› 選擇地區
三藩市
紐約
洛杉磯
其他美國地區
香港 台灣 北美
 
2016年07月12日

【憂鬱星期一】名人無懼返工 教你Monday唔blue的法門

星期一要起身返工,好多打工仔都會無定向憂鬱暴躁。
點解謝志峰、鄺俊宇、胡孟青可以無懼星期一,笑着忙,越做越起勁。點解呀?點解呀?點解呀?

「即使咁忙,我同你仲講到咁開心,證明傳媒呢個行業真係好吸引,係妖來的,係魔來的,要你為佢做到死都願。你覺得係老闆出糧畀你做你鍾意嘅事。」前《城市論壇》主持、傳媒人謝志峰認為想無Monday blues最緊要係搵到你肯笑住忙到甩轆o既嗰份工。但星期一朝早真係好呆,魂魄唔齊咁款,點算好呢?「起身跑15分鐘步,15分鐘就可出到成身汗,你整個人當天就很活躍,包括腦筋,成日狀態都唔錯。」只顧叫苦連天?他認為應該令自己世界不只得份工。「運動、見識、交朋、吹水、飲啤酒,乜都得,千萬唔好呆咗响度。」

他認為行高壓手段的老闆都有責任。「你要佢做到殘,做到謝,只係殺雞取卵。好多老闆唔醒覺,因為快,一壓就有效果,你壓死咗佢,係可以請另一個,但你請得幾多個?」老闆以為自己精,打工仔都唔呆的。「良禽擇木而棲,佢都識得搵好樹,好樹就係讓佢有好發展機會,有夢想的工。」

「想冇Monday blues,首先你要遇上唔會令你blues的老闆,區議員、作家兼註冊社工鄺俊宇認為老闆最緊要當員工係一個「人」。「動之以情好重要,你一定要將心比己、有同理心。換轉你被人留低做晒成team人工作,你都唔想啦!」

可惜的是老闆這種生物,唔係我爆佢,佢就會「銀芽」爆炸,打工仔改變到啲乜呢?「你要搵你工作崗位的意義,慢慢將工作成為你滿足感來源。子華神講過『我真係好鍾意返工,係鬼上身先會咁講』。冇人打第一份工就邂逅到你終身職業,每個人都要試下四周圍撞,到某日你總會撞到適合你的方向,路就比較順。」

喂呀,但真係忙到咖啡當水飲咁滯喎?「人生應該要忙,忙係一種幸福,因為代表你有價值代表你的崗位需要你。我成日講笑話『舒服係留畀死人的』。」佢認為打工仔要把握好自己每日最高生產力的「黃金兩小時」,做嘢爽手啲,無咁辛苦,自然就無咁blue!

資深財經評論員胡孟青(青姐)說:「我還要兼顧湊仔,根本沒時間去諗,唔好話blue,我根本忙到五顏六色,七彩。」她一日做足20小時,幾乎一星期七日都係咁,但係就好識得找平衡點:睇韓星演唱會!「我同成班朋友,鍾意一齊去睇BIGBANG、CNBLUE,我哋好鍾意鄭容和,又鍾意EXO。」青姐講起睇騷眉飛色舞,變身小粉絲。其實專業人士的壓力一樣大,更要發展自己的second career及second llife。世界咁大,份工唔應該係全部。「寧願你向前行一步,看看世界還有啲乜,有冇可以令你發展的空間。」

記者:葉青霞
攝影:陳永威

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載