› 選擇地區
三藩市
紐約
洛杉磯
其他美國地區
香港 台灣 北美
 
2017年01月08日

【文具畫展】4字頭畫家無懼捱餓 童心未泯創作飛船膠紙座

如果十八廿二賺到大錢就係人生勝利組,步入四字頭的畫家莫俊浩(Noel)應該寧願做一般人眼中的傑出廢青。外表好young嘅佢同「中佬」兩個字,一打大纜都扯唔埋,佢啲畫都有一點點孩子氣。

Noel曾經做過電話sales,出糧見到銀行戶口好多$,但佢笑唔出。「係咁sell自己不想sell嘅嘢,做咗十幾年覺得很麻木。」佢決心轉行,經家人介紹, 投身咗老人服務行業,仲重拾番畫畫興趣。佢特別喜歡為老人家畫速寫,過程中仲會同佢哋傾偈。「記得幫一個老人家畫完送幅畫畀佢,佢係咁流眼淚。」一幅人像寫生,可以連結兩個世代,畫作力量不能小覷。「喺老人院做係咪好灰呢?我又唔覺得,同老人家溝通好開心,亦提醒自己要珍惜當下嘅時間。」佢認為人生係減法,所有嘢都流逝緊,有目標一定要快啲去達成。「過去我做sales,其實錯失咗好多,浪費時間做自己唔鍾意嘅事。」

「我依家四字頭,可能好多人眼中,我係個不切實際嘅人,寧願走去做份人工少一截嘅工。好多人認為畫畫搵唔到食,會餓死,但如果只係為咗賺錢而生活,咁我寧願揀肚餓。」呢個社會人人催你成熟啲,come on,但係做James又係咪一定唔好?佢keep住初心,唔想太世故。佢啲畫有個小朋友角色,叫皮蛋。「皮蛋代表心內有童真嘅我。鍾意畫畫嗰團火未熄,所以先有皮蛋呢個角色。」

最近佢喺西營盤文具店blank開畫展,六幅同店內文具有關嘅畫作,充滿創作力量同幻想。「將筆盒變成畀吸血鬼瞓嘅棺材;膠紙座變成飛船;鉛筆刨變成機械人。」靜態文具加兩分創意,可以趣怪得意。畫作走懷舊日本漫畫路線,因為佢細細個就鍾意日本動漫,而且對舊嘢有情意結。

Noel早前曾自資出版圖文集《街簿》,記錄佢對生活有感覺嘅事,其中三年前畫的《一個車位‧一個床位》,依家竟然成真了。「變咗真實啦,啲劏房劏到咁細。有啲人可以有錢到買個位畀架車住,但有啲人連車位咁大嘅地方都無。」土地問題,真係講三世都講唔完,為咗層樓,勞力是無止境,sosad。離咗題,場內除咗六幅文具畫作,還會展出《街簿》其他作品,得閒可以去欣賞下。

記者:葉青霞
攝影:劉永發

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載