› 選擇地區
三藩市
紐約
洛杉磯
其他美國地區
香港 台灣 北美
 
2017年04月15日

【愛佢定害佢】兔兔玻璃心唔易養 復活節後遺棄多一倍

復活節好不好?當然好啦,難得有長假,梗係要盡情玩。不過去玩復活蛋、去日本玩櫻花都好,都千祈咪玩養兔,最緊要,唔好玩完就丟。「如果你送兔仔畀人,收個人根本唔鍾意,咪遺棄佢。甚至有人特登餵佢食唔應該食嘅嘢,例如樂天熊仔餅、朱古力咁,做乜?整死佢囉。」香港兔友協會幹事董芳宜(Yvonne)說,兔友協會每年接收近二百隻棄兔,每月平均接收近二十隻,但在復活節後一個月,棄兔會多一倍至近四十隻,「往年復活節領養頻率唔特別高,反而復活節後大概一個月,會多咗人棄兔,特別多熱心市民或養開兔嘅人,會打電話上嚟話喺街邊見到有兔仔跳嚟跳去,或有朋友嘅朋友突然唔要兔仔,點算好?特別多呢啲查詢。」

相關新聞:【養兔謬誤】兔兔食大便係咪有病?主糧唔係紅蘿蔔呀!

長毛兔最多人遺棄

市面上買兔仔好平,一般只需三百至五百元,就可將兔仔連籠及糧食帶回家。不少人未經對方同意,就決定在復活節送兔仔當禮物,往往落得兔仔無辜被遺棄的下場,「有啲最初好有熱誠,想喺復活節養兔,養咗一段時間發現,兔仔唔似一般寵物易養,唔識發聲,互動冇咁多,主人熱情消減咗,就有棄兔念頭。」棄兔由家兔,到近萬元一隻的名種兔都有。特別容易被遺棄的是長毛兔,因甩毛較多,而都市人多有鼻敏感毛病,「覺得就係佢問題」。長毛亦要常梳毛打理,否則會「打晒餅」,甚至黏上排泄物,以致有臭味,「嫌棄佢有臭味,又唔知係自己冇打理佢嘅問題。」將問題怪在兔仔身上的人,要幾多有幾多。Yvonne分享上星期有市民致電協會,說家中兔仔快死,但他沒有錢帶牠看獸醫,不想兔仔死在家裏。當日該主人帶同兔仔來到,職員發現兔仔嚴重過瘦、牙齒過長且脫水,連張開眼的力氣都沒有,懷疑主人虐待動物,遂交由警方處理。誰知該主人在棄兔後翌日再次致電,「話想接番隻兔仔,佢就話『唔緊要呀,我可以攞過第二隻兔仔』,呢個世界真係乜人都有。」

養兔醫療開支大 細心耐性唔少得

其實養兔一點也不平,醫療開支一般比飼養貓狗還要大,而且很需要細心和耐性,留意兔仔的身體狀況和情緒,「要留意佢食唔食嘢、去唔去大便。」兔仔膽小,且不太適應環境變化,可能家人突然在兔籠旁打爛東西,牠也會受到驚嚇,所以主人要找到問題,否則「兔仔可能唔食嘢十幾個鐘已經救唔番」。Yvonne認為香港生活環境細,兔仔相對其他寵物,需要的生活環境較細,算是適合養兔。只是很多兔主沒有正確飼養知識,易感徬徨。其實一般從協會領養兔仔,都有義工跟進,可教授主人正確養兔技巧。「例如兔仔鍾意咬嘢咬電線,所以見到電線特別興奮,尤其唔知點解通咗電的電線特別興奮,所以喺屋企自由活動要收起電線。」而木門、牆紙亦是兔仔的愛咬之物,用圍欄圈起活動範圍就可避免煩惱。

現時協會有五十八隻兔子,由五位職員照料,由有病痛到半身不遂的都有,「呢度冇臭味,每隻兔仔都健康又肥肥白白,相信一個人照顧一隻兔仔,絕對冇問題。」

facebook:兔協 HKRS

記者:封愷瑜
攝影:梁志永

相關新聞:【曆法點計】復活節點解年年唔同?但一定係禮拜日

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載