› 選擇地區
三藩市
紐約
洛杉磯
其他美國地區
香港 台灣 北美
 
2011年07月21日

家宅男女:陳刀撚貓 為愛作衣裳

時裝設計師陳刀加入書展戰場,新書《貓衣櫥》走唔甩時裝元素,但主角非索模,而是可愛肥貓!為喚起大眾對孤兒貓的關注,為貓親手做衫仔之餘更做埋龍友拍攝成書,陳刀說:「且看陳刀與貓的愛恨故事!」

記者:潘紫芳
攝影:黃子偉

剎那動心 由恨變愛

為貓做衫,定必自小愛貓如命?陳刀即時雙手握拳:「我細個好憎貓!細個住唐樓,樓梯經常一堆貓屎臭氣冲天;逢黑色星期五又總會見到黑貓,就覺得周身唔聚財冇運行!」不過,人生幾時都充滿驚喜。三年前與partner到茶餐廳醫肚,老闆說門外有兩隻初生小貓無人理,拋下一句:「你唔要,佢可能會餓死。」時值歲晚收爐,心想,無人理可能真係會死,於是就把貓咪抱走,取名刀刀與雯雯,「我叫陳刀,partner叫Edmond,咪叫刀刀同雯雯囉。」陳刀第一次抱雯雯出街就被牠抓到一頸血,但未有被嚇怕,「貓仔一啲都唔孤高,反而好嬌嗲,愛磨蹭你,感覺很warm。就算通宵做嘢,佢會陪住你,令你唔寂寞。」相處三年,大家都成了對方的依靠,「雯雯做完絕育手術好辛苦,嗰段時間我喺工作室過夜,晚晚同佢一齊瞓。」工作室內,布疋就是雯雯的玩具,又愛在電腦鍵盤catwalk,不過最愛還是給陳刀patpat!

貓貓鳳冠速成

DIY貓衫小貼士

選料要薄:因貓毛已夠保暖。
下身真空:方便貓仔去廁所。
選用萬能貼:方便穿着,避免用拉鏈免拉扯貓毛甚至弄傷貓仔。
腋下位預大1至1.5吋:先量度貓仔頸圍、肚腩圍(最肥位置)、身長、手長及腋下(前足位置),其中腋下要預留多1至1.5吋,方便動作大的貓咪郁動。

人類與貓 快樂雙向

雯雯、刀刀令陳刀愛上貓,但陳刀堅稱:「我絕唔係貓痴!」起碼養貓數目從沒增加,由始至終都是兩隻,只是刀刀年初過身,便收養了同樣遭人遺棄的小黑貓希希。接觸過被遺棄的貓,就想為牠們做點事,「自己係時裝設計師,就想透過幫貓設計靚衫,引起公眾對佢哋嘅注意,就算唔鍾意貓,都唔應該去傷害佢哋。快樂係要雙向嘅,你蝦小動物得到快感,但小動物就好傷心,呢啲唔係叫快樂囉。」人穿起漂亮衣衫會滿心悅愉,陳刀相信貓仔也一樣,「貓仔着衫後會搖擺尾巴,我諗係開心嘅表現吧。」當然,硬要貓仔24小時穿上華服,只會是另一種形式的虐待,偶爾打扮一下拍拍沙龍,當是「親子活動」就好。

陳刀貓衣櫥巡禮

幫貓貓扮靚靚

唔似陳刀識車衫,出街買亦得。寵物店一般把貓狗衣服視為相通,貓仔選S碼已合身,還有貓帽、貓頸帶、貓香水,實行由內靚到外。

a.PetMAX21539999
b.PetParadise21539983
c.Petline29440108

陳刀簽名會:7月23日1-2pm
地點:灣仔會展書展簽名會B區(博覽道入口大堂)
註:作者版稅撥捐南丫島動物保護組織

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載