› 選擇地區
三藩市
紐約
洛杉磯
其他美國地區
香港 台灣 北美
 
2016年01月08日

【專題籽】救世15年 維基大神咪盡信

【專題籽:潮流乜乜乜】
現代人有乜唔識,總會跪求Google大神指點迷津,其實,Google都係搵維基百科幫手多。1月15日,就係維基服務世人15周年嘅大日子,而中文版就有逾85萬條條目,義工更係高手雲集,包括已經做咗9年嘅20歲維基人梁忠明,以及強調抄要抄得醒嘅主席黃挺峯(Rover)。平日一秒查出歷史藝術政治情色呢樣嗰樣,點都要多謝番呢班維基人。

這班義工編輯各司其職,有人負責整理系統,有人修修補補,有人巡察違規條目,至於香港維基媒體協會主席Rover,善寫本土風物;梁忠明則對時事、政治及國際新聞較有研究,而且他小五時已獻出第一次……寫條目,真係估佢唔到,「我第一次寫嘅係《都市閒情》。」當年,他打算為心愛卡通《哈姆太郎》寫條目而註冊,後來發現被人捷足先登,「咁啱睇緊電視,發現《都市閒情》冇條目,於是順手寫咗,只係上TVB網站同睇Google,好快就寫完。」另外還有「冰皮月餅」、「尖沙咀至中環航線」等,「有時一起身會先上維基,睇我睡咗嗰幾鐘發生咗乜事。」每天大約花三至四小時,至今共寫了逾100條條目,「我唔算多啦,活躍嘅會員寫超過500個都有呀。」
近年關於偶像、韓星的條目迅速增長,日日都有更新,梁忠明只是開心地食花生,從不涉足,原來一些專寫娛樂的編輯對條目「有佔有慾,成日玩嘢。」他們會把自己不認可的偶像新聞及版本刪掉,情況有時失控得要加「保護」、僅供二級編輯改動才止息。梁忠明說:「條目不屬於任何人,所以呢種對條目宣示主權嘅做法係唔啱嘅。」又言維基百科是個自由平台,隨時可以開發自己想要的條目,不像百度,「你寫『法輪大法好』,可能聽日就去咗拘留所。」但最怕有人搞破壞亂加嘢,去年台灣「九合一選舉」,連戰指柯文哲的祖先是日軍,藉此攻擊他是漢奸,其後表示資料來自維基,令人火滾得啖笑。

「成功感嚟自幫到人,就好似去捐血」

他們每個月第三個星期五都有聚會,有賬號、沒賬號、訪客遊民編輯悉數歡迎,多數齋飲冇飯食,大家會討論時事,或者在維基遇到的問題,最多人問的有「點解我條條目會俾人刪走」。原來很多人上載自己的公司資料作宣傳,Rover說: 「如果你公司好出名,唔使靠維基宣傳都有好多人識,咁條條目就唔當係廣告囉。」又有「偽基百科話你哋抄佢喎,仲眾所周知。」Rover再答: 「偽基百科其實同維基無關,當笑話睇,咪認真。」還以為是同一堆人在自娛,Rover結巴地說: 「呃,呢個……唔排除有啲會員……」明白了。不過很多人明目張膽地引用維基的資料做功課、寫論文,Rover多番認真重申: 「唔鼓勵。」因為維基的資料未必完全經過證實,但下方會列明註腳及參考資料,應該從中再消化, 「抄都要抄得精明啲嘛。」
人來人去,二人在維基打滾多年,依然熱情未減,梁忠明笑言:「成功感嚟自幫到人,就好似去捐血,都唔知啲血會點樣用。」

維基百科大事件

15年來,維基百科在全球累積二億八百多萬次編輯,二千九百多萬條條目。中文版出名緊貼社會熱話,潮語、抽水事件、社會突發事件都會立即更新。有時還有「維基拉鋸戰」,網民惡搞某些條目,勞煩編輯不斷維護。去年還推出了app,方便時時更新。

1.遊戲觀眾怨維基放生埃

2011年,NOW的互動遊戲節目《撳錢》 指畢打街鐘樓於1913年拆卸,但85%玩家根據維基等網站回答了1908年,並遷怒維基放山埃。維基管理員於是撰文反擊,稱資料來自古物古蹟辦事處, 惟對方於2009年作出改正, 玩家冇仇報,所以再重申:切勿盡信維基。

2. AV女優年年入十大

話說維基每年都會總結最高搜尋榜,據梁忠明觀察,多年來一直打入十大的居然是……AV女優列表!(編輯興奮表示:早估到啦!)至於2015年查閱榜第一位竟是“Running Man”,用家表示要查閱每集嘉賓才決定是否下載喎;第二位?自己睇!

3. 為見偶像認親認戚

澳洲男子David Spargo為了見樂隊Peking Duk(右圖)一面,索性在維基上寫自己是成員Reuben Styles的兄弟,想入後台為其打氣。怪招當然被保安拆穿,但創意及勇氣讓Reuben折服,邀請他到後台。另一成員Adam Hyde則笑說,永遠不要盡信維基。

4. 畢業致謝買Tee

學阿主席Rover話齋,凡事考證,不能盡信維基。但年年畢業季,網上都會出現一件件印有畢業生剪影、寫上“Thanks Wikipedia”的T-shirt出售,表示「畢到業靠晒你」的感謝之情。

維基百科建站15周年香港區慶祝活動
日期:
1月15日
時間:
晚上7時
地點:
銅鑼灣Think Café(2155 9677)

記者:陳慧敏、葉青霞
攝影:劉永發
編輯:陳國棟
美術:吳子豪

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載