› 選擇地區
三藩市
紐約
洛杉磯
其他美國地區
香港 台灣 北美
 
2012年03月01日

童樂日.和孩士多:一條着到大 尿布回歸

(左)BambioMio多合一藍色尿布$199/b
(右)小飛機有機棉尿布$238/a

BB最叻是甚麼?之唔係「便便」囉!家長們照顧BB的最大開支,相信除咗奶粉,就應該數到買尿片錢囉!為咗慳番啲尿片錢,不如學阿媽嗰代,試吓用尿布啦!

記者:陳家蕊
攝影:蔡家輝
Model:Curtis&爽爽@PureModels

Hynek 4個月

我未識行又未識坐,但係識做掌上壓!媽咪話我第一次識用頸部肌肉抬頭仔!爹地喺相機背後笑得好開心喎!

傳統尿布DIY摺法

現在新一代尿布,好多都用百分百純棉質地,極柔軟,要摺一啲都無難度!

啪鈕調節 大細啱着

問十個人,九個半對尿布都好似有種誤解!以為尿布就係咁得塊布,又要係咁洗,感覺好煩人;其實現在最新的尿布,連摺都唔使你摺,成塊尿布已經係尿片造型,只要好似褲仔咁穿上,用落好方便,仲要好多唔同可愛款式過你揀,感覺一啲都唔污糟、老土。
美國尿布領導品牌之一──BambioMio,今年新推了一款多合一尿布,成條尿布有晒吸濕易亁的內裡,更有可加吸濕墊的間格,當中設計最大賣點,係有可按寶寶身形而調節尺寸的啪鈕設計,可以由初生的BB,用到BB脫片期,一條尿布着足年幾、兩年,又可以留番畀下一胎,除咗方便就只可以講多句:「真係慳番唔少錢!」。

布片殼 出街方便換

咁大塊多合一尿布,帶幾塊出街同BB更換咪好重?放心!因為好多尿布公司都推出了包在尿布外圍的防水防漏的尿布套,家長只要帶上輕便的尿布出街替換即可。
另一間尿布名牌──GroVia,就推出可替換「布片芯」的布片殼,芯和殼可分開購買,精明的家長可以帶一個布片殼出街,之後替換不同的布片芯或者尿布就可以啦!小記有個建議,家長大可以在家中用多合一尿布,出街則用布片殼,咁就最慳又方便!

學習褲 唔吸濕為戒片

小朋友到十八個月大,就可以試吓穿學習褲!學習褲嘅感覺,其實幾似多合一尿布,但係就再簡單啲;原理其實係BB便便一至三次都唔會滲漏,但係因為無吸濕墊作用,會令小朋友有些許不舒適,從而學習戒除着尿布。

尿布清潔 靠梳打粉

好多人唔想用尿布嘅原因,係嫌清洗麻煩!但係我又反問你,你會唔會因為要洗衫而唔着衫?其實在BB便便後,應先用花灑冲洗(不宜用水長浸),然後再放落洗衣機清洗,而且極度建議要放在猛烈陽光下曬乾,因為尿布一定要維持絕對乾爽!如果驚洗後仍有陣異味,可在清洗過程中加入梳打粉,可幫助分解當中污垢及消除惡臭!

a.BabyOnline(26502968) 
b.Bloom&Grow(28150583) 
c.Mothercare(25041088)

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載