› 選擇地區
三藩市
紐約
洛杉磯
其他美國地區
香港 台灣 北美
 
2017年02月15日

【真瘦身男女】肥妹李嘉欣從2分變6分 肥仔兵Bryan跑渣馬

「我真沒想過有拖拍!」Katrina說。
「我都有拖拍嘅,不過一直都唔開心,簡單講即是做兵。」Bryan也說。

相關新聞:【最萌身高差】當183cm愛上150cm 「錫得耐會頸痛」

Your Face,Your Fate,去年我們訪問過花三年時間,用運動由210磅減到130磅的李嘉欣(Katrina),講她的慳家減肥經歷。為了堅定志向,諗住「大鑼大鼓就冇得縮沙」,她成立了一個減肥專頁,聚集同道人交換情報互相扶持,識了由289磅減到現在230磅(最好成績220磅)的男朋友陸佑銓(Bryan),兩人齊齊練跑,由「死都唔做運動」,變成現在的馬拉松情侶。

「重口味」、「我唔食肥膩嘢」、「我行路快過你跑步」Katrina早聽慣聽熟,心直口快唔講邊有得笑嘛,大家哄笑吓就過,「我一直都在低谷裏生活覺得沒人會喜歡自己,所以聽到這些說話時,我都覺得是理所當然的。」三年前健康問題,痛定思痛立地減肥。Bryan:「我由細到大都肥,最肥的時候已經去到接近300磅(289磅),完全不懂去打扮,和尚頭啦剃到好短,T shirt有咁鬆着咁鬆。因為肥的時候好怕熱。」身高183厘米,都識到女朋友,不過,「以前的心理狀態是,是我做錯甚麼嗎?讓女友發脾氣,但現在回想,那時根本沒互相尊重過。」

自我放逐多年,與Bryan初次見面時Katrina大約160磅,但仍穿鬆身舊衞衣同運動衫,護膚、化妝零概念,連她自己都說個look仍屬「災難級」,「諗住化妝即是BB cream,CC cream抹上面捽兩捽,點都好啲。點知佢一見我就叫我『抹咗佢啦』。」對眼反到上頭頂。Bryan㩒住佢個頭笑:「其實你看過她FB,第一次見面我真感受到她盡力了,咁我想識你個人唔係識你個樣嘛,都OK的。」他們在網上聊天兩個月,Bryan請健身教練,篤到實做器械;慳錢Katrina就靠意志力,日日運動,計營養計卡路里,一直在專頁上貼出不同的營養資訊,專心致志,那團火,Bryan看在眼裏,「佢真係好犀利。佢真係由一個波,減到變番個人喎!這麼艱難的減肥她都靠意志力做到了,未來還有甚麼她做不到的?」Bryan的表情像要拜見Katrina師太一樣。「那時她在FB寫了一句:『自己身體自己救』,同我理念一樣。」共同話題,共同的艱苦經歷,兩個人無話不談,終成情侶。去年「覺得跑步好寂寞」的Bryan還跟着Katrina練跑,並愛上那種挑戰自己的感覺,今年第一次參加渣打馬拉松十公里賽事,原來曾經冇諗過跑得郁的自己,可以在公路上同大堆人一齊走,「俾佢影響,變咗好多嘢,我都開始想試試。」

「可能好多人覺得我只得兩分,但他告訴我我值得更高分。就算我做完都係得五、六分,我都係比以前進步咗。」她在對方眼中得到肯定,看到更多可能性,而Bryan:「由網上到現實相處,我都好舒服,唔使再小心翼翼講嘢。我知她不會生氣。多做一些我覺得有價值的事情,發現原來情況會差好遠。」

記者:陳慧敏
攝影:潘志恆、許先煜

2017果籽繼續認真知味。識買惜用。行以求知。好事多為。重修舊好。
緊貼果籽報道,即like: http://fb.me/AS.AppleDaily

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載