› 選擇地區
三藩市
紐約
洛杉磯
其他美國地區
香港 台灣 北美
 
2009年04月25日

PetPet樂園:老翻史迪仔超嗲!

■輕依樹梢,深情對望如談情說愛,看來蜜袋鼯是大浪漫主義者。

這隻寵物眼大大嘴嘟嘟,十足十老翻史迪仔,認祖歸宗,牠們是來自澳洲的無尾熊和袋鼠遠親,名叫蜜袋鼯。牠們樣子趣怪愛挨身挨勢,更有「滑鼠」之稱,不是搞食字爛Gag,全因牠們是滑翔高手,最遠距離可以滑到五十公尺呢。

記者:蒙為亮
攝影:林栢鈞

寵物界模範夫妻

「蜜袋鼯」(音唔)在台灣叫「小蜜」,屬結指鼠兒科,原產地澳洲北海岸及尤加利樹林區,香港氣溫適合牠們生長,一隻人工飼養的蜜袋鼯最長壽命15年。牠們是重友情的群居動物,不會自相殘殺,相反落單時會自殘,所以要一雙一對一男一女的飼養,除可作伴,更可以讓牠們繁殖下一代。Michael和Gigi,在2007年1月10日收呆呆和矇豬,至今牠們已健健康康踏入兩歲,兩公婆平時相親相愛,永無爭寵,吃食物會分甘同味,簡直是寵物界模範夫妻。
Michael說:「兩年前上討論區,無意中見到蜜袋鼯,簡直一見鍾情,因為我同女朋友本身好鍾意史迪仔!後尾買咗呆呆同矇豬返屋企,佢哋好有性,又識嗲人,一返屋企就好似狗仔咁熱情歡迎你,抵錫。」Gigi笑言:「佢哋太似樣,初頭都分唔到邊隻打邊隻,之後睇書先知女仔有個好似袋鼠嘅袋,生BB用嘅;男仔頭部有一條好明確嘅分泌腺,用嚟擦女仔下巴留低氣味,好浪漫。」

叫聲似狗吠

蜜袋鼯屬夜行性動物,眼大大,聽覺嗅覺發達,晚上更會大叫,「剛剛領養佢哋,鄰居居然問我養咗隻乜品種嘅狗,我耍手擰頭解釋,講一大輪佢都唔知乜嘢叫蜜袋鼯。佢哋夜晚吠得好似北京狗,有時甚至會嘈醒我,起身鬧兩句,佢哋又會好聰明唔再吠,日頭呢,佢哋會瞓到隻死豬咁。」飼養蜜袋鼯,一定要緊閉門窗、冬天開暖氣,「蜜袋鼯夜間活動,手腳間有一層薄膜作長距離飛行用,屋企窗口唔鎖好,佢哋就會滑走。佢哋無野外求生能力,一放生注定變成飛鷹消夜;室溫都好重要,香港冬天總有一兩日氣溫驟降,開暖爐Keep住室溫25至31℃就OK。」

一生一世的承諾

聽教聽話的寵物最受歡迎,蜜袋鼯正是如此,容易馴服不咬人,簡單如番茄和士多啤梨,已叫牠們吃得樂透半天,「有時我同GiGi會炮製大餐,將番茄薯仔混入豬肉,撈?後擺入雪櫃中雪成啫喱狀,佢哋不知食得幾開心,計落矇豬有啲偏食,呆呆就乜都放入口。」與人一樣,蜜袋鼯要避免多脂肪多糖食物,也要多吃新鮮蔬果才會健康。照顧蜜袋鼯也不難,最重要有愛心是必要的,蜜袋鼯最重感情,專一到一生只會跟一個主人。「蜜袋鼯喺BB階段,一開眼就望到主人,之後日日都聞慣主人氣味,BB確認到邊個係主人就會跟一世。試過其他朋友去我屋企開Party,佢哋死都唔肯上朋友身,淨係黐住我同GiGi。實在太黐身嘞,所以花嘅精神同時間會比其他寵物多。」

註:領養蜜袋鼯相關資料,請查詢「另類寵物論壇」, http://www.ospets.com

呆呆

性別:♂
性格:活潑好動、蠱惑好奇、貪吃貪玩,小器易呷醋
愛吃食物:所有能放入口的東西
得意技:空降、用後腿站立、玩捉迷藏
壞習慣:四圍丟垃圾、處處留尿

矇豬

性別:♀
性格:文靜乖巧、愛撒嬌、懶洋洋、有大小姐脾氣
愛吃的食物:麥皮、奶米
得意技:扮飯糰、扮狗吠
壞習慣:偏食

大浪漫私相簿

蜜袋鼯Profile

英文名:SugarGlider
分類:有袋目、結指鼠兒科
分佈:澳洲北海岸、東南部、
適溫:27至31℃
壽命:人工飼養的蜜袋鼯,可活達12年以上。
體長及體重:成年的雄鼯較雌鼯重,分別為115-160克,及95-135克。身長為12-13公分,尾長15-48公分。
身價:約$300

必備用品
繩索木頭$28

蜜袋鼯貪玩,宜放條繩索木頭在籠中,供牠們爬高爬低。

鐵籠$220

正常Size鐵籠已夠用,入夜謹記捉牠們入籠,以免走失。

跑步器$38

蜜袋鼯也要Keepfit,這個跑步器大派用場。

膠箱$50

蜜袋鼯愛在郊外爬樹,要經常帶牠們呼吸新鮮空氣,輕攜式膠箱少不得。

草蜢乾每包$20
麥皮蟲每包$15

兩者都是蜜袋鼯主要糧食之一,含高蛋白質,買一包足夠一個月食用。

參考書USD$8.99

《SugarGliders-CompletePetOwner'sManual》,詳述蜜袋鼯產地、身體構造、特徵、生命周期,餵食貼士、繁殖及疾病等問題,入門必讀。( http://www.amazon.com )

ILoveRabbit(23918085)
地址:旺角通菜街158號B舖

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載