› 選擇地區
三藩市
紐約
洛杉磯
其他美國地區
香港 台灣 北美
 
2017年07月25日

【土地問題】環保木方框變吊櫃 還劏房戶100%睡覺空間

有時候,辦社區活動會搭建會場,裝飾與表演過後難免會造成浪費。非牟利建築事務所「多磨建社」與「美差會潮浸服務聯會」早前辦了一個活動,青年人跟建築師學習簡單的建築理念,訂製了許多個40cm乘40cm的立體四方框,在廣場上組合成不同的遊戲攤位及舞台,開心玩一日。好戲在後頭,活動後,四方框送到黃大仙八個劏房戶,就着每戶有限的空間,打棟打直、做立櫃、做吊櫃,組裝成不同儲物櫃改善家居環境。這些百變木方框,叫做「無方」。

劏房戶缺乏置物空間,總搞到間屋亂糟糟,迫上加迫。鄺先生及鄺太太的劏房裏,只得一張碌架床,一張木椅子,一個小矮櫃及一個剛好塞得落一個廁塔的廁所。據講面積達十二平方米(計埋門口與部份樓梯),我們一行五人上去探訪,有三個要坐在樓梯口「排隊」,鄺生鄺太坐在床沿伸開雙臂:「間房實際面積就係長四米,闊一米六十,乘埋得六米四平方米左右,我伸直雙手已經摸到兩邊牆!」空間太窄,他家連細細個的衣櫃都沒有,鄺先生:「買畀我我都唔要呀,擺得到個立櫃都無位開櫃門啦。」以前,他們把四季穿的衣物、毛巾、冷熱天被子都用環保袋包好,放在三呎床床邊:「三分一擺衣服,三分二瞓人囉!」中年發福的鄺生雙手擺直攤平,剛填滿餘下的兩呎床位,還自豪地講:「好在我瞓覺都好少翻身,而且床邊雜物都係衫同被,碌落去軟綿綿都唔會撞親!」 他的「衣櫃」是個塞了幾件毛巾與短袖Tee、A3大的不織布袋,掛在床縫,要穿時就伸手入去大抽獎:「我得幾件衫,曬乾嘅衣服就擺底,幾日循環一次周而復始,我好清楚下一件係乜衫。」與雜物同床不是問題,落雨就大鑊了。每次落雨窗邊都滲水,整張床褥由窗邊濕到透,無得瞓,要棟起張床褥滴水,成晚坐喺度!鄺太:「然後吹風扇吹咗三日三夜,真係濕水棉胎無得彈呀!」

於是,義工們量度好天花板空間,裝了七個排成直角的吊櫃,雜物、四季衣服與厚薄被子整整齊齊的擺了進去,還他們一張完完全全的碌架床,空間大咗四分一!攤上床的鄺先生開心地左碌右碌:「鬆好多梗係瞓得好啦!」床邊放幾個膠袋「頂住」漏水,好過淋濕了衣服與床褥。

青年義工林曉慶(曉慶)與鄭尚正(阿正),前後探訪過劏房戶最少三次,幫忙度尺及了解他們需要,活動過後就親手為他們鑽牆揼釘安裝櫃子。阿正首次到訪劏訪戶:「最深刻係有啲住戶,乜都只係搵個袋入住,掛喺門後或者牆上面,走過路過會撞跌,有家人幾乎門都開唔到。」兩姐弟多數在床上玩耍。裝了架後把雜物放上架,空間多出來了。曉慶覺得家居整齊最重要是影響心情:「視覺校果都好影響心情,有啲劏房戶窗前堆滿雜物,阻礙空氣流通,咁樣對健康都唔好。」更重要是:「到有一日,呢啲劏房戶要搬家嗰陣都可以帶走木方框重新組裝,實用亦唔浪費。」

記者:陳慧敏
攝影:周芝瑩

2017果籽繼續認真知味。識買惜用。行以求知。好事多為。重修舊好。
緊貼果籽報道,即like: http://fb.me/AS.AppleDaily

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載