› 選擇地區
三藩市
紐約
洛杉磯
其他美國地區
香港 台灣 北美
 
2017年07月21日

【器材共享】台男出租相機航拍機 港女:100蚊日借去旅行用

唔好諗,即刻答。你有冇藏喺櫃底,萬年唔用嘅攝影器材?年年月月過去,部舊相機永遠得個擺字,不如幫佢增值啦!最近有個叫「拍一拍」的攝影器材共享網站,可讓人放租及租用不同類型相機、鏡頭、腳架等等,就連航拍機都有,錢銀交易統統在網上弄好。

網站由台灣男生汪群桂(Andy)創辦,之但係創業點解會來咗香港?「我喺英國讀high school,識咗好多香港人,我覺得創業應該去朋友比較多嘅地方。」廣東話算講得不俗嘅佢解釋。

Andy原本喺美國華爾街從事金融業,無啦啦搞startup,原來源自一次旅行經歷。「之前搭廉航去巴塞隆拿,唔可以帶太多嘢,我就將相機留咗喺屋企。去到想影相嗰陣就覺得如果有部相機喺度就好喇!」打算補救,但發現喺當地租攝影器材都唔易。「畀人方便租機」呢個意念一直喺腦海,今年4月佢終於成功推出網站,提倡共享,至今約有五百人註冊。

攝影器材閒閒哋價值幾千,甚至幾萬,租出去整花咗,甚至壞機,心都痛埋。「發生乜事,我哋都會做中間人,幫忙處理。我哋有個維修部門幫物主修理,完全免費。」如果租客一去無回頭,挾帶私逃呢?「平台先收按金,如有咁嘅情況,物主可以直接claim番按金。」

於平台放租器材的專業攝影師Alan提到為咗迎合市場需要,佢經常被迫買最新器材。「舊嘅其實未壞,就咁放喺防潮箱好浪費, 拎去賣又唔值錢。大家共享,令件資產增值,有番少少收入都唔錯。」佢提到曾有人向佢租鏡頭,原來對方想在真正購買前,試清楚效果才扑鎚。

網站大部份租客都是租機出遊拍照用,也有學生租來做功課。曾透過網站租專業級相機嘅Vicky認為網站易用簡便。「平日上網買嘢都要面交,都接受到。價錢也合理, 一日只係100蚊左右。」網站有評分機制,租用過程完結後,物主與租戶可互相評分,大家就有指標可循了。

Facebook:拍一拍攝影器材共享平台 Pak1Pak
場地提供:樓上空間@太子

記者:葉青霞
攝影:劉永發

2017果籽繼續認真知味。識買惜用。行以求知。好事多為。重修舊好。
緊貼果籽報道,即like: http://fb.me/AS.AppleDaily

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載