蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年07月04日
馬上成為壹會員

【歐國盃新丁】冰島點解咁多臣 也無麥記也無蚊

講到近期最爆嘅國際大事,當然首選英國人主動公投脫歐啦。但點都估唔到,佢哋居然會喺短時間內「被」二度脫歐,講緊嘅就係歐國盃16強比賽入面,「最強」嘅英格蘭億萬大軍,居然俾冰島嗰班無名小卒以1:2淘汰,提早放暑假,真係震驚了唔止13億人。除咗喺2008年宣佈破產,冰島呢個同香港相隔9,500多公里嘅北歐小國,真係好少進入我哋眼簾,對佢自然所知甚少,睇完以下呢7個關鍵詞,或者可以加深番啲認識。

人口:冰島人口唔夠33萬,首次躋身國際賽決賽周,就擊敗咗人口多成160倍嘅英格蘭,認真犀飛利!

火山:冰島係一個火山島,全國擁有200至300個火山,而且每4年就爆發一次。所以出局之後,英格蘭名宿連尼加都嘲笑,泱泱大國居然輸畀一個火山數目比職業足球員仲要多嘅對手。

工時:雖然冰島喺2008年破過產,但佢哋唔算好懶,平均每周工作43.5小時,係歐洲入面最長嘅,但對於超過50小時嘅香港人嚟講……唉,繼續做嘢啦,仲講!

麥當勞:冰島係全世界人均飲得最多可樂嘅國家,但同可樂老是常出現嘅麥記就冇咁好命了,喺2009年,冰島經濟最不景嘅日子,最後一間麥記宣佈結業,M字招牌自此絕迹冰島,據聞原因係成本太貴喎!

臣:冰島球星古莊臣、隊長艾朗根拿臣、反勝功臣史基賀臣,佢哋之間都有一個共通點,就係個名入面都有一個「臣」。因為冰島人會喺父或母嘅名字後面,加上d萡ttir(女)或son(男)嚟做姓氏,所以23位冰島足球員,全部都係「臣」!

蚊:巴西里約熱內盧奧運會將會喺8月舉行,但係因為伊蚊傳播嘅寨卡病毒喺當地肆虐,已經有唔少運動員宣佈退出,如果比賽移師冰島,相信佢哋一定會回心轉意,因為嗰度係冇蚊嘅!


維京:冰島人是維京人的後裔,佢哋擊敗咗英格蘭之後,球員球迷一齊拍手吼叫嘅慶祝動作,據說都係嚟自維京傳統,唔知將來仲有冇機會見到呢種特別嘅慶祝方式呢?

資料來源:LandLopers、FIFA
記者:陳國棟

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載