› 選擇地區
三藩市
紐約
洛杉磯
其他美國地區
香港 台灣 北美
 
2016年03月17日

【專題籽】$0.5/min咖啡任飲 共享空間賺人脈

【專題籽:舖仔小店】
對很多人而言,咖啡店,辦公室也,最後一口咖啡,是自己一日未飲完一日都係客的憑證。最好有個具份量的膀胱,確保工作完成前不用含淚告別靚位。印度裔棟篤笑匠Vivek Mahbubani(阿V),平日找地方度gag時都有類似經歷,所以才如斯喜歡$60任飲兩小時的Think Cafe。一年多前,老闆江鋒(Mark)還開設了5毫子一分鐘的共用工作空間「想+立刻」,為一人公司及自由工作者提供「落腳點」,撮合各路人馬,連阿V都「賺」到不少人脈。

鏡頭前高呼:「唔飲到手震我唔走。」阿V說的當然是笑話,但對於飲杯咖啡都要留意自己飲剩幾多,怕遭白眼怕被趕的人,真是笑中有淚。開業六年的Think Cafe,一直提供buffet式任飲,淨飲當然無癮,阿V認為這裏似個offline交友平台,讓他結識五湖四海得意人,賜他新意念。「我喺呢度表演,試過識到一班人,逢星期六成堆出嚟玩,但規矩係活動唔可以重複,每個禮拜都要玩新嘢,好啟發到我,原來咁都得。」面對面傾偈,總係有火花。好彩這裏活動多多,除了棟篤笑,市集、講座、展覽、工作坊甚麼都搞,一間cafe隨時變身又還原,給大家好多藉口跟人搭訕。講到搭訕吹水王,一定要數這裏的老闆Mark,跟他鬥多口水,只會輸九條街。「facebook的feed會不停更新,同樣道理,只要坐喺度,Mark就會忽然走過嚟,問我有冇新嘢想試。」初認識Mark,你會覺得佢個腦構造奇特,意念多到講極唔完,阿V漸漸跟他由合作夥伴變成好友,「他會向其他人介紹我,成日幫我諗點樣擴展生意,絕對唔係為自己利益。」阿V大讚Mark的心態是win win。聽畢這個例子,記者暗忖:hey,佢同你friend,這樣很正常吧!好,繼續聽落去。

兩小時工作 Freelancer劃一收$400

帶電腦到cafe返工已成常態,Mark年前乾脆多租一層,設計成共用工作空間「想+立刻」,「出去做嘢,最大問題係去唔到廁所,唔可以置機不顧。」要安心做嘢,還是該遠離cafe,去有cafe感的工作室又如何?這裏有WiFi、影印、儲物櫃、會議室、一星期七日24小時開放、樓下cafe仲會無限供應咖啡茶水,就連零食都有,讓人有在家開工的感覺。「我哋逐分鐘計,五毫子一分鐘。」喂,夠彈性,確吸引。好多人想找個安靜的落腳點工作兩、三小時,尤其freelancer。「當然可以畀月費租啦,但你要佢哋每個月拎幾千蚊出嚟,佢哋又未必需要。」首一小時$39,之後每個鐘才$30,租用方式夠彈性,與一人公司及freelancer一拍即合。阿V說在這裏工作,容易遇上知音人,「自僱人士之間好似有第二個共通語言咁,唔會再講收入唔穩定喎呢啲,邊個唔知箒。」大家可以交換心得,講吓點樣解決困難,one man band都可以有幾個同事咁,又幾warm喎。
資源共享可算是新興概念,共用辦公室是典型例子,不過更值得共享的是人脈!Mark原來另外創立了中介網站平台「立刻開工」,把中小企及freelancer連結起來,你出job我接,由他們作中間人統籌,省卻雙方磋商時間,「我哋將通常可以喺兩小時入面完成嘅平面設計、文書、剪片等工作標準化,服務劃一收費為$499,freelancer實收四百元。」開始工作前資方要備好材料、定好方向,工作是1到2,不是由0至1,相對簡單。心裏心裏仲有萬千個謎?平台疑問解答見於文末。
採訪當日,有很多幫襯過服務的小公司創辦人都表示滿意,覺得這個年頭創業比以往容易,無論在網上按幾個鍵買個服務的商戶,或接了工作的freelancer,都異口同聲說喜歡親身到工作空間見個面,一同完成工作,然後結識其他小公司老闆,各種機遇充滿在這小小的空間。本來孤軍作戰,力量忽然聚合,其實可以很強大,Mark說:「店不用大,但網絡要廣,說到底做生意都係講人脈,以前啲人成日話文人相輕,文人互相唔鍾意,我會話商人互撐,只要大家互相信任,經營成本就會減低。」阿V又補充:「有時樓上嘅人做咗成日好累,會落嚟cafe睇睇有冇乜表演可以睇,我都因為咁認識咗好多中小企老闆 、員工,呢個地方的確擴闊了我嘅人際網絡。」共贏就是大家一同有增長,「共享」在這兩個小小的空間,確實發揮不錯。

Think Cafe

‧$60任飲兩小時
‧經常舉辦不同活動,例如市集、講座及棟篤笑等

想+立刻

‧共用公作空間
‧首一小時$39,之後每分鐘$0.5
‧提供WiFi、影印機、儲物櫃及會議室設備,還可任飲咖啡等飲品

立刻開工

‧網上接Job平台

「立刻開工」有疑難?

問:
劃一收費$499,係咪想蔗渣價食燒鵝,剝削設計師、攝影師?
答:
錢的確不多,但設計師都覺得尚算公道,因為的確是兩小時能完成的工作。聽畢客戶方向,有問題可選擇不接。
問:
有冇手尾跟?會唔會改到天荒地老?
答:
客戶收貨後如要改,須加錢,設計師如覺不合理,可選擇不改。
問:
有其他更高薪的工作嗎?
答:
客戶與設計師可保持聯絡,如客戶有大型、較複雜的工作,雙方可以自行議價。

Think Cafe 銅鑼灣駱克道491至499號京都商業中心19樓B

想+立刻 銅鑼灣駱克道491至499號京都商業中心21樓B

記者:葉青霞
攝影:劉永發
編輯:陳國棟
美術:利英豪

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載