› 選擇地區
三藩市
紐約
洛杉磯
其他美國地區
香港 台灣 北美
 
2015年08月02日

【專題籽】無壇可論聽心聲 謝志峰要做白姐姐

【專題籽:人言無畏】
周日的正午,拳頭總是硬,電視很危險。近年,看《城市論壇》變成自虐行為,血管投訴:我要爆了。當我隔着mon都快崩潰,謝志峰在現場頂了十多年,還頻說好玩。於謾罵聲中榨取理性討論空間,平衡正反兩方,是他的拿手好戲。這個公道的裁判有個不公的下場:被退休。邀他訪談,我才看到不一樣的謝志峰。

約謝志峰於港台做訪問,他到來即要求:「畀兩分鐘我剃鬚。」我目測只有1mm長的鬍子,他不說,我根本看不到。「你好貪靚。」「唔靚才貪」。好,姿整無罪。等你。「青靚白淨」的他跟我想像的不同。

稱職調解員

與其說謝志峰是論壇主持,他更像調解員,三扒兩撥擺平維園一干滋事分子。時間煉成身手。他笑謂:「總之有汗出有糧出。」。鏡頭前他一聲令下,霸氣外露;鏡頭後他與各論壇常客關係不錯。傅振中知他離任,主動跟他自拍留影。其實聽着邏輯盲無恥說歪理,真能持平?「我堅守一個宗旨,他們個個都係我老闆,我畀他們發言,但要守規矩。」他提到自己處理得稍欠得體的,是某次李偲嫣質疑為何他請何君堯任嘉賓而非她,更反問:「我口才唔得咩?」她連珠炮發,他有點動氣回答:「你同佢比?差九皮。」事後他覺得自己把話說得太死。「雖然我覺得我無錯。」罵李偲嫣會反省,不是人人做到。

EQ之王者

他在城市論壇有個外號,叫「謝狗」。「我會回應唔狗點做記者?我係看門狗。」娘親被問候無限次,他從不上心。「做得呢份工,就預咗要聽粗口㗎啦!我理解他們的怨憤,咪畀佢哋發洩下。」生勾勾的謝志峰早前還收到死人花牌,叫他一路歸西。他笑謂:「我問佢哋做乜咁破費,驚佢哋claim唔番錢。」

敢言酸秀才

自從鄧忍光當上廣播處處長,港台的中高層幾乎全面洗牌。「嘩,呢件都得?咁我可以做特首。」沒相關專業知識卻能上位,嗯,你懂的。今次不情不願地退休,政治打壓,別跟我說沒有。「港人治港 50年不變,即50年後變。派得政務官來管,一定係跟政府路線。」不服氣但抗爭不了。「難道抱大腿?我呢種酸秀才有啲傲氣,唔多,但都仲有啲。」

未來白韻琹

「我的退休大計係返工,退休前大計就係搵工。」他笑自己是隔夜電池,不知還有沒有老闆吼。他的新目標竟然係「做白姐姐」,喂,寧教人打仔……喎。「在媒體做情緒輔導,是永恒的,以前佢形象最突出。」講真香港壓力爆煲,戾氣沖天,說不定訴心聲節目能爆到jam線。「諗埋㗎啦,請專家講,講足成日都得。」除了維園阿伯,常令我有衝動打爆電視的,還有建制派的青年軍,絕招是瞪大眼講大話。「我相信好多人講嘢,自己都唔信。佢哋好坦白,會話唔入建制派,點發達?從政為咗圖利,放棄理想,邊得㗎。」見慣風浪的他說時有些感觸,正因恐怖得太赤裸。

我不是猶大

對於政改方案,他曾叫大家「含淚袋住先」,後被批評賣港,加拿大居留權成為攻擊點。「我話袋住先,唔係因為我覺得係真普選,只係戰略運用,我冇為政府說話,只係認為咁做除笨有精。如果你話我啲策略好屎,我接受;但如果話我出賣香港民主,對唔住,我唔接受。」他說時有點激動。整個訪問他罵政府施政、建制、地產商、教育制度,談出賣的確說不過去。謀略就……
《城市論壇》對政策沒甚麼實質影響力,可是它反映政府對民意的雅量。今天主持人被退休,節目被消失,這天還會遠嗎?

記者:葉青霞
攝影:徐振國
編輯:謝慧珊
美術:吳子豪

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載