› 選擇地區
三藩市
紐約
洛杉磯
其他美國地區
香港 台灣 北美
 
2017年04月15日

【養兔謬誤】兔兔食大便係咪有病?主糧唔係紅蘿蔔呀!

考考你:兔仔係食乜嘅呢?腦入面係咪即刻彈條紅蘿蔔出嚟?錯喇錯喇,等香港兔友協會幹事董芳宜(Yvonne)一一解答,養兔仔的五大謬誤啦!

相關新聞:【愛佢定害佢】兔兔玻璃心唔易養 復活節後遺棄多一倍

謬誤一:兔仔餐餐紅蘿蔔?

兔仔主要糧食不應是紅蘿蔔。牠是草食性動物,糧食比例應是7:2:1──七成是提摩西牧草;兩成是新鮮蔬菜,例如唐生菜、油墨菜、白菜、菜心;一成是兔糧,以補充牠的微量元素。紅蘿蔔、蘋果、士多啤梨等水果糖份甚高,對兔仔身體無益,Yvonne說:「兔仔消化系統生長時冇打算接收高糖份,食咗可能胃脹、腸停,會唔舒服。」故一星期的紅蘿蔔份量只能是手指尾節的一半,不可食太多。

謬誤二:食便便係咪有病?

兔仔食大便實屬正常,因牠們腸道天生較短,有時吃下營養豐富的食物,經腸道消化後,發覺還有營養未吸收,盲腸會產生營養便,排泄時腦部會傳遞訊息,通知兔仔在肛門接下營養便再進食,將營養再消化。

相關新聞:【曆法點計】復活節點解年年唔同?但一定係禮拜日

謬誤三:兔仔溫馴又無害?

咪睇佢眼仔碌碌咁無害,其實兔仔真的會咬人。「甚至會咬到流血要縫針。」Yvonne說,家長決定養兔前要有心理準備,教小朋友不可亂搞兔仔,因兔仔不會說話,
表達不滿的方法就只有踏地或咬人。「好多小朋友見到動物會尖叫,或好好奇,主動摸佢身體各個部份,扯佢耳仔或者手,佢自然會抗拒咬人。」家長最緊要教小朋友別當兔仔做公仔,不可隨意搓圓㩒扁,要尊重兔仔,例如想撫摸牠前要通知牠,「話佢聽我要同你有互動」,因兔仔是地盤性動物,對突如其來的入侵很敏感。

謬誤四:兔仔要沖涼?

兔仔其實不需沖涼,皆因牠們天生細膽又怕水。另外,市面上賣的沖涼粉其實亦非必要,因沖涼粉是化學物質,「但兔毛密,點梳都梳唔晒,佢又好鍾意舔毛,食晒化學物。」其實主人只需每日幫兔仔梳走死毛,再靠兔仔自行舔毛清潔便可。

謬誤五:抱兔梗係抽耳仔?

仍有不少老人家以為要抱起兔仔,抽起兔耳便可,但Yvoone說這其實是獵人做法,「準備殺佢先會咁做。」兔耳內有神經和血管,抽起耳朵可能會扯傷部份神經和血管,所以絕對要避免。要正確抱起兔仔,要一手托起胸腔,用食指和中指夾着一手臂,手指公放在另一邊腋下;另一隻手托起臀部,再將兔仔靠向心口,讓牠感受人的心跳,牠便會很鎮定。

facebook:兔協 HKRS

記者:封愷瑜
攝影:梁志永

2017果籽繼續認真知味。識買惜用。行以求知。好事多為。重修舊好。
緊貼果籽報道,即like: http://fb.me/AS.AppleDaily

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載