
日期及時間:即日至12月28日8:30pm-10:30pm

《聖詩妙韻夜》
日期及時間:即日至12月28日7:00pm-9:00pm

尖沙嘴中心、帝國中心
查詢:27215489

難忘倒數
Eddie

今年EO2會去荃灣倒數,工作中度過。年年做完倒數Show,都要迫餐死先行到過隔籬街,不過非常有氣氛。

Winnie(黃麗虹)


今年平安夜會去廸士尼,最難忘嗰次係由夜晚玩到天光,玩倒數睇表演,撐住對熊貓眼返屋企。

Winky(劉家麗)

年年都咁難忘,因為有朋友喺平安夜生日,特別多人同佢慶祝,越大班人玩就越開心,夠熱鬧吖嘛。

Eric

未入行前最鍾意喺平安夜行尖東海旁,無嘢㗎,淨係行嚟行去,想當年仲可以玩噴雪,不知幾興奮。

Otto

最難忘係玩交換禮物,有年平安夜,限定要買$100以下嘅禮物交換,最後我竟然收到隻活生生嘅蟹。

街訪心聲:最愛尖東區

九龍區倒數熱點
1.廣東道

今年已經係第九年搞「廣東道聖誕倒數StreetParty」,有台灣歌手S.H.E及林宥嘉到場一齊倒數,今年估計有30萬人次會參與,踏入聖誕節的一刻更會放煙花助興,想迫一迫沾上熱鬧氣氛一定要到。

查詢:21188666
廣東道聖誕倒數StreetParty
日期及時間:12月24日
表演開始10:00pm
倒數聖誕12:00mn

2.天星碼頭

其實只要有個大鐘,一定會引來想倒數的人群,所以你迫唔到埋海港城、廣東道,呢度一樣會有大把人陪你玩,再唔係在海旁玩一樣有氣氛。

3.朗豪坊大電視

朗豪坊商場入面當然有倒數活動,奈何入面一定迫到氣都唞唔到!所以不如吼實商場出面部大電視。

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載