› 選擇地區
三藩市
紐約
洛杉磯
其他美國地區
香港 台灣 北美
 
2016年12月15日

【寵物籽】一B兩狗兩鸚鵡 媽媽:屋企以寵物為先

【寵物籽:人寵共融】
兩隻狗,兩隻鸚鵡,再加上兩個月大的BB──在很多人眼中,共處一屋是不可能任務,鄭蘊盈(Vicki)卻不以為然,「我話我啲寵物來先㗎喎,一係我唔生,咁屋企人就冇嘢講㗎啦,哈哈!」Vicki家有一隻唐狗Elly、積羅素犬Biscuit、黃頭亞馬遜鸚鵡菠蘿及非洲灰鸚鵡番薯,自己兩個月前更成為一子之母。

相關新聞:【租狗爭議】小朋友適唔適合養寵物?玩住體驗好過租

Vicki雖然說得得戚,但當家人問及如何處置寵物時,的確傷了她心。家人的擔憂也不無道理。Vicki天生對骯髒的動物毛髮敏感,曾因此多次出入醫院,家人擔心BB會出現同樣情況。除了敏感外,Vicki還擁有一顆熱愛動物的心,「外國有研究證實由BB開始接觸啲毛,佢哋嘅免疫力會強啲,身體都會強壯啲。我啲寵物乾淨時,佢接觸應該都冇問題。」為此,Vicki特別注重清潔,每天吸塵清潔家居、隔日用清水為狗隻沖涼、寵物出街後返家要抹乾淨手腳,以確保寵物及環境整潔,「我覺得如果你養得嘅話,一定有方法,係睇主人點處理。」現在Vicki不但當了六年動物義工,更成為暫託家庭,經常照顧被遺棄的動物,BB也沒出現敏感情況。

聞定大便尿片 告知BB快來了

敏感問題解決了,相處呢?難道不怕寵物會傷害BB?Vicki認為狗隻攻擊人定必有因,「例如小朋友身體語言做咗乜,或者好大力打隻狗,或者狗有啲部位唔掂得,大人應該睇住小朋友做咗乜動作刺激隻狗。」有一次,Vicki帶唐狗Elly過馬路,有小孩故意踩牠尾巴,家長卻毫無反應,更讓她確信愛護動物得從小教導。因此早在懷孕時,她已請教獸醫如何讓寵物與BB和諧共處,「大肚時,讓狗狗多接近個肚;上網搵狗吠聲擺喺肚附近,每日聽幾分鐘;掉番轉畀BB喊聲寵物聽;BB床要早啲買放喺度,話畀寵物聽嚟緊會有BB。」獸醫甚至建議拿BB的大便尿片給寵物嗅,「生咗未出院前問護士拎BB嘅大便尿片,返屋企畀狗聞,要日日新鮮,連續聞到BB回家為止,等啲狗知道BB已出世,呢陣係佢陣味,但因衞生問題醫院通常唔會畀,我求咗好多個護士,先有一個肯畀!」
看看成果,BB出生後,一屋寵物確實並不排斥BB的存在,惟獨Elly曾有一點妒忌,「我嗰時大肚,佢好生性,每15分鐘就來望一次,好擔心。但BB出世後,佢就有少少妒忌。𠵱家相處得還可以,我唔會強迫佢。」話音未落,Elly便主動舔了BB小手一下,讓Vicki喜出望外,「未試過!之前佢一見到BB就走,成日屈住喺度發脾氣。𠵱家越行越近,BB喊會行過嚟望,路過時會望吓BB喺唔喺床。」箇中秘訣,是要有同理心,「其實係細心啲去諗,究竟生仔前後,寵物生活係點?要確定佢哋生活係一樣。」
家裏有寵物又有初生BB,是不受外傭公司歡迎的人客,Vicki最後才直接從菲律賓聘請到現在的工人Mars,「與外傭電話對談時我就好坦白咁講:『我屋企動物行先,我屋企動物係我屋企人嚟,我唔係要你鍾意,我係要你好鍾意。』」幸好,Mars愛寵物的程度不遜Vicki,空閒時便抱着狗在地上滾着玩、與牠們同睡,「總之乜都以佢哋為先,好開心請到Mars返嚟。」看她一臉滿足地凝望各家庭成員,大概為了所愛事物堅持的人,才會露出這種神情吧。

記者:封愷瑜
攝影:劉永發
編輯:謝慧珊
美術:孔文彬

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載