蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年01月29日

宅錄:懷舊豬錢罌 細細隻儲萬元

10,880

相信大家𢭃利是都差唔多𢭃到七七八八啦,咁多利是錢你又放在哪裏呢?以前嘅人儲錢最簡單的方法就係入落錢罌,雖然家個個都過錢落銀行戶口,但係我知道好多人仲有儲散紙的習慣,一個一個的硬幣你會選擇入落咩錢罌?

記者:陳家蕊
攝影:楊錦文
Model: Ruby@Pure Models
場地提供: G.O.D(28905555)

紅肥豬 吉祥富貴

七、八十後相信都會記得紅色膠豬仔錢罌是儲蓄的象徵,而中國傳統上肥豬更加是「富貴」的象徵,而紅色則代表了「吉祥」,所以紅色膠肥豬作為錢罌的這個配搭,絕對是中國人經過精心設計的!紅膠豬仔錢罌,分四種大小,整隻豬沒有開口,儲滿咗豬仔要取回就要劏豬了!你咪睇豬仔細細隻就以為唔係儲到好多錢,朱老闆認識一對夫婦,每年都會買齊四隻豬仔返屋企儲五蚊十蚊銀,儲滿劏豬後發現最大的豬仔可儲得一萬蚊咁多!紅膠豬仔錢罌在山寨廠用機啤出來,整個豬仔完全密封,入錢位也是封上的,要親自為豬仔開口,除咗用刀之外,朱老闆教路只要用打火機燒熱五蚊銀,「趁熱」熱熔入銀口,貪五蚊銀體積啱啱好,可以入錢,但又不容易由開口中「偷錢」。八十年代開始推出較精緻的白陶瓷款式,底部增加黑色膠塞,咁以後就唔使再「劏豬」啦!

開豬大法

古舊錢罌 「爆缸」先開到

每個年代都有不同方法去教小朋友養成儲蓄的習慣,現在的小朋友好多細細個就擁有他們的儲蓄戶口,但係以前教小朋友儲蓄我們會用錢罌,等小朋友睇到錢罌裏面的錢越來越多,從而學識甚麼叫積少成多。在四五十年代的錢罌,是用缸瓦去做,而且沒有取錢開口位,每次都要「爆缸」先可以取得裏面的金錢,加上本身缸瓦錢罌好重身,小朋友用起來不太方便,所以在後來的六七十年代就衍生了可愛的膠豬仔錢罌了!

廿一世紀電動錢罌

現在的錢罌唔再獨沽一味只用來儲錢,同時都加入不同的玩味,例如 JC Shop的電動老虎錢罌,外表有如一般的電子 竉 物,但只要你以硬幣餵老虎仔食,佢就會張牙咆哮!而另一個外表有如紙盒的,當你放個硬幣在白色位置,竟然會有隻得意國寶熊貓由盒中鬼鬼祟祟咁伸手掃個硬幣入盒內,好鬼可愛!

尋找豬仔的蹤跡

紅色膠豬仔是很多人的回憶,以前很多雜貨舖都買到,現在要找有點難度,小記近日就在上環發現豬仔們的蹤影,就在上環水坑口街的朱榮記,隻隻紅豬仔整齊排在門外。朱榮記的第二代傳人朱先生話:「全香港剩番一個阿伯在山寨廠做這類紅膠豬仔,每隻豬的笑臉都由伯伯親手畫,很多人都特登來買給小朋友,外國人見好有中國傳統特色都好喜歡買。」

商店資料

a/朱榮記(25458751)
b/千年史書文具店(27042803)
c/JC Shop(31022783)
d/city'super(23758222)

果然好玩,籽在四方,即like「果籽」FB專頁!
返回最頂
香港 台灣 私隱聲明 服務條款 刊登廣告 聯絡我們 招聘 訂閱版: 飲食男女|    Ketchup|    壹週刊
© 2017 AD Internet Limited. All rights reserved. 版權所有 不得轉載