蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年11月09日

港慘大褲窿

20,302

我叫打工仔,做緊3 sales,住喺第一城,去百佳買餸,入豐澤買電器。為李家賣命時係日頭,睇now TV播英超時係夜晚。我唔敢追女仔,人生唯一希望,就係八號波,點知李氏力場硬係阻頭阻勢。有日,女神突然whatsapp我,「成班舊同學約埋玩board game,你嚟唔嚟啊?」我9秒9衝出門口。「咁遲嘅?玩緊大富翁吖,你中途join都OK嘅。」我望住棋盤,港島、九龍嘅地契全部賣晒,不禁流下男兒淚,「我哋香港人,已經玩到冇癮,唯一動作就係擲骰仔,睇吓用啲血汗錢嚟養肥邊個吸血鬼,點解連玩game都係咁?」
記者:彭海燕、黃碧珊
攝影:梁志永
插畫:東尼電機

政府太孤寒 令社會分化

玩大富翁,人人都可以白手興家、起樓買地,雖然常說世事如棋,可惜現實始終不是遊戲。本地作家Jason Y. NG表示,大富翁一開始都算公平,玩到最後貧富距離才逐漸拉闊,而且遊戲不設政府,現實當中,政府就應該擔當協調的角色,解決貧富懸殊問題。「香港就好似玩到尾聲嘅大富翁,加上港府太孤寒,冇提供退休保障、失業救濟金,發放福利又怕俾人呃,終令社會分化。」遊戲建基於慾望,眼下的政府也利慾薰心,「政府作為港鐵嘅最大股東,有錢賺嗰陣,唔記得自己係政府,點都保證港鐵獲盡15%盈利。地鐵嘅地產項目賺到盤滿缽滿,都唔使補貼番交通服務,又攞納稅人啲錢嚟起高鐵。」
財團佔地為王,Jason歸咎於香港缺乏民主政制。「如果香港唔落實真普選,政府就無懼選民力量,做咩都得,香港人奈佢唔何!」中央逼四大富豪就雨傘革命表態,富豪如果撤資,可否打破壟斷局面?Jason就對此並不樂觀,「港商走咗,只會換嚟中資進駐。近年中資逐漸滲透香港,以前我幫架車入油,油站多數係蜆殼,現在大多變咗中石化;街上嘅銀行,從前以滙豐、恒生為主,𠵱家多咗中國銀行、交通銀行同農業銀行等等。」紅色資本蔓延,但Jason最擔心的是新聞自由倒退。「比起商業侵蝕,新聞自由嘅蠶食更加嚴峻,你買幾份報紙,除咗《蘋果》同《明報》,其他報紙嘅立場都係親中,可見香港嘅新聞自由倒退不少!」

杯葛大財團 五年前做起

有得揀,誰願意當大集團的棋子?問題是,你意識到自己是棋子嗎?五年前,龐一鳴深感大地產商無良,決意一年「唔幫襯大地產商」。五年過去,龐一鳴早已習慣單車代步,不坐由地產商壟斷的巴士、不光顧兩大超市、不開通電話上網服務。雖然此舉感染了不少身邊人,但對大集團根本沒有絲毫打擊。龐一鳴現居觀塘和樂邨,屋邨樓齡五十年,遠離鬧市,一年前竟然也有百佳進駐。「我好驚訝,一條咁細嘅屋邨,大集團都入侵埋,就知佢哋無孔不入!」
這家「百佳冷凍食品」,店名取巧,除售賣凍肉外,飲品、零食及生活用品等貨物一應俱全。「房署有招租規定,要平均分配店舖用途,邨內已經有兩間士多,唔可以再開士多。百佳好茅,改名做冷凍食品舖頭,但賣嘅貨品同士多一樣,搶咗士多嘅生意。」就記者所見,百佳人頭湧湧,非常旺場,士多則門庭冷清。龐一鳴認為,這與大型超市大賣廣告有關,「廣告效應可以好大,只要建立咗第一聯想,大家見到呢個品牌,就會覺得平啲同有保證。咁對小店嚟講好蝕底,因為小店冇錢賣廣告。」他相信社會應該要有更多選擇,不應由財團壟斷市場,「由年輕人做起,用行動感染屋企人,社會嘅消費模式就有機會慢慢改變!」

初來港已體會「官商勾結」

在新加坡成長的著名財經評論員曾淵滄認為,生意人的最終目標就是賺大錢,不同時期不同地方都有財閥。八十年代末,他移居香港,在當時的香港城市理工學院任教,「嗰時我經常聽到,太古同怡和等英資機構壟斷香港市場。我係外籍職員,學校每年都會畀張來回新加坡嘅機票,仲指定喺太古旅遊訂最貴嘅機票。當時嘅社會怨氣冇𠵱家咁大,97之前,香港仲係英國殖民地,喺太古旅遊訂唔係俾英國人賺晒啲錢咩?唔係官商勾結?」
回歸後,英資在香港的影響力減低,本港的大家族及中資機構抬頭。現時地產、交通、超市、電訊及公共事業等的控制權,均高度集中在超級富豪手上,但曾淵滄卻稱除了電力有壟斷情況,其他範圍也有不少競爭者,沒有全面壟斷。經濟學有80/20法則,即社會上有八成資源被兩成人操縱,曾淵滄表示全球一體化,貧富懸殊的問題只會惡化,「因為社會有唔公平嘅情況,所以先會出現佔領華爾街同香港現時嘅情況。」似乎資本主義或社會主義也解決不了這個全球性問題,現今世代又能否從失敗中參透出合乎大眾利益的新理想主義?

LOW PAY:
糧油大王小店 執剩一間

賺到盡的遊戲規則,不是人人熱衷。位於西營盤的通泰超級市場,促銷花招不及兩大超市,不會「買豬肉送朱古力」,但東主李廣林自豪地說,通泰價格公道,從不向進口商收取十幾萬上架費。「財團利用市場優勢,貨品唔賣得就退貨,食咗人哋啲上架費,剝削同打擊進口商!」小店價格實惠,6包裝的250ml陽光檸檬茶,盛惠$13.5,平均每包$2.25,就算沒有貼上減價標籤,依然抵買,啱晒low pay一族。
店面空間有限,可是禾稈冚珍珠,有價值$16388的威尼斯干邑,也有甚少在大超市露面的勞工皂、海鷗牌洗髮膏及懷舊零食。接手父業十多年的李豐年說,貨品利潤未必高,只是老人家慣用這些老品牌,如果通泰不賣,他們在別處就找不到了。「只要廠商一日仲生產,我哋一日都賣,如果佢哋都頂唔順,我都冇計!」人性化的經營之道,還體現在散裝米糧之中,「我哋有好多款米,泰國米、越南米,有新有舊,街坊可以將新舊米溝埋,或者溝不同嘅米種,切合自己需要。譬如泰國米溝中國米,中國米較有飯味,泰國米較有飯香,溝埋之後就可以平衡香味同飯味。」
超市開業三十餘年,街坊伴着李豐年長大,看見「隔籬超市汽水平過通泰」,便會向他報料,調整售價,保持競爭力。通泰分店曾經遍佈旺角、北角及中環等地,但由於利潤微薄,難以高薪招聘管理專才,現時只剩西營盤一家還在營業,其他舖位全部放租,業務也以批發為主。新式超市搶走客源,但永遠搶不走老店的人情味。在通泰工作多年的鄭姑娘,大讚老闆有良心,會請員工吃飯、過節提早放工;在附近中學讀書的莊同學,在通泰找到市面罕見的馬來西亞零食,還有九折優待;被大型超市拒諸門外的小狗糖糖,在通泰招搖過市,今日還格外開恩,讓超市職員摸毛毛……如斯溫馨風景,小店限定。

唔益商家佬 幫襯邊個好

平價散賣 益群愛心超市

良心社會企業,概念是賣一蚊賺一毫,為市民提供便宜的食品及日用品,並將白米、糖果及朱古力等貨品拆散發售,減輕基層家庭經濟壓力,同時為社區創造就業及培訓機會。

九龍深水埗石硤尾邨20座103號舖

良心淘寶 138mall

香港首個非牟利網購平台,為本土小店提供免費賣物渠道,是大集團以外的購物選擇,部份貨品較難在市面找到,如全香港製造的手工洗髮水、外國引入的寵物美容用品及DIY化妝品收納盒等。

http://www.138mall.com.hk

炳江

「無自由,失自由,法院咖啡眼淚流。我求脫罪,我呃細路,阿媽都谷氣。」設計歌詞,寄調《鐵窗紅淚》

兆基

「爛地定農地,做善事我實買地。多多都夠畀,花啲心機,發展驚喜。聽我講,做夢也在捐獻。聽我講,我又獻出一撻地。聽我講,未來日子,集合全人類,共建東北!有樓齊齊建造為你急。建東北!半山豪庭跟我再追尋。」設計歌詞,寄調《唱這歌》

鶴年

「你又唔係李旺陽肚心入面嗰條蟲,你點知佢係唔係自殺?南華早報用600字嘅位recap in English,係咪太多先?人嚟,同我改到100字!」設計對白

裕彤

「乖孫志剛巧叻叻,將K11打理得有聲有色,有藝術展又有嘢賣,最啱用嚟吸引有品位嘅高消費族群。土豪旅客嫌悶咪搭城巴落旺角囉,總有一間周大福喺附近,時刻照顧佢哋買金嘅需要。」設計對白

光正

「時代是你的,租金是我的…公共空間搞展覽,一日搵到12萬…時代廣場。」設計對白

嘉誠

「吹啊吹,讓這風吹,我張臂力撐,颶風都要避。催啊催,俾中央催,資金通通帶走,楷仔也伴隨。」設計歌詞,寄調《風的季節》

諸侯一覽

果然好玩,籽在四方,即like「果籽」FB專頁!
返回最頂
香港 台灣 私隱聲明 服務條款 刊登廣告 聯絡我們 招聘 訂閱版: 飲食男女|    Ketchup|    壹週刊
© 2017 AD Internet Limited. All rights reserved. 版權所有 不得轉載