› 選擇地區
三藩市
紐約
洛杉磯
其他美國地區
香港 台灣 北美
 
2016年05月18日

【專題籽】青靚白淨後生仔 專畫樣衰公仔 聯和墟餃子皮賜我力量

【專題籽:舖仔小店】
自問身懷麻甩靈魂,所以在眾多網絡插畫師當中,偏愛“Nothing Serious”的諷刺性作品。他的畫線條簡單、角色樣衰抵死,卻有獨特魅力,吸引逾十一萬人讚好。明明喚作Nothing Serious,內容卻深入認真,由水貨客、自由行,講到地產霸權,盡訴香港人心聲。每次大笑過後,總是換來苦笑。有誰想到,麻甩畫風竟是出自一位青靚白淨的年輕人--蘇逸傑(阿傑)?雖然上水早已淪陷,滿街藥房金舖,普通話多過廣東話,但相距不遠的粉嶺依舊可愛。跟隨於該區長大的阿傑踏入聯和墟,在這宛如時光倒流的地方尋他口中的「靈感餃子皮」,竟然頓覺歲月靜好。

阿傑四年前於中大中文系畢業,曾在「大台」做了兩年編劇,後來辭職專心畫畫,明明只有二十六歲,說話卻非常認真,只見他一本正經地畫着樣衰公仔,違和感達百分之一百。在粉嶺長大的他,喜歡訪尋小店,缺乏創作靈感時,都會踏單車到聯和墟,逛逛人來人往的舊市街叉電。當中最愛到精華製麵廠買餃子皮回家包水餃吃,堪稱「靈感餃子皮」,口感煙靭又比其他地方的滑,最適合食咗先畫,「呢度啲餃子皮同超市一包包買返嚟嗰啲好唔同,厚薄適中又唔會太黐手,每塊都好易分開但又包得好。」製麵廠雖然有個「廠」字,面積其實不足二千呎,人手只得六十歲的老闆馮新(馮師傅)及其太太二人,專門售賣各種中式粉麵及手做餃子皮,而且只設門市零售。

老闆「脫節」唔賺盡 「呢啲就係良心」

精華始於一九七七年,原籍佛山的老闆吳序三因為年事已高,二〇〇〇年曾打算結業,於一九九七年加入精華的馮師傅,既與老闆熟稔,又不捨招牌就此完結,決定接手,改做門市不做批發。至今一晃十六年,師傅仍沿用舊招牌,顧念主僕情之餘,他更笑說:「我覺得呢個招牌幾好,代表我哋將麵做到最精裝。」店內放滿舊式透明膠架,裏面全是各式自家製蝦子麵及全蛋麵等,包裝欠奉夠原始,記者不禁問阿傑,年輕人不是喜歡在超市購買花款多又吸引的日韓即食麵嗎?阿傑認真地答:「嚟精華買傳統麵,因為食到心機,你食過就唔會想再買其他,而且每次嚟都可以同老闆、老闆娘有講有笑,仲會教我點煮,呢啲超級市場唔會有。」馮師傅在旁搭話:「我哋自己出品,發自良心,當然想人人食到最原本嗰種味道,咪多口教兩句囉!」
馮師傅的麵確實款款用心,最受歡迎的蝦子麵單是打麵的湯就要熬六、七小時,全部真材實料,再加打麵、蒸熟、烘乾,整個過程就要三天。到訪當日,店內掛着沒有鹼水的懷舊掛麵,另外又有可作甜食的掛皮,兩者均要風乾七日七夜,禁不住問為何還賣甚少人認識的掛麵,馮師傅說:「唔知幾多婆婆嚟買呀,冇後生仔買啫,佢哋都要食㗎嘛!」
至於阿傑最愛的餃子皮,每天新鮮製作,為免變壞,馮師傅更會事先詢問對方有多少人吃,再決定份量,「我哋又唔係要賺到盡,冇落防腐劑擺唔耐就擺唔耐,我反而唔想佢哋買到返去浪費。」阿傑瞪大眼說:「人人都知𠵱家舖租有幾貴,理應賺得一毫得一毫,某程度上師傅其實幾脫節,但我好欣賞,呢啲就係良心。」每次經過精華,他也會購買手工麵或「靈感餃子皮」回家自己包,雖然吃完未必一定有靈感,但心底很怕馮師傅會做不下去,惟有每次經過都買點東西。
自一九七九年入行至今,馮師傅日日朝六晚八,養大了一子一女,但是長期站立導致靜脈曲張,曾做過兩次手術。想退休嗎?他笑說:「退休又太早,𠵱家對住街坊可以傾吓偈又真係幾開心,做得幾耐得幾耐啦,有客人搬到好遠或者去咗外國都會返嚟買,遇着我休假會好失望!」由細食到大的阿傑,心底也很擔憂有天嚐不到精華的味道,趁着訪問一探究竟,馮師傅再說:「就算我唔做,都會頂讓畀年輕一啲嘅,想將招牌延續落去,而且會揀一個有經驗嘅,有唔識嘅我可以教佢。」

惜小店唔只靠把口 「人人捍衞傳統」

記得初看Nothing Serious的作品,有個介紹小店、叫「邊行邊食」的系列,阿傑今次也特意為精華畫了一幅特別篇,他感嘆:「行商場冇咗時間性,日頭同夜晚一樣光;冇咗季節性,氣溫全年都係廿五度;冇咗味道,你只會聞到空氣清新劑,要行小店先會感受到生活質感。」這一系列旨在叫生活在這城市的人反思,我們口裏說要珍惜小店,但身體卻很誠實,事事以方便為先跑去幫襯連鎖店,到人家結業倒數就跑去打卡,「唔係唔可以有金舖、藥房、連鎖店,但想小店都可以並存,希望有日人人都有種捍衞傳統小店嘅自覺。」

精華製麵廠
粉嶺聯和墟聯安街37號地下

記者:陳穎欣
攝影:徐振國
編輯:陳國棟
美術:孔文彬

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載