› 選擇地區
三藩市
紐約
洛杉磯
其他美國地區
香港 台灣 北美
 
2016年02月28日

【專題籽】改善學童記憶力 中大生迷宮app攞獎

【專題籽:九十後話】
特殊學習需要(Special Educational Needs,SEN)學童,即是在認知、情緒、行為或溝通等發展有障礙的孩子。包括自閉症、專注力失調及過度活躍症、讀寫障礙和語言發展遲緩等,但智商與一般學童無異,往往因集中力不足等問題而被標籤。四名中文大學學生,去年設計了一個迷宮遊戲的手機程式,助他們改善記憶力,走出學習胡同。

林偉堃、葉嘉信、梁敏灝、司徒信傑,四名加埋唔夠100歲的九十後,是中大計算機科學與工程學系三年級學生,趁去年放暑假空閒,經朋友介紹盲舂舂參加一個名為「三星Solve for Tomorrow 2015」的手機應用程式設計比賽。 從20個特殊教育訓練中選其一參賽,他們於是用四個月時間設計了一個迷宮遊戲手機app,協助專注力失調及過度活躍症學童改善短期記憶、專注力和操控平板電腦的手部協調能力,最終擊敗近40個對手奪冠 。
這個程式名為“Galaxy Maze”,驟眼睇只係一個簡單迷宮遊戲,純粹是帶球穿過一關關的迷宮到達終點,但睇真啲,心思有唔少。遊戲分「經典」和「冒險」模式,「經典模式」會根據玩家的過關完成時間,調節下一關難度;「冒險模式」則是家長可隨意調校迷宮難度、設定迷宮起點和不同食物道具的位置,才交由學童控制,讓小球收集所有食物道具過關;還有自動錄影和上鎖功能,等家長可翻睇小朋友過關時遇到的困難,同時避免沉迷。其中製作成員林偉堃說:「我哋覺得要小朋友玩平板電腦嘅遊戲好容易,但往往缺乏親子互動,好似家長畀部平板電腦小朋友玩就搞掂,我哋希望家長可以陪小朋友玩,指導子女點樣喺迷宮搵出一條正確嘅道路。」

網上自學又問朋友 四個月完成

四人團隊叫“WHAT is LOVE”,寓意如何製作「有愛嘅app」,不過林偉堃透露,選擇設計協助SEN學童改善學習app,自己卻不知SEN是甚麼,直至參觀協康會服務SEN學童的中心,才知多一點點,「參觀後先知學童係因為患病,先令到佢哋嘅專注力同記憶力較薄弱,導致學習進度比其他學童慢一拍。」
中心裏的設施色彩豐富,以吸引學童注意力,啟發到負責設計程式介面的林偉堃,以太空為主題,「太空可以給小朋友一個想像空間。」遊戲所有圖案由他親自設計,其餘組員就負責撰寫程式。四個月內,四個九十後用課餘時間,網上自學或請教朋友,由零變有。今次參賽亦堅定了林偉堃畢業後從事IT介面設計的決心,「我覺得香港人有很多創意,只係以前冇乜人重視同發掘,不過近年我睇到香港開始重視呢方面,相信未來會有更加多科技創新嘅人才。」

協康會評審:可訓練專注力

協康會助理總幹事歐陽偉康是今次比賽評審之一,Galaxy Maze之所以奪冠,他解釋勝在夠全面和多心思,「坦白講迷宮遊戲唔算複雜,但過關過程中往往講求專注力和手眼協調,而且佢哋能夠喺時間唔多、只係短短幾個月就設計出有錄影等多個輔助功能嘅學習遊戲,確實照顧到特殊學習需要,好欣賞佢哋用心設計。」該程式今個月就會在 Galaxy的平板電腦上架,到時協康會就會開始進行個案測試成效,預計一年後可於Android手機的Google Play下載。
1963年創立的協康會,為學前至青年階段的SEN學童提供訓練和輔導,每年服務逾萬個家庭。歐陽偉康補充,該會目前都會用一些手機遊戲程式,提高SEN學童的學習興趣,「手機app嘅視聽效果可吸引小朋友,提高專注力。其實SEN學童係有能力學習,只係需要多啲時間同特別技巧,我覺得現今香港社會,呢班學童需要機會同關心,越早獲得支援越好,尤其六歲前係腦部發展嘅黃金期。」

記者:余 瑋
攝影:陳永威
編輯:謝慧珊
美術:楊永昌

部份圖片由受訪者提供

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載