蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年03月20日

【萬三蚊學溝女】抄筆記學覆WhatsApp 毒男:我認為值得!

15,428

「唔係我哋攻心計,而是社會咁樣諗。我們只是按社會市場需要,惟有接受現實。」談及溝女攻防時,奇諾戀愛心理教室創辦人劉奇諾(Kino)如是說。

以約會大師自居、美國NGH註冊催眠治療師Kino,約六年前創辦戀愛教室,打正旗號教溝女,近年每兩個月開班一次,長開長有,四堂學費最高更達$12,800!呢個價錢大概等於大學畢業生成個月人工,究竟有乜咁把炮?

睇睇課程大綱,課程包括初相識「邂逅篇」到熟絡後「關於管理」都有教,一共四堂,合共24小時課程外加speed dating,平均每小時超過$533。有人話呢個價錢好貴,Kino回應指:「其實好多男人追一個女仔,拉筋拉了12萬(註:指有苦主被女健身教練以『幫你拉筋』游說入會);送電話畀女仔做生日禮物,仲未喺埋一齊,每年送$7,000都有。我成日話,一個男仔俾女仔呃都唔止呢個數字,對整個人生溝通而言,唔係一個好大嘅數字。」

記者趁上課日到場採訪,當日十多位學生唔算踴躍,只見大家默默抄筆記,似足補習天王公開考試前上的雞精班。Kino說:「其中三分一上課後較勤力的學生,下課後會練習的,也會有女朋友。」練習?原來每堂課後都有「功課」要做,輕則試食餐廳,重則攞女仔電話「抄牌」亦有。

不過講到整個課程最值錢的一部份,他卻說是日常輔導。「唔識覆WhatsApp,我會請佢截圖上群組。我通常會問學生,你會點答,先講三個答案。如果他說一些很毒的說法,或很變態的,便先制止他,第一步先糾正他的思想錯誤。」覆WhatsApp咋喎,可以有幾變態?「我試過學生話有女仔養了一隻倉鼠,send咗張相畀佢,好可愛。但你估都估唔到佢點覆,佢話:『放心啦!你帶佢出嚟,我唔會食咗佢㗎!』呢個講法,乜咁恐怖!」喺街上搭訕、覆message都有得教,但咁樣上堂,係咪真係有用?

不願上鏡的學員Andy,2015年已經上過堂,採訪當日算係「補鐘」,「只論結果,佢真係成功為我增加異性緣,從結果上看,我一定認為他值得。」有穩定女朋友?「依家喺單身狀態下再回來上課,精進自己技巧,將來為下一段感情努力。」嗯,祝君好運。

記者:黃樂雯
攝影:徐振國、王國輝

2017果籽繼續認真知味。識買惜用。行以求知。好事多為。重修舊好。
緊貼果籽報道,即like:http://fb.me/AS.AppleDaily

果然好玩,籽在四方,即like「果籽」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載