› 選擇地區
三藩市
紐約
洛杉磯
其他美國地區
香港 台灣 北美
 
2015年04月10日

【潛龍碟影】我見到佢心裏面隻鬼 - 龍叔叔

《飛鳥俠》上畫時,口碑好不過票房未有驚人爆升,好多後生仔話佢搵笨冇特技冇CG,嗰隻飛鳥又醜又冇型,仲樣衰過陳玉蓮隻神鵰,同家陣啲超級英雄爭九條街。今次又唔怪得香港片商改戲名,《飛鳥俠》只係直譯英文片名《Birdman》,以為係科幻特技大片,只係世人一廂情願嘅想法。喺《飛》狂掃奧斯卡四個大獎後,個個驚呼話走寶,DVD同BD碟甫出,銷情即時一片向好。可惜喺影碟討論區上,再次噓聲一片,高登更有大堆巴打話中伏,悶到捱唔到十分鐘云云。

朋友,其實只怪你也太年輕了。《飛》講嘅係一個成功過嘅演員,點樣喺事業低潮期,出盡法寶再次引起大眾注意,又𠱁又借搞舞台劇,就係要證明自己嘅價值,基本上係一套「中年危機自我肯定努力死撐」嘅處境劇,仲未有車有樓成功上到岸嘅七十後睇完,會特別有共鳴。
若然你好似龍叔叔咁庸碌一生,其實又冇乜所謂,最弊係後生時威過,忽然要面對自己回塘等收皮,嗰份心酸的確令人難受,惟有出盡力掙扎博反彈。《飛》主角就係恨翻身恨到癲,經常幻聽到當年扮過嘅飛鳥俠,現身同佢傾偈畀意見,猛咁push佢向前行。就好似杜琪峯套《神探》咁,慾望心魔化成厲鬼,神推鬼擁下每每不能自已。飛鳥俠就係西洋版嗰隻鬼,每人心裏都總有一隻,只爭在對你影響有幾大箒。好似龍叔叔咁,每次買碟買玩具猶豫緊嗰時,總有把聲喺背後講:「早買早享受,遲買冇得救,床下底仲有大把位!」

由蝙蝠俠到飛鳥俠

最為人津津樂道嘅,係導演採用一shot過拍攝手法描述主角經歷,拍攝同剪接難度極高。初頭係幾佩服導演嘅心思同演員一氣呵成嘅演繹,不過鏡頭不斷圍住身邊角色轉嚟轉去,而且對白又多又急,顧得畫面嚟又要追字幕,難怪好多人話睇到心煩氣躁。龍叔叔喜好睇3D電影同玩過山車,尚可頂住呢種程度嘅眼花繚亂,冇耐性嘅後生仔,都係留番啲錢月尾睇《復仇者聯盟2》實際啲。
成套戲就係講隻飛鳥俠不停出現,煩住主角指三道四。主角米高基頓有超能力又識飛,到底係幻覺定真實?其實導演借的士佬追收車資一幕,都講得好白。龍叔叔打從心底同情佢,諗起一九八九年添布頓搵佢拍咗兩集《蝙蝠俠》電影,人氣同佢嘴唇一樣紅到發紫,第三集換入韋基馬扮蝙蝠俠後,米高基頓先沉寂番。現實同電影背景類近,米高基頓演起嚟入木三分,出晒力,奧斯卡影帝輸咗畀「霍金」艾迪烈柏尼,實在可惜。
BD聲畫不過不失,有兩三幕都表現到DTS-HD MA 5.1嘅靚聲,而且成套戲不斷出現同一節奏嘅鼓聲,都幾實淨有力。Bonus例牌有演員講感受,睇埋製作特輯,就知要將咁多「散shot」併埋扮一鏡過,事前準備功夫真係唔嘢少。同樣有中年危機嘅龍叔叔,不敢怠慢,諗住嗱嗱聲煲埋套《星際啟示錄》同《多啦A夢3D》,早啲寫碟評,費事又俾編輯追稿。「仲有成個禮拜使乜急喎,開隻《FF零式HD》,打陣機先啦。」吓,邊個同我講嘢?

編輯:黃仲兒
美術:吳子豪

Profile:

幾十歲老宅男,聽歌煲碟打機無一不癡,一生最大成就便是家中收藏幾千隻碟,假日只愛潛伏家中煲碟,親情跟愛情也拋諸碟後。

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載