› 選擇地區
三藩市
紐約
洛杉磯
其他美國地區
香港 台灣 北美
 
2015年08月11日

【扮靚籽】鐵騎烈女 黑魂不言敗

【扮靚籽:時裝絮語】
十五歲為母還賭債輟學做調酒師,十八歲學玩「皮包鐵」鐵騎,現年十九已炒過兩次車、更失婚與愛女分離。九十後中泰混血兒李思行(Florence)屢敗屢戰,獨力賺錢養車養家,聲言以電單車作奮鬥動力,炒車後認真求教絕不言敗。上次倒地身穿背心短褲,網民邊罵危險邊將她封為女神。Florence身上衣物與妝髮,亦特為追風而備。此女子不單外表索,做事認真具赤誠之心,散發出骨子裏的烈女性格。

揸鐵騎,當然要配型到爆皮褸,Florence表示皮褸除款靚外,功能性亦好重要:「冬天最鍾意着皮褸,電單車專用或casual去街款都有買。平時有睇開電單車poster都係咁着,好型㗎!皮褸可保暖、擋風,剪裁較貼身揸車時更靈活,耐磨性高、帶重量唔會走位亦好重要。但電單車專用款嘅關節位,如手踭、膊頭位有保護墊,唔方便日常返工,所以多着casual款。風褸雖然可以防風,但太薄揸車時會飄來飄去,又會發出『蓬蓬』聲好唔方便。」除皮褸,Florence話佢最鍾意biker boots:「我不太喜歡着傳統的款式,因為太長行路唔舒服,好似機械人咁阻礙日常活動。平時出街會着Dainese biker boots,保護厚墊足夠護腳外亦較方便,之前有個朋友着波鞋揸車,一炒車就轆爆三隻腳趾血肉模糊,要裝鐵架義腳趾,所以我一定會着biker boots。」

化妝着重唔甩色

訪問當日高達34℃,Florence戴除頭盔不下十次,妝髮仍絲毫無損,原來鐵騎烈女對扮靚極有研究:「所有化妝品都會揀粉狀,有吸油效果唔易甩。最鍾意bareMinerals礦物粉底同胭脂,最後用碎粉定妝就keep好耐。」Florence戴頭盔後只露出一雙電眼:「我只用尖沙嘴龍城大藥房買十幾蚊嘅眼線液,液狀夠黑夠實又唔甩,同一款用咗五年㗎啦!」
揸鐵騎皮膚外露易曬黑,雖然Florence都曬到有手套印,但皮膚仍屬非常白淨:「我用普通Sunplay 50 PA+++防曬,最好有蘆薈冇咁乾。尤其冬天揸車吹風,皮膚真係會龜裂,薄薄搽一層凡士林好快無事。」好多女仔唔捨得剪短頭髮,原來Florence為揸車剪髮後都有後悔過:「開頭只係剪到去膊頭,後來因為揸電單車剪短方便啲,但剪完後睇唔慣又試過駁番長。長髮落車時完全戟住晒又黏黏的,頭頂壓扁髮尾又炸開好古怪,現時呢個髮型就最完美。」

FW15新品 型爆黑魂

防油防汗 不脫彩妝

歷代女騎士性感icon

「皮包鐵」烈女常被認為獨立自主又性感,其實自60年代起,已有型爆女星不愛四個轆只愛鐵騎。

60年代

瑞典籍荷李活女星Ann-Margret,於電影《The Swinger》中揸500 cc Triumph T100C Tiger鐵騎造出傳奇形象,更迷上電單車成為真正電單車手。圖中經典綠色圓鈕皮褸,搭超性感黑絲,使人一見傾心。

70年代

來自法國的絕代性感尤物Brigitte Bardot,愛電單車愛到以車為名出碟,火辣黑皮短褲配過膝長boots,一頭金髮隨風飄散,狂野迷人。

80年代

搖滾樂隊The runaways前結他手Lita Ford,1979年脫離樂隊後,punk rock精神更推至極致,銀窩釘皮褸、電結他配鐵騎實為絕配。

90年代

pop rock icon P!nk亦是電單車好手,性感緊身黑皮褸,配洗水boyfriend jeans,露出健美人魚線,90年代味極濃。

千禧世代

Kate Moss,2013年拍攝由Terry Richardson操刀的電單車品牌Matchless 廣告,完美演繹皮褸配短褲造型,更騎上教父Marlon Brando的經典電單車。

(a)Guess
尖沙嘴新港中心105號舖
(b)bareMinerals
尖沙嘴海運大廈Facesss
(c)龍城大藥房
尖沙嘴加連威老道28號
(d)YSL
金鐘太古廣場156號舖
(e)Sports b.
銅鑼灣世貿中心 G001-005店
(f)Juicy Couture
中環IFC 3081號舖
(g)Lane Crawford
中環IFC

記者:楊麗珊
攝影:徐振國
編輯:黃仲兒
美術:吳子豪

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載