蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年04月06日

【專題籽】大人時間播放 鬼鬼哋主持撐起兒童節目

【專題籽:胚芽故事】
TSA問題:「細個睇《430穿梭機》的A,東面嗰個B睇《閃電傳真機》大;坐喺B西面嘅C只係記得《放學ICU》的蔥蔥,問到底𠵱家無綫兒童節目叫乜名?」TSA問題係咁刁轉㗎(好似係)。大人固然答唔出,你以為小朋友實識答?朝八晚六返學補習做功課上興趣班無縫緊接,四點五十分坐喺屋企睇電視?咪玩啦!且看今天開台的ViuTV兒童節目《快樂童盟》又可唔可以憑講流利廣東話的外籍主持,加上在「大人時間」六點半播放,修補小朋友與電視的關係。

Sunny哥哥、黑白殭屍、烏卒卒、麥偵探、芝士學堂老鼠、認字特警、蔥蔥,揀一個鍾意嘅,立即暴露年齡。那些年冇咁易輸在起跑線,放學搏老命做功課,就係為咗開電視的神聖一刻。細個小學雞時,為的真是兒童節目的不同環節,裏頭角色可以記到𠵱家,看着主持扮演動物以至食物,真的能投入其中,對他們的真實名字及角色都很了解。節目中間播放的卡通片固然也是重點,但不能否認,很多主持即使回想起來仍很有親切感。到較高年級,扮大人的心理作祟,漸漸對那些「大哥哥大姐姐」嗤之以鼻,然後還以「我已經不看兒童節目」為榮,忘了守在電視前的儍癡癡。小時候在兩個電視台之間馬拉松式遊走,無綫的卡通好看,亞視的《機靈加油站》有歷險遊戲,小朋友要鬥快完成,看着已覺緊張,走到幾乎要親吻電視般近,𠵱家亞視連台都執埋,俱往矣。

國際化主持 識講廣東話

現在細路隨時比banker更日理萬機,可是兒童節目的時間卻沒因應實際需要調節,兒童節目無兒童睇,香港真係好詭異。街訪一堆小學生,只有一個同學仔能喊出一個《Think Big天地》主持,其他全部連節目名都想不起。《快樂童盟》能否闖出新景象?如果播放時間延後至六點半,捧場細路依然冇乜,會唔會係教育制度把新一代陰乾了?
視野越闊越好,與其只向北望,不如望埋東南西!一個兒童節目,連國際關係學者沈旭暉都留意到,仲要喺facebook留言推介:「起用烏克蘭、俄羅斯、英國等的香港人擔任主持,在今時今日的氣氛極為破格,對培養新一代國際視野相當重要。」兒童節目離不開幾道板斧──短劇教知識、同小朋友玩遊戲、語文科學生活百科大包圍,《快樂童盟》一樣有呢啲框架,但十一個主持中有九個識講廣東話嘅鬼鬼哋主持,的確新鮮。他們當中有學生、模特兒、老師、調酒師、健身教練,有人字正腔圓有人講唔正但幾cute。我同呢班真.香港人傾過偈,硬係覺得有人幫佢哋配咗音咁,有趣!培養「國際視野」梗係細細個開始最好,節目會教授主持家鄉的風俗知識,唔會嘥咗班主持的特別背景,但佢哋同時又會教中文成語,幾搞鬼。

難頂刻意hyper 拒講嘢高八度

兒童節目都有個通病,小朋友演出一係誇張作狀,一係機械式背稿,違和感達到ifc水平。即使成年主持也同樣刻意hyper,睇到人雞皮起咗收唔番!《快樂童盟》主持稱他們大部份環節都沒有講稿,強調真實感。主持Victoria說:「小朋友係畀即時反應,鼓勵佢哋諗嘢,有自己諗法,我哋都成日爆肚。」小學及中學都就讀香港學校的巴西及巴基斯坦混血兒Khani:「細個唔鍾意睇《閃電傳真機》,就係因為唔鍾意佢哋over-reacting。電話響會好誇咁講:『嘩,個電話響呀。』」主持Asha:「我發現啲小朋友好驚錯,好想所有嘢都一百分滿分。我哋做戲劇就係想佢哋放鬆,想佢哋做番個小朋友,玩遊戲時我同佢哋講我哋可以一齊樣衰,我哋唔係平日佢哋見到的『大人』。」
六點半一般來說已經係「大人時間」,不過新台就把通常五點左右播放的兒童節目,延至六點半才播出。主持Ansheles說:「六點前會播卡通,跟住小朋友可以同家長一齊睇六點的新聞報道,再睇兒童節目,等佢哋睇埋新聞。」睇得出諗過度過。呢班主持有人土生土長,睇你我他耳熟能詳的兒童節目,也有人愛看家鄉節目,佢哋表現如何,真係拭目以待嘞。

無綫兒童節目

《跳飛機》:1976-1982

《430穿梭機》:1982-1989

《閃電傳真機》:1989-1999

《至NET小人類》:2000-2004

《放學ICU》:2005-2015

《Think Big天地》:2015~

亞視兒童節目

《醒目仔時間》:1979-1985

《500飛虎隊》:1985-1987

《新飛虎隊》:1987-1989

《飛虎隊》:1989-1991

《出位放送組》:1991-1993

《德尊老師》:1993

《精靈校園》:1993

《機靈加油站》:1993-1996

《完全電腦手冊》:1996-1997

《精靈一族》:1997-1999

《亞洲電視兒童台》:2001-2007

《有腦E班》:2007-2009

《媽媽不懂的事》:2009

《通識小學堂》:2009-2014

《我們這一班》:2014-2016

ISIS睇《天使得得B》減壓?

講起經典兒童節目,不能不提BBC製作的幼兒節目《天使得得B》,難以形容的怪笑實在難以忘記。都市傳聞小朋友睇完會蠢、會呆,又有人撐它有齊黑白黃皮膚,再加上疑似是同性戀的Tinky Winky,好大愛平等喎!早前有報道更指恐怖組織伊斯蘭國(ISIS)成員會觀看《天使得得B》減壓,加劇《天使得得B》的傳奇。

不同世代睇啲乜?

七、八、九十以至千禧後觀眾看甚麼兒童節目?對哪些主持人有印象?對新電視台的播放安排、主持組合,又有沒有睇法?聽大家講兩句。

記者:葉青霞
攝影:劉永發、鄧鴻欣、伍慶泉
編輯:陳漢榮
美術:吳子豪

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載