› 選擇地區
三藩市
紐約
洛杉磯
其他美國地區
香港 台灣 北美
 
2017年04月06日

【一餐飯代價】萬事屋唔收錢做嘢 從一個人到一班廢青

受人錢財,替人消災,合理不過,但如果冇錢收,只係得支水,得個麥記$24餐,又係乜玩法?有毒男四年前因為覺得悶,冇人陪,於是上高登出post搵陌生人陪食飯,但他深明「無啦啦搵人陪,人哋當你癲」,決定提出幫對方做一件事作等價交換,無拖無欠,因為騎呢,所以引起很多人好奇,紛紛舉手回應,願意做這個「飯腳」。邀約他們做訪問,他們也視之為委託,條件是請吃一頓飯,好,冇問題,就請你們吃遠近馳名的堆填區公司canteen。

相關新聞:【委託實錄】貓記萬事屋 幫手做街訪又得唔得?

正職開網店、今年33歲的譚亦軒(喪貓),就是於2013年創辦這個「貓記萬事屋」的毒男,話明萬事屋,如果你有奇難雜症,只要請他吃餐飯,就會諗計幫你解決,食乜都得,少至一支水,豪氣至高級扒房,都無任歡迎。萬事屋由幾年前的one man band,演變成現今達三十多人的團隊,越做越大。成員年齡介乎十幾至五十幾歲都有,各有專長,睇風水、做私家偵探、傾心事、剪片、陪人遊行和遊山玩水,乜都得,聽落搞笑,但都不夠客人的委託騎呢:陪上鳳凰山睇日出、每晚陪跑步、家長日扮家長見老師、幫手向朋友追回拖欠了三年的$500、幫手襯套去飲的戰衣、幫手通宵排演唱會、中秋節一早去霸BBQ爐、甚至連影婚紗相都有,「結婚咁大件事都夠膽搵我哋,佢夠膽搵我哋就夠膽影。」最新接到的case,還有當陌生人的婚禮見證人,吓?咁都得?

看似無聊,但喪貓卻說:「每個委託都有特別的地方,都係一種學習,三人行必有我師嘛,我地嘅性質同記者差不多,都係聽人講古仔。」除了一餐飯,沒有錢銀上的酬勞,有時甚至會被客人搵笨,不會覺得有點浪費時間嗎?「其實以前剛開貓記時係做緊傳媒機構,諗起以前做過幾份工都冇乜特別的回憶,但貓記可以見唔同人,睇唔同風景,而家我仲好記得第一單委託係幫個壽司師傅寫封英文的辭職信,唔同的委託都豐富咗我嘅生活。」

只得廿三、四歲的胡曼儀(牛小貓)和文睿嵐(皇后貓),待業,自命廢青,幾年前因為貪玩,想識來自五湖四海的朋友而加入貓記團隊,儍大姐般的皇后貓說:「呢度真係好多新鮮和未知的事,鑊鑊新奇鑊鑊甘,唔加入貓記就呢世都唔會遇到。」例如?「試過借個頭畀個剪髮學徒試剪,但剪到好核突,俾人笑咗成個禮拜。」她覺得好嬲又好笑,「當識多個新朋友囉。」客人的反應也是她做下去的理由,「有次幾開心的,其實好簡單,只係幫客人個女去商場排韓星簽名會,好快就排完,其實我哋只得其中一個人去做,但個客話想請我哋一大班人返屋企食飯,佢煮咗勁多餸,大家都食得好開心,都好感動。」

不過,又未必個個客都咁好,牛小貓就有不快經歷,「試過有一次幫客人改功課,係英文閱讀報告,做完後對方請我食譚仔,唔係食譚仔嘅問題,而係我漏夜幫佢完成,但佢仍然不斷話我做得唔好,食完仲只係講一句『唔該晒拜拜』就走,原來佢只想要完成品,冇心同我交流,唔希望再接到呢啲委託。」不過她也有個體會很深的case,「試過有個護士客人想識個醫生,但佢打扮好男仔,覺得自己好粗魯,就叫我教佢點樣可以女仔啲,教完佢又話真係過唔到自己嗰關。但最近我睇到佢WhatsApp張相,見到佢唔同晒,變得好女仔,完全唔似佢,我覺得有時有啲事係睇你有幾大決心去做,其實好多客人搵我哋,都只係想有人畀啲支持同鼓勵佢。」

雖然貓記的宗旨是「一日不吃飯,一日不做事」,但他們也會向客人講明,不一定能夠完成委託,唔驚俾人話呃飯食咩?皇后貓說:「所以我每次都唔敢食太好,就算做唔到都冇咁心虛,我覺得食飯係次要,做事先係重點,其實我食乜真係冇所謂,主要都係想識多個朋友,我比較四年重委託多過食乜囉,其實我哋真係一班好熱血,好有心嘅人。」

既然係咁,果籽都決定給予他們一個委託,看看他們能否完成,想知係乜?請留意另一則動新聞。

記者:黃子配
攝影:梁志永

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載