蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年06月18日

【科健籽】星級教練:全力扣殺 唔使剁豬肉

【科健籽:好動之城】
電影《全力扣殺》經已落畫,大笑過後印象是停留在林敏驄、鄭伊健、何超儀身上,還是激起心中那團火,有一絲重新執起羽毛球拍的衝動?未必要靠剁豬肉來練手腕力,我們找來鏡頭背後的羽毛球技術指導凌婉婷(Kelly)教番兩位Gadget Guy兩招,從基本功出發,加上有一、兩招假動作傍身,包保世界通行,打得又睇得。

星級教練Kelly,退役十年仍寶刀未老,機緣巧合下,於電視台工作的師妹請她「出山」,不是重披戰衣為港隊出戰,而是為她穿針引線,當電影《全力扣殺》教練,沒想太多便一口答應。相比何超儀飾演過氣羽毛球天后吳久秀,退役後不修邊幅,鬱鬱不得志,Kelly明顯幸福滿瀉,還有香港田徑隊前成員老公杜韋諾痛錫。至於哪位角色的羽毛球根底最好呢?「何超儀和Eric Kwok都有技術基礎,鄭伊健也不錯但球齡較淺,劉浩龍唔識打,係唯一要上堂嘅學員。」由教中小學生、訓練校隊,搖身一變教電影明星,Kelly最初不太習慣「執生」,「埋位前先臨場指導,要令演員動作協調,一個動作試四、五十次先拍。」有時配合導演想法,構思多套動作,最終方案靠導演扑槌。例如演員站上木樁揮拍打昆蟲,究竟練緊乜,Kelly為大家破解:「昆蟲飛來飛去,羽毛球亦會周圍飛,可訓練球員嘅球感及反應。」

練腕力用水樽都得

「膊頭帶動手踭,手踭帶動手腕。」道出了扣殺的精髓,原來動作運用圓周定律,Kelly補充說:「整個動作用身體作支點,將力量傳送至肩膊,轉身時肩膊嘅力量帶動手踭,然後抬高手踭,將力量傳送至手腕。」要殺得完美,手腕靈活是其中一項重要元素,初學者最大弱點「衰手腕緊」,要訓練?有辦法!電影中何超儀、鄭伊健等人以「剁豬肉」方式訓練腕力,咪以為搞gag,其實係堅work先真,「係我同導演、編劇因應故事背景傾出嚟嘅方法。」現今世代有肉類分割技術員,「剁豬肉」練腕力打羽毛球,正如《少林足球》以功夫踢波一樣天方夜譚,現實中當然有更「和平理性」又容易的方法,唔使做豬肉乜乜乜,去到邊都帶住肉刀咁有殺氣,「喺屋企可以拎住入咗水嘅水樽,八字形打轉,就可以練手腕力。」再唔係去多啲街市幫阿媽買餸拎重嘢,一盡孝心,又可增強戰鬥力,一舉兩得也。扣殺只是攻擊其中一項招式,絕技甚為獨門,基本功不夠紮實也是徒然。如果姿勢統統正確,想升呢增添難度,Kelly也醒了兩招「假動作」給兩位初學者,各位,接招吧!

教練過兩招 速成假動作

不論任何運動,技術是必須,也勿看輕策略的重要性,適量的掩眼法不是要騙人,只是出奇制勝之法。Kelly就把最容易掌握的假動作傾囊相授,初學者球路變化少,手腕不夠鬆,兩招還是可以學,於網前球適用。

假動作1 正手場區以反手放對角線

假動作2 反手場區以正手放對角線

正手發球

一切由開波開始,亂企,左右腳平排,無姿勢無實際。球拍亂握,開波怎樣夠高夠遠呢?一般而言,發球分正手及反手兩種方法,但對於初學者而言,正手較易掌握。

上網步法

「與其用手打球,不如用腳打球。」是羽毛球其中一句重要口訣,要掌握各種擊球手法,先要掌握正確步法,主要有上網步法、後退步法、兩側移動步法及起跳騰空突擊步法等。

攻防

羽毛球的進攻和防守是相輔相成的,防守是進攻的基礎,最重要能準確把球擊回對方場地,切忌因對方來球方寸大亂。面對飛得又高又遠的球,Kelly教大家宜退後放鬆擊球。

試後感

Steve:「兩套假動作都有正反手轉換,好考手腕靈活度,好在我之前讀大學嗰陣,得閒鍾意同同學搓兩板,練咗兩、三次就學識,易如反掌。」

鬼輝:「平時多數踩單車,好少打羽毛球,手腕力較輸蝕,學完都唔多掌握到。」

攝影:鄧鴻欣、楊錦文、梁志永
編輯:謝慧珊
美術:黃創泰

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載