› 選擇地區
三藩市
紐約
洛杉磯
其他美國地區
香港 台灣 北美
 
2013年02月28日

雲想衣裳:韓模拆解 平民K-Style

睇阿徐着韓牌睇得多,就算幾平凡都可着到鬼咁Loud,韓流認真勢不可擋。不過要講正宗K-Style(Korean-Style),梗係要由韓國人把口親自解說先夠新、夠快、夠傳神。今日請來人氣韓模Yura帶路,喺香港捐窿捐罅掃盡明星平民韓貨,兼拆解K-Style文化。
記者:陳子穎 攝影:伍慶泉

模特兒:Yura @ Model Genesis

韓星力撐自己友

由阿徐一手帶大嘅Push Button同Dress Monster,港人已聽慣,甚至已儲落幾件。但係Yura話今時今日,真正着喺韓星身上嘅品牌就有你我和都熟識嘅Boy London同Bratson Tee。「前者畀BIGBAND嘅G Dragon着到鹹魚翻生,後者嘅設計師因為係G Dragon平時用開嘅Dancer嘅朋友設計,超親民嘅GD為咗幫朋友一把,仲戴埋Bratson 出品嘅Cap帽拍MV,搞到呢個品牌人氣急升,明明是男裝,女粉絲都當連身裙着。另一不可不提嘅注目品牌AWE,喺韓國亦深得年輕潮友歡心。」說時遲那時快,Yura就帶我們去到銅記一間樓上舖Off The Wall睇AWE嘅真身。「AWE全名為UNBOUNDED AWE by Laykuni,由南韓女設計師Won Jung Ku(Lay)於2009年成立,擁有男裝系博士學位兼曾於女裝品牌工作過,於是無論男裝正線UNBOUNDED AWE或女裝副線mimicAWE都帶着Unisex元素,品牌以偏鋒的圖像設計及多變的顏色配合街頭感裁剪,很快就受到外界關注,f(x)女團成員之一嘅Krystal就係Fans之一。」以上介紹三個牌子,雖然有明星撐,但絕對買得起,最貴都不過二千,最難得係韓星撐返自己友,夠十卜!

韓女鍾情歐閒風

正宗的Korea Fashion Style被Yura形容為「同男女關係一樣咁Complicated!」即係一係好Loud,一係低調到你唔信,吓!又真係形容得幾貼切喎!「其實韓國女生的打扮傾向歐洲風,喜歡悠閒和隨意的感覺,而且也愛中性打扮。至於你們日常看到韓國明星時常穿着的服飾如Neon Color、閃石窩釘一些誇張嘅造型,其實我們很少會這樣穿,舞台感的服飾只有明星才會穿。」Yura又話留意到香港女生近期都愛參照韓星的裝扮,看起來入型入格,她認為香港人比韓國更懂配襯,反之韓國女生相對仍較保守,真係估你唔到。

韓牌夠平得民心

某程度上日牌失勢,韓牌上位,與價格絕對有關。韓國出品無論質料和款式都不比日牌輸蝕,加埋港星韓星力煲,精明嘅潮友自然即刻轉軚。所以即使未必係明星着過,只要係Made in Korea一樣好受歡迎。Yura帶我哋去到最後一站嘅樓上店HERZ,集合了Complicated嘅韓貨,好斯文嘅OL服又有、骷髏骨圖案嘅Jacket又有,以至韓國女生最愛着嘅Cardigan都有,總之全部都用一個「抵」字形容啦!

韓模點睇港式K-Style?

Yura Seo(徐柔羅)
Model Genesis 模特兒韓國人,曾在北京讀書,能說一口流利國語。現在是模特兒及NOW台《Channel M泡菜粉絲俱樂部》和《Road To Seoul》的節目主持人。
「香港人仿照韓國人的打扮概念上係啱,但真正韓國人日常打扮唔會咁着!韓國女仔其實好樸實,藝人才會穿着誇張和舞台感的服飾。」

Heeju(朴喜秀)
Jamcast模特兒兼女子組合Girls Kingdom成員之一,私下同朋友夾份搞網上生意賣韓國美容護膚品。
「現在韓國十分流行穿貼身褲配寬鬆上衣作日常打扮,香港女生都拿捏得不錯,好有韓國Feel!」

EJ(蔡恩真)
Jamcast模特兒兼女子組合Girls Kingdom成員之一,去年搞泳衣生意,自己做埋生招牌做代言。
「韓國女生很喜歡穿着一些能突出腰線的Shirt Dress,突顯身形和雙腿,但香港女生剛好相反,喜歡隱藏自己的身形。」

查詢:

a.Off The Wall(2499 9839)
銅鑼灣白沙道18號4樓

b.TIKKA(2884 1111)
中環歌賦街18號地下

c.HERZ(2890 6092)
銅鑼灣富明街2-6號寶明大廈1樓G

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載